भांगरभूंय | प्रतिनिधी
पार्सेचे बाल ग्रामसभेंत सरपंचाची हमीः विद्यार्थ्यांचे शिटुकसाणीन ओडलें लक्ष
भांगरभूंय । प्रतिनिधी
पेडणें: पार्से गांवांत भौशीक, आपल्या वाठारांत, घरांत वा शाळेंत कसल्यो समस्या भुरग्यांक सतयतात जाल्यार त्यो बाल ग्रामसभेंत मांडपाचो तांकां पुराय अधिकार आसा. अश्यो सभा वर्सांतल्यान दोन घेवच्यो, अशी सरकाराची सुचोवणी आसा. पंचायत वाठारांतल्या भुरग्यांचे प्रस्न वा समस्या आसत जाल्यार त्यो पंचायत कार्यालयांत येवन वा आपल्या पंचा कडेन मांडात. पंचायत मंडळ सरकार दरबारांत मांडून त्यो सुटावे करतले, अशी सरपंच अजय कळंगूटकार हांणी हमी दिली.
पार्से पंचायत मंडळान पयलेच खेपे 6 ते 18 वर्सा मेरेनच्या भुरग्यांची खाशेली बाल ग्रामसभा सरपंच कळंगूटकार हांच्या फुडारपणा खाला आयोजीत केल्ली. सभे आदीं भुरग्यां मदली अध्यक्ष म्हूण धनिष्ठा आत्माराम पटेकार आनी उपाध्यक्ष म्हूण प्रियांश नामदेव दाभाळे हांची निवड केली. हे सभेक सरपंचा सयत पंच मधू सातार्डेकार, स्वप्नील नायक, सुनिता बुगडे देसाय, प्रज्ञा पार्सेकार, अजीत मोरजकार, पंचायत सचीव विजय तिळवे हाजीर आशिल्ले.
सरकार वेगवेगळ्यो शिश्यवृत्यो आनी पयशे दिवन विद्यार्थ्यांचें शिक्षण पुराय करपा खातीर येवजण्यो चालीक लायता. जर कोणाक ह्या येवजण्यांचो लाव मेळना जाल्यार ताची म्हायती पंचायतीक दिवची, अशें सरपंच कळंगूटकार हांणी सांगलें.
कोरोना काळांत सरकारान विद्यार्थ्यांच्या हातांत मोबायल दिले, ते आयजूय तांच्या हातांत आसात. तांचो वापर उणो करचे खातीर पंचायत मंडळान विवीध सोयी सुविधा आशिल्लें गांवांत एकादें खेळां मैदान बांदपाक फुडाकार घेवचो, अशें मत एका विद्यार्थ्यान ह्या वेळार मांडलें.
शाळेच्या पाख्याक घातिल्ले पत्रे पोरणें जाल्यात, पाखे मोडपाक पावलां, सध्या पत्रे तापतात, पंखेय वेवस्थीत चलनात, ते दुरुस्त करचे वा नवे घालचे, अशी मागणी कांय विद्यार्थांनी ह्या वेळार केली.
शिक्षणा वांगडाच नाच, कराटे प्रशिक्षण तशेंच वेगवेगळ्या खेळां खातीर वेगवेगळे खेळां प्रशिक्षण सुटयेंत दिवपाचीय मागणी कांय विद्यार्थ्यांनी केली.
पार्से हो पांचवोचार गांव. गांवांत व्हड प्रमाणार वायंगण शेत आसा. पूण हालीं शेतां पडीक दवरपाचे प्रकार वाडल्यात. कांय बिगर गोंयकारांची नदर ह्या शेतांचेर आसा. फुडारांत गांवांत कांक्रिटाचें रान बी उबें जावचें ना, न्हय असो हुस्को हाजीर आशिल्ल्या विद्यार्थ्यांनी उक्तायलो.
बाल ग्रामसभेंत येरादारी आनी पुलीस अधिकाऱ्यांनी कायद्या विशींची म्हायती दिली, तशेंच सायबर गुन्यांवा विशींय म्हायती दिली.
70 टक्के अपघातांत भुरग्यांचो आस्पावः येरादारी पुलीस
गांवांतल्या भितरल्या रस्त्यांचें व्हड प्रमाणार भुरग्यांक अपघात जातात. गाडी चलोवपाचो परवानो आसले बगर 18 वर्सां पिराये खालच्या भुरग्यांनी कसलीच गाडी चलोवपाचो यत्न करचो न्हय. पालकांनी लेगीत आपल्या उणे पिरायेच्या भुरग्यांक गाडी चलोवपाक दिवची न्हय. सध्या रस्त्यार जावपी अपघातांतले 70 टक्के अपघात हे भुरग्यांत जातात, अशें येरादारी पुलिसांनी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
