भांगरभूंय | प्रतिनिधी
जितलो हावेस व्हड तितली झेप व्हड आसूंक जाय. ती नासली जाल्यार मना सारकें कितेंच घडना. कोंकणी ही गोंयची राजभास, पूण मुळावें शिक्षण सोडल्यार कोंकणी भाशेक फावो तसो वालोर ना. कांय भुरगीं बी. ए. आनी मागीर एम. ए. करतात तितली तरी एक खुशालकाय आसा. पूण ह्या भुरग्यांचो फुडार शास्वत आसा? गोंय विद्यापीठ ‘दिश्टावो’ ह्या प्रकल्पा खाला गोंयचें पुराय शिकप कोंकणींतल्यान जावंचें असो हावेस बाळगिता, पूण ताचो दिश्टिकोण मुळाक सावन ताळाक सांगड घालता जाल्यार समजना.
स्कुलांनी आठवी यत्ते सावन तिसरी भास विशय बदलूंक मेळटा. जीं भुरगीं मुळावे शाळेंत कोंकणी शिकिल्लीं तांतूंतलीं कितलींच विदेशी भासो शिकूंक पसंद करतात. हांगाच्यानूच कोंकणीची वाट लागता. विदेशी भासांचें शिक्षण कशें आसता तें खबर ना, पूण दोन कारणां निश्चीत आसात, एक – त्या भासांनी चड स्कोर करूंक मेळटा आनी दोन – थोड्या पालकांचें चिंतप आसा, त्यो भासो शिकल्यार आपल्या भुरग्यांक विदेशांत सोंपेपणीं नोकरी मेळुंयेता. कोंकणी सोडटात हें खूब पळेलां, पूण विदेशांत नोकरी कितल्या जणांक मेळटा तें मात खबर ना. हेच फाटभुंयेर एक शिक्षणीक पुस्तक हाताक लागलें, ‘शाळीक मानसशास्त्र’. ह्या पुस्तकाचो मूळ बरोवपी आसा पाँडिचेरी विद्यापीठांतलो प्रॉफेसर आनी जायत्या सायकोलॉजी संस्थांचो मुखेली डॉ पंच रामलिंगम. हें मूळ इंग्लीश पुस्तक भारतांतल्यान कितल्याच भासांनी अणकारलां आनी फाटल्या वर्सा तें कोंकणींतल्यान उजवाडा आयलां. सेंट झेवीयर कॉलेजीची प्रॉफेसर जॅनॅट फेर्नांडीसाच्या फुडारपणा खाला मायकल जूड ग्रेशियसान तें अणकारलां आनी फादर आवे मारिया आफोंसोन ताचें संपादन केलां. हें पुस्तक इंडियन स्कूल सायकोलॉजी असोसियेशनान उजवाडायलां. ताका 240 पानां आसात आनी ताचें मोल 450 रुपया आसा. ह्या पुस्तका खातीर प्रोफेसर जॅनॅटाक शाबासकी आनी परबीं.
पुस्तकाचो गाभो
‘शाळीक मानसशास्त्र – भारतीय संदर्भांत’ हें एक खूब म्हत्वाचें पुस्तक. तांतूंत 12 मुखेल पाठ आसात. दर एका पाठांत उपपाठ आसात. पयलो पाठ आसा ‘भारती संदर्भांत शालेय मानसशास्त्र. तातूंत उपपाठ आसात ते अशे – प्रस्तावना, ध्येय, अर्थ, विशेश सभाव, आवाठ, खेरीतपण, घटक, भुमिका, क्षमता, ह्या मळार वावुरतल्यो संस्था, संबंदीत नेमाळीं, भारतांत विस्तार आनी आटाप. अशे तरेन बरोवप्यान मानसशास्त्राचें विस्तारान म्हायतीसंपन्न विवरण केल्लें आसा. ह्या पुस्तकाचो वावर पुराय शास्त्रीय नदरेन बरयला हें विशेश. दर एका पाठाची पयल्या पाठा भशेनूच वांटणी आनी विशयाची थोडे भितर प्रस्तावना दिवन पाठ फुडें व्हेला. दुसऱ्या पाठांत शालेय मानसशास्त्राचो इतिहासीक दृश्टिकोण दितना म्हत्वाच्यो परिशदो, इतिहासीक विकासाक जबाबदार आशिल्ल्या व्यक्तिमत्वांचो उल्लेख, तांची म्हायती आनी पुस्तकां विशीं वाचूंक मेळटा. तिसऱ्या पाठांत शालेय मानसशास्त्राची संभवना वाचतना उद्दिश्ट, शालेय शिक्षण, आंतरराश्ट्रीय दृश्टिकोण, भारतांत वर्तमान संशोदनाची दिशा आनी संस्थांच्या भुमिकांचेर उजवाड घाल्लो वाचूंक मेळटा.
चवथ्या पाठांत बाल विकासाचे पावंडे दिल्यात. पांचव्या आनी सव्व्या पाठांत सर्वसमाशक शिक्षणाक शालेय मानसशास्त्रींची भुमिका आनी वेवसायीक नैतीकते विशीं नदर दिल्या. भारतांत मानसशास्त्राचें शिक्षण दिवंक जीं कमीपणां आसात, तांचेर ह्या पुस्तकान खोलायेन उजवाड घाला. भुरग्यांक विदेशी विचारांचेर शिकोवप शक्य ना हाच्यो सडेतोड देखी पुस्तकांत मांडल्यात. गरज थंय उदाहरणां आनी सदर्भूय दिल्यात. ‘शिकप आनी दिव्यांगपण शिकतना’ ह्या सातव्या पाठांत बरोवप्यान आपणाले अणभव ओतयल्यात. अशें करतना शिकपाची संकल्पना, अक्षमता, तिची लक्षणां, त्यो वळखूंक कुर्वो, सामान्य प्रकार, तपासणेची प्रक्रिया,समाजीक भावनीक फिशालकाय आनी हे अक्षमतेक मानसशास्त्राची भुमिका ह्या सारक्या विशयांचेर उजवाड घाल्लो आसा.
अशे तरेन मुखावेल्या पाठांनी मानसीक भलायकी, अपंग भुरग्यां खातीर सेवा, भुरग्यांक जिविताच्यो गरजेच्यो फिशालकायो, मुळावें समुपदेशन, ताणीं स्वताची काळजी घेवंक मार्गदर्शन आनी भारतांत शालेय मानसशास्त्राक फुडाराची दिशा, अशे साबार विशय हाताळिल्ले वाचूंक मेळटात. अशें हें भुरग्यांच्या मनाक गुणसंपन्न मार्गदर्शन दिवपी पुस्तक, संशोदन,
भुरग्यांच्यो सभा, कार्यशाळा हांचेर लेगीत उजवाड घालता आनी मानसशास्त्रा विशीं जागृताय निर्माण करता.
पुस्तकांतली भास
हें पुस्तक अणकारतना भास जाता तितली सोंपी दवरपाचो यत्न केला पूण हें शिक्षणीक पुस्तक आशिल्ल्यान तांचे मुखार खूब आव्हानां उबीं आशिल्लीं हाची जाणीव जाता. उतरावळ आनी भाशीक तंत्रां कोंकणींत हाडूंक जाल्ल्या अडचणींक मनांत धरल्यार पुस्तकांतली सुडसुडाय दिसून येता. सामान्य मनशान लेगीत ह्या विशयांत रुची दाखोवंची होच तांचो हेतू स्पश्ट जाता.
डॉ. पंच रामलिंगम
आपले प्रस्तावनेंत बरोवपी म्हणटा, “भारताच्या संदर्भांत शालेय मानसशास्त्र एक नवें क्षेत्र जाल्यार पश्चिमी संस्कृतायेंत हे शिस्तीक शंभर वर्सां अदीक जालीं. भुरग्यांच्यो गरजो भागोवंक भारतांत शालेय मानसशास्त्राच्यो सेवा प्रोत्साहीत करूंक ह्या काळाची गरज. मानसशास्त्राचेर कोणें वेवसायीक प्रशिक्षण घेतलां जाल्यार, पश्चिमी नमुन्याचेर आदारून शालेय मानसशास्त्राचो तीं सराव करतात. भारतांत आशिल्ल्यो विवीध संस्कृतायो, भासो आनी कुळांक लागून शालेय मानसशास्त्राचो पश्चिमी नमुनो भारतांत लागू करूंक जायना.”
प्रॉफेसर जॅनॅट
पुस्तकाचो अणकार करूंक फुडाकार घेतिल्ली प्रॉफेसर जॅनॅट आपले विचार उगतायतना म्हणटा, “शालेय मानसशास्त्राचें कोंकणींतल्यान हें पयलें पुस्तक. स्थानीक भाशेंतल्यान वाचूंक आनी शिकूंक नवें शिक्षणीक धोरण बरे भशेन समजून घेवंक आनी अंमलबजावणी करुंक भर दिता. हे पुस्तक मानसशास्त्र प्रधान लक्ष आनी तत्वांचो वापर करून शालेय जिणेच्या वेगवेगळ्या आंगांचेर उजवाड घालता जे वरवीं शालेय जीवन प्रामाणीक, सहानुभूतीन भरिल्लें, साध्यताय प्रधान, समावेशक आणि समग्र करुंयेता – एक अशें वातावरण जें शिकोवप-शिकपाच्या कार्यावळीक फावो अशें आसतलें.”
सोंपयतना
मानसशास्त्राचें हें पुस्तक वाचून एक वेगळोच आनंद मेळ्ळो. शालेय मानसशास्त्र जावन आसा शिक्षणीक, भलायकी आनी खूब वेगान वाडटल्या औपचारीक मानसशास्त्रांत जुळिल्लो एक फांटो. तांतूंत शिकपाची अशिस्त आनी वागणुकेची समस्या आशिल्ल्या भुरग्यांक मोलावणी करूंक आनी तांचो नकासो करूंक आधार मेळटा. जी म्हायती सहज उपलब्ध ना ती ह्या पुस्तकांतल्यान मेळटा. दर एका मनशाक आनी चड करून भुरग्यांक ताची गरज आसा. अशें पुस्तक आमचे भाशेंत आयलां हाचो आमकां अभिमान आसूंक फावो. तें भुरग्यां बराबर सामान्यांतल्या सामान्य मनशा मेरेन पावचें म्हण आस्त बाळगितां. परत एक फावट सगळ्या संपादक वर्गाक परबीं दितना, जो फुडाकार प्रॉफेसर जॅनॅटान घेतला, तसो फुडाकार हेर विशयांतल्या प्रॉफेसरांनी घेवन भुरग्यांक उपयोगी सगळ्या विशयांतलीं पुस्तकां कोंकणींत हाडपाचो वावर नेटान करूंक खाल्ती विनंती करतां.
विन्सी क्वाद्रुश
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
