भांगरभूंय | प्रतिनिधी
श्रीकृष्ण नायकः वाळपय सुपर स्कूल कॉम्प्लेक्सान भेटयलीं इनामां
भांगरभूंय । प्रतिनिधी
वाळपयः आयज भुरग्यां मुखार खूबश्या पांवड्याचेर संघर्श निर्माण जाल्यात. संवसारीक पांवड्याचेर शिक्षणीक मळार सर्त निर्माण जाल्या. ह्या सर्तींनी भुरग्यांक येसस्वी करपाचे आसत जाल्यार अपेसाचेर जैत मेळोवपाची तांक तांचे मदीं निर्माण करात. हातूंत शिक्षकां वांगडाच पालकांची लेगीत खूब म्हत्वाची भुमिका आसा, अशे सांखळी सरकारी उच्च माध्यमीक विद्यालयाचे प्राचार्य श्रीकृष्ण नायक हांणी सांगलें. वाळपय सरकारी उच्च माध्यमीक विद्यालयांत आयोजीत केल्ले वाळपय सुपर कॉम्प्लेक्स चोंबो इनामां भेटवण सुवाळ्यांत ते उलयताले.
ह्या वेळार माचयेर वाळपय उच्च माध्यमीक विज्यालयाचे प्राचार्य रिजाय जमादार, शाळा चोंबो समितीची सचीव सुवर्णा साळगांवकार, निकिता देसाय, विद्यालयाचे हेर शिक्षक हाजीर आशिल्ले.
श्रीकृष्ण नायक हांणी सांगलें, आयज सरकाराच्या माध्यमांतल्यान वेगवेगळ्या पांवड्याचेर भुरग्यांक सर्ती खातीर तयार करपाचे यत्न चलिल्ले दिसतात. मात हे खातीर पालकांनी सेगीत आपल्या भुरग्यांक उर्बा दिवपाची गरज आसा. जे मेरेन भुरग्यांक उर्बा दिनात, ते मेरेन भुरगीं येसस्वी जावप कठीण आसा.
आयज दरेकल्या कडेन मोबायल आसा. मोबायलाचो वापर आमी बऱ्या आनी वायट गजालीं खातीर लेगीत करपाक शकतात. संवसारीक पांवड्याचेर गिन्यान दिवपी गॅझेट म्हूण मोबायलाची निर्मिती जाली. मात हाचो गिन्यान मेळोवपा बदला वायट कामां खातीर वापर जावपाक लागला. आपले ध्येय मेळोवपाचो आसा जाल्यार भुरग्यांनी ताचो वापर बऱ्या कामा खातीर करचो. व्यसनां पासून पयस रावात. गिन्यान मेळोवपा खातीर गरजेच्या घटकांचो वापर करात. आयज संवसारीक पांवड्याचेर खूबशीं व्यक्तीमत्वां निर्माण जाल्यात. ह्या व्यक्तीमत्वांचो आमी अभ्यास केलो जाल्यार दरेकल्याचे जिणेंत संघर्श आशिल्ल्याचें पळोवपाक मेळटा. जे मेरेन आमी संघर्शाक समर्थपणान फुडो करिनात ते मेरेन आमकां येस मेळचें ना, अशें श्रीकृष्ण नायक हांणी सांगलें.
रियाज जमादार हांणी सांगलें, फाटल्या कितल्याश्याच वर्सां सावन ह्या कॉम्प्लेक्साच्या माध्यमांतल्यान भुरग्यांक अभिनव अशे उपक्रम दितात. तातूंत भुरगीं खोशी जातात. खोसदिणें शिक्षण पद्दती ही आयच्या काळाची खरी गरज आसा.
ह्या वेळार मानेस्तां हस्तुकीं विवीध सर्तींतल्या जैतवंतांक इनामां भेटयलीं. शिक्षिका निकिता देसाय हांणी प्रास्तावीक केलें. तांणी ही कार्यावळ आयोजीत करपा फाटलो हेतू स्पश्ट केलो. शिक्षिका अम्रीन खान हांणी सुत्रसंचालन केलें. शिक्षिका सुवर्णा साळगांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
