भांगरभूंय | प्रतिनिधी
पणजी: गोंयच्या भूखंड हडप घोटाळ्याचो सुत्रधार मोहम्मद सुहेल उर्फ मायकल हाका सक्तवसुली संचालनालयान (ईडी) अटक केल्या. 22 सप्टेंबराक ईडीच्या पंगडान कोलवाळे बंदखणींत धडक दिवन ताका ताब्यांत घेतलो. ह्या प्रकरणांत ईडीन तपास सुरू केल्ले पसूनचो हो सगल्यांत म्हत्वाचो तपास मानतात. गोंय पुलिसांच्या विशेश तपास पंगडान दाखल केल्ली एफआयआर आनी आरोपपत्रा उपरांत ईडीन ह्या प्रकरणाचो तपास सुरू केला.
ईडीच्या तपासा प्रमाण, मोहम्मद सुहेल हो ह्या भूखंड हडप करपी टोळयेचो ‘मास्टरमायंड’. तो, ताची घरकान्न अंजूम शेख आनी तांचे वांगडी भूखंडांची निवड करताले. उपरांत, बनावट दॅथ सर्टीफिकेट तयार करून फटींग वारसदार उबो करताले. सरकारी खात्यांतले नोंदींत फेरफार करून मालकी हक्काचो बनावट इतिहासूय तयार करताले. हेच तरेन हणजूणच्या एका भूखंडाचेर बोगस वारसदार उबे करून तो विकलो, हाका लागून 50 लाख रुपयांचो काळो पयसो तयार जालो.
ईडीन जमीन हडप प्रकरणांत आतां मेरेन केल्ल्या तपासांत ह्या रॅकेटांक उक्तडार हाडलां. हें सगळें अजाप करपा सारकें आसा. ह्यान पयलींच एका संबंदीत प्रकरणांत ईडीन मोहम्मद सुहेल आनी हेर 35 जाणां आड आरोपपत्र दाखल केलां. तेन्ना, सुहेलान स्वता 100 परस चड भूखंड बेकायदेशीरपणान मेळयिल्ल्याचें कबूल केल्लें. आतां मेरेन ईडीन ताच्या 52 बेकायदेशीर मालमत्ता जप्त केल्यात, ताचें वट्ट मोल 232.73 कोटी रुपया आसा.
मोहम्मद सुहेलाक अटक केल्ल्यान ईडीक ह्या घोटाळ्या फाटल्यान पयशे आसा ते सोदून काडप, त्या पयशांचो वापर खंय जाला हें सोदप आनी ह्या व्हड कटांत आसपाव आशिल्ल्या हेर मनशांचो सदो घेवप सोपें जातलें. हाका लागून येवपी काळांत हया प्रकरणांत आनीक व्हड गजाली उक्त्यो जावपाची शक्यताय आसा. फुडलो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
