भुरग्यां कडल्यान तियात्राची अपेक्षा धरूं येता

भांगरभूंय | प्रतिनिधी

हें फकत म्हाकाच दिसता जाल्यार दुबाव पयस करूंक सर्तिनीं पयल्या तीन जाग्यांचेर आयिल्या तियात्रांचें रशिकां खातीर प्रदर्शन करून तांचे विशीं तांचें मत घेवूं येता…

ह्या लेख माळेंतल्या फाटल्या लेखांत तियात्र पालकार, 1980 दशकांत, तियात्र आनी खेळ-तियात्र मळार घडिल्लीं कांय घडितां हांवें नदरेक हाडलीं. तांचे वरवीं एक स्पश्ट जाता तें म्हळ्यार खेळ-तियात्रान तियात्राक गिरासलो ना. गिरासलोलो जाल्यार आयज ‘खेळ-तियात्र’ वा ‘नाॅन स्टॉप ड्रामा’ हो प्रकार तरी ताठ मानेन पालकार चलूंक नाका आसलो? तियात्र पालकार कितें बदलपां जाल्यांत ताचे वरवीं तियात्र तसोच खेळ-तियात्र हे दोनूय प्रकार खंय तरी सांडले आनी आयज एक वेगळोच प्रकार तियात्र पालकार तियात्र म्हूण उपजलो हें सिध्द जाता. आतां फुडें आनीक कांय हालींच्या काळार पालकार घडिल्ल्या घडितांचेर उजवाड घालतां.

आयज-काल तियात्रांक भोव थोडे प्रेक्षक जातात. सिजनांतले तीन-एक तियात्र हाउसफूल म्हूण मिरोवंक शकतात जाल्यार उरिल्ले, म्हळ्यार 80 टक्के प्रयोग वस-यांनी दोनशीं-तिनशीं आनी कांय फावटीं पन्नास लेगीत प्रेक्षकां खातीर आयोजीत करतात. तातूंत मागीर ‘हाउसफूल‘ जातात त्या तियात्रांक उत्तम तियात्र म्हणून कित्या वयल्यान प्रमाणपत्र (सर्टीफिकेट) दिवप?

तियात्र उत्सवांनी आयज तियात्र फकत सर्तींत इनामां मेळोवपा खातीरुच पालकार हाडटात काय असो प्रस्न पडपाक लागला. कारण तियात्राच्या नेमांक धरून तियात्राचें फोर्मेट राखपा खातीर ते तसले फास्केंत हाडपा खातीरुच यत्न जाल्लो दिसता आनी न्हय सभावीकपणान ते फास्केंत तो तियात्र जावंचे खातीर. हें फकत म्हाकाच दिसता जाल्यार दुबाव पयस करूंक सर्तिनीं पयल्या तीन जाग्यांचेर आयिल्या तियात्रांचें रशिकां खातीर प्रदर्शन करून तांचे विशीं तांचें मत घेवूं येता. तशें पळोवंक गेल्यार ह्या मौसमांतल्या हालींच सोंपिल्ल्या तियात्र अकादेमी ऑफ गोवा हांणी घोडवन हाडिल्ल्या विद्यालयां महाविद्यालयां, इश्कोलाच्या आनी भुरग्यांच्या तियात्र उत्सवांनी कांय निजाचे पध्दतीन आनी आधुनीक रितीन सादर केल्ले खरेले तियात्र पळोवपाक संद मेळ्ळी. ते पळेतच अशें दिसलें कीं आयज तरणाट्यां आनी भुरग्यां कडल्यान उत्तम आनी परंपरीक पद्दतीच्या तियात्राची अपेक्षा धरूं येता.

एक उदाहरण कशें घेतलें जाल्यार कार्मेल कॉलेज, नुवें, हांणी सादर केल्लो ‘चूक कोणाची’ हो महाविद्यालयांतले सर्तींत पयलें इनाम जिखिल्लो तियात्र. कांय ल्हान-ल्हान उणाव सोडले जाल्यार हालींसराक पालकार पळयिल्लो एक निजाचो तियात्र प्रकार म्हणपाक कांयच हरकत ना. पूण हो तियात्र बॉक्स ऑफिस  वा वेव्हारीक दिश्टीन येस मेळोवंक शकतोलो काय ना आनी येस मेळयना जाल्यार लेगीत असले तियात्र अर्थीक फाटबळ दिवन कशे फुडें व्हरचे हाचेर लागू जातल्यांनी विचार करपाची गरज आसा.

‘खेळ-तियात्र’ वा ‘नाॅन स्टॉप ड्रामा’ हाची तर नांव-निशाणी आयज पालकार पुसत गेल्या. कारण हो प्रकार आयज जबरदस्तेन तियात्र म्हूण अदीं-मदीं कांतारां घालून तो फुडें व्हरतात ते वरवीं तो घुस्मटून मरूंक पावला. उदाहरणाक हालींच कॉलेजीच्या भुरग्यां तर्फेन मिनीनो दे बांदार हांचो नांवलौकीक जाल्लो ‘सुकोरीना’ खेळ-तियात्र. हो खेळ-तियात्र एक तियात्र करच्या हेतून अदीं-मदीं कांतरां घातिल्ल्यान ताचो ‘लींक’ आनी सातत्य तुट्टा, जे वरवीं ताची गती वयर-सकयल जाता. सुंदराय बिगडटा. आदीं तो खेळ-तियात्र रुपान उट्टालो तसो आतां तो एक तियात्र कसो उटूंक मुश्कील जाता.

कांय जाणांचें म्हणणें आसा कीं आयज तियात्र प्रेक्षकांक फकत कॉमेडीच जाय आनी देखून दिग्दर्शक पांच-स लेगीत विनोदी कलाकार घालून अर्दो वयर तियात्र विनोदी करूंक वावुरता. हें सारकें काय? हें सारकें जाल्यार हालींच सोंपिल्या तियात्र मौसमांतल्या कितल्या तियात्रांतली कॉमेडी खपल्या? कॉमेडिन भरिल्ले कितले तियात्र वेव्हारीक नदरेन सुफळ जाल्यात? ताचे  तातूंत राजदीप नायकाचें ‘गांव जाला जाणटो’ हें नाटक तियात्र-प्रेक्षकां मदीं इतलें फांकी कशें जावंक पावलें? हाचेर आनी उरिल्याचेर फुडल्या आनी निमण्या लेखांत उजवाड घालतां.

(मुखार चलता…)

लिप्यांतर: विशाल खांडेपारकार, 8080622370