भांगरभूंय | प्रतिनिधी
भुरग्यांचीं फकांडां वा तांचेर प्रँक करचे पयलीं पालक एक म्हत्वाची गजाल विसरतात. भुरग्यां मदीं फावो ती विनोदी वृत्ती तयार जावंक नासता, ताका लागून तांकां प्रँक वा फकांडां केल्यार हांसपाची इत्सा जायना. पालकांनी भुरग्यांचे तकलेर तांतयां फोडपाचो व्हिडियो सध्या सोशल मिडियाचेर बरोच व्हायरल जाला.
ह्या व्हिडीओंतलीं चडशीं भुरगीं ५ वर्सां पिराये सकयलीं आसात. तांचे तकलेर अचकीत तांतयां फुटिल्ल्यान तांच्यो विंगड विंगड प्रतिक्रिया पळोवपाक मेळटात. हातूंत दुखप, अजाप जावप, व्हडान रडप वा पालकांक धुकलप, मारप अश्या प्रतिक्रियांचो आसपाव आसा. पालकांक हीं जरी फकांडां कशीं दिसलीं तरी चडश्या भुरग्यांक ही सामान्य अशी प्रतिक्रिया जावन आसा. अश्या प्रँकाचेर तीं हांसपाक शकनात.
भुरग्यां मदीं ‘ट्रस्ट इश्यू’ची समस्या वाडपाक शकता, अशें बाल मानसशास्त्रांतले तज्ञ म्हणटात. खुबश्या भुरग्यांक विनोदी भावना समजना.
युकेच्या असोसिएशन ऑफ चायल्ड सायकोथेरपिस्टच्या प्रवक्ती आनी बाल मानसोपचारतज्ज्ञ राचेल मेलविले-थॉमस हांणी, वेव्हारीक विनोदाचो बळी वचप सदांच मनोरंजक नासता, सामकीं प्रौढ वा किशोरवयीन भुरग्यां खातीरूय हें विनोदी नासता. तशेंच एक ल्हान भुरगें जाची शरिरीक आनी मानसीक नदरेन उदरगत जायत आसता ताका सामान्य फकांडां वा विनोद रोखडेंच समजप कठीण जावपाक शकता.
भुरग्यां कडेन अशे प्रँक केल्यार तांचें पालकां कडेन आशिल्लें विश्वासाचें नातें बदलपाक शकता. तांचो पालकांचेर आशिल्लो विस्वास उडूंक शकता. तशेंच भुरग्यांक परत आपले वांगडा प्रँक जायत काय हो भंय सतायता. ताका लागून पयले फावट जर प्रँक एक मजा कशी दिसता जाल्यार तो भुरग्यां वांगडा करप धोक्याचो थारूंक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
