भांगरभूंय | प्रतिनिधी
मडगाव : शारी भागांतल्या जमीन सर्वेक्षणांत दवर्ली दिकरपाल पंचायतीचो आसपाव केला. धा वर्सां आदींय असो यत्न जाल्लो. ताका लोकांक विरोध केलो आनी आतांय पंचायत वाठारांतल्या भू सर्वेक्षणाक दवर्ली दिकरपाल नागरिकांनी ग्रामसभेंत विरोध केलो.
दवर्ली दिकरपाल पंचायतीची विशेश ग्रामसभा पंचायतीच्या सभाघरांत आयतारा सकाळीं जाली. सरपंच मिनीन कुलासो हांणी सांगलें, सेटलमेंट अँड लँड रेकॉर्ड संचालनालया वतीन नोटीस जारी केल्ली तशेंच पंचायतीक ताची एक प्रत धाडल्या. ते प्रमाण मडगांव शार हांचे वांगडा आके, दवर्ली, नावेली, नुवे, सुरावली, राय ह्या भागाचोय आसपाव जमनींच्या सर्वेक्षणांत केला. हातूंत घरां आनी हेर मालमत्तेची मेजणी करतले. हे विशीं नागरिकांक कळोवपा खातीर ही खासा ग्रामसभा आयोजीत केल्या अशें तांणी म्हणलें.
पंचायतीचे हक्क काडून घेवपाचे यत्न सरकार करता. गरजेची परवानगी दिवपाचे अधिकार फकत सचिवांक दिवन कायदो दुरुस्ती केल्या. आतां पंचायत क्षेत्राचो पालिका क्षेत्रांत आसपाव केल्यार हाचो सगल्या नागरिकांचेर परिणाम जातलो. पंच वांगड्यांच्या जाग्यार नगरसेवक येतले आनी कामां खातीर पालिकेंत पासयो मारच्यो पडटल्यो. तशेंच एफएसआर वाडयल्यार शेतजमनी उरच्यो नात आनी गांवाची पुरायेन वाट लागतली, अशें मत अँड्र्यू हांणी उक्तायलें. नागरिकांनी ह्या सर्वेक्षणाक विरोध केले उपरांत ग्रामसभेंतूय तसो थाराव घेतलो.
मात, हे ग्रामसभेच्या पयलीं पंच वांगड्यांची बसका जावंक नाशिल्ली. हाका लागून २४ जानेवारीक पंचांची बसका घेतले आनी उपरांत परत ८ फेब्रुवारीक खासा ग्रामसभेचें आयोजन करीत परत भू सर्वेक्षणाक विरोधाचो थाराव घेवपाचें थारलें, अशें सरपंच मिनीन कुलासो हांणी सांगलें.
हे खासा ग्रामसभेक पांच पंच वांगडी हाजीर रावूंक ना. हाचेरूय कांय नागरिकांनी आक्षेप घेतलो. गांवच्या अस्तित्वाचो प्रस्न आसतना पंचांची नासप योग्य न्हय. फुडले ग्रामसभेक तांकां हाजीर रावपाक सांगचें, अशी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
