भांगरभूंय | प्रतिनिधी
तंत्रज्ञान दर वराक बदलत आसता. आदल्या तेंपार फक्त नाटकां हेंच मनोरंजनाचें माध्यम आशिल्लें. मागीर सिनेमा आयले, उपरांत टिव्ही. ग्रामोफोन, टेपरेकाॅर्डर, कॅसेट- सीडी- डीव्हीडी, टीव्हीचेर शेंकड्यांनी चॅनल्स दिसपाक लागले. मोबायल फोनान बरींच उपकरणां कोयरा पेटयेंत उडोवपाक लायलीं. कॅमेरा, घडयाळ, रेडिओ, टेप, फॅक्स, फोटो काॅपी यंत्र…. ! आतां लोक ताचेरूच टीव्ही माळो, सिनेमा पळोवपाक लागल्यात. सोशल मिडियान तुमकां कोणाचेर अवलंबून रावनासतना स्वताच अभिनेते, लेखक, दिग्दर्शक जावपाची संद दिल्या. वेवसाय म्हूण ह्या सगल्यां कडेन पळोवं येता. मात, आदी सावन प्रत्येक गजालींचो दुरुपेग करपी आसतात, तशेच सोशल मिडियाचेरूय आसात. शेंकड्यांनी, न्हय लाखांनी म्हणल्यार जाता! ते गुन्यांव करपाची संद मेळटा काय म्हूण पळयतात. बदलपी तंत्रज्ञानाचो गैरफायदो घेवन ते लोकांची फटवणूक करीत आसात…. आनी हाका लोक बळीय पडटात. म्हायती तंत्रज्ञानाच्या ह्या संवसारांत सोशल मिडियाचेर गुन्यांव जावपाचो आसा, हाची आमकां मात पसून सुलूस लागना हाका कितें म्हणपाचें? काय आमी पेपर वाचिनात, खबरो पळयनात ताचो हो परिणाम?
हालींच मॉडेलिंगाची संद दिता अशें सांगून साळगांवचे एके तरणाटे चलयेक 13.98 लाख रुपयांक फटयली. अनवळखी मनशान फेसबूक मॅसेंजरांतल्यान तिचे कडेन संपर्क केलो. ताणें मॉडेलिंगाची आवड आसल्यार किट्स मॉडेल अकादमीचो ग्रुप जाॅयन जावपाक सांगलें. मागीर काम मेळोवपाक बिटकाॅयन आनी सट्ट्यांत गुंतवणूक करपाक लायली. मॉडेलिंगाचे आशेन ते तरणाटेन दोन नामनेच्या बँकांनी 13 लाख 98 हजार रुपया जमा केले…. आनी उपरांत तो गायब जालो. अर्थांत पयश्यां सयत. ते चलयेन पयशे भरचे पयलीं विचार करपाक जाय आसलो. नामनेची मॉडेलींग कंपनी आसल्यार पसून एक लाख रुपया भरपाक कोणूय फाटीं फुडें जावपाचो. मात हांगा 14 लाख रुपया भरल्यात. कोट्यांनी रुपया आसले बगर इतलें व्हडलें धाडस कोण करीत अशें दिसना. सोशल मिडियाचेरूच तिणें चवकशी करपाची आनी मागीरूच मुखार पावल घालपाचें. पुलिसांच्या सायबर विभागाकूय पयलींच सांगिल्लें जाल्यार तेच सल्लो दिवपाचे. पूण, आतां पिकिल्लें धान्य सुकणीं खावन वतकच फाटल्यान शेताची राखण करून फायदो कितें?
आयज काल ज्या मळाचेर पयसो आसा, ताचें आकर्शण लोकां मदीं चड वाडत आसा. अर्थांत हातूंत चुकीचें कांय ना. पूण थंय वच्चे पयलीं तें मळ आपणाक योग्य आसा काय ना, थंय कश्ट करचे पडटात, तें आपणाक जमतलें काय, थंय कितें धोको ना मूं ह्या सगल्यांचो बारीकसाणेन अभ्यास करपाक जाय. एक- दोगांचो सल्लो घेवपाक जाय. नामनेचे कंपनीची लिंक येता आनी ती क्लीक करतकच बँक खातें रिकामी जाता, हें सगल्यांक खबर आसा. तरीय कोणूय पयशे मागतकच आमी ते सरळ आॅनलायन धाडून दितात?? भांगराच्यो वस्ती चकचकीत करता म्हूण सांगून फटोवपाच्यो घडणुको दर स म्हयन्यांनी घडटात. तरीय आमी आमच्यो वस्ती तांच्या हातांत दितात. तसलोच प्रकार हो. माॅडेलींग मळ तशें वायट न्हय. थंय प्रसिद्धी मेळटाच, वयर भरपूर पयसो. एका शुटिंगाक 15 हजार ते 10 लाख रुपया घेवपी माॅडेल चलयो आसात. नांव जाल्ल्यो साडेतीन ते पंचवीस लाख घेतात. अभिनेत्री, अभिनेत्यांक तर कोटीच मेळटात. आतां आपले कडेन जायरात कंपनींचें लक्ष वच्चें म्हूण सोशल मिडियाचेर फोटो घालूं येतात. (अर्थांत तांचोय दुरुपेग जावं येता.) स्वताचो पोर्टफोलियो तयार दवरूंक जाय. नामनेच्यो एजन्सी आसात, तांचेच कडेन संपर्क करचो. तांणी व्हाॅट्सअॅपाचेर लिंक धाडलें म्हूण भुल्लुसून वच्चे बदला, तांच्यो वेबसायटी तपासच्यो. 2- 3 फोन नंबरांचेर चवकशी करची. एजन्सी पयशे मागिनात, उरफाट्यो त्यो पयशे दितात. सोशल मिडियाचेर तुमचे चड फाॅलोवर आसल्यार नामनेच्या कंपनींचें तुमचे कडेन लक्ष वचूं येता.
गोंयांत तरातरांचो म्हाल विकपी शेंकड्यांनी कंपनी, वेपारी आसात. तातूंतले कांय जाण स्वताच्यो जायराती करतात. उरिल्ले नामनेच्या कलाकारांक पसंत करतात. गोंयांत माॅडेलींग करपी, तांचे फोटो काडपी, जायराती तयार करपी एजन्सी आसात. तांणी शक्यतो गोंयांतलेच माॅडेल वापरल्यार ह्या मळाचेर गोंय मुखार वचूं येता. सरकार आपल्या जायरातीं खातीर ब्रॅण्ड अॅम्बेसेडर म्हूण प्रसिद्ध व्यक्तींक वापरतात. तांणी नव्या तरणाट्यांक घेवन सरकारी येवजण्यांची जायरात करूं येता. फॅशन मळाचेर खूब पयसो आसा. रोजगाराचें तें व्हडलें साधन. पूण, थंय वच्चे पयलीं आनी उपरांतूय शितिदान पावलां उडयिल्लीं बरीं!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
