भांगरभूंय | प्रतिनिधी
रोहिदास घाडीः सत्तरी म्हालांत शाळां खातीर विवीध सर्तींचें आयोजन
भांगरभूंय । प्रतिनिधी
वाळपयः जिखप- हारप हें खेळांत आसताच. मात चडांत चड भुरग्यांनी सर्तींनी वांटो घेवन आपली कुशळटाय तपासप गरजेचें आसता. अणभवांतल्यान भुरगीं शिक्षण घेतात. ते खातीर तांकां संद दिवपाक जाय आनी हे संदीचो फायदो घेवपाची विनवणी शारिरीक शिक्षकांनी भुरग्यांक करपाक जाय, अशें म्हाल खेळा शिक्षक अधिकारी रोहिदास घाडी हांणी सांगलें.
गोंय सरकाराच्या युवा आनी खेळां वेव्हार संचालनालया वतीन वाळपय म्हाल खेळां शिक्षण अधिकाऱ्यांची बसका जाली. हे बसकेंत घाडी मार्गदर्शन करताले. ही बसका घाडी आनी दिलीप गांवकार हांचे अध्यक्षते खाला जाली. हे बसकेक सत्तरी म्हालांतल्या वेगवेगळ्या विद्यालयांचे मुख्याध्यापक, शारिरीक शिक्षक आनी हेर शिक्षक हाजीर आशिल्ले.
सत्तरी म्हालांतल्या सरकारी आनी खाजगी विद्यालयांतल्या भुरग्यां खातीर खेळाचे उदरगती संबंदांत साबार तरांच्यो सर्ती आयोजीत करतले. भुरग्यांच्या खेळात्मक उदरगती खातीर तांकां उर्बा दिवपाचो यत्न करतले. हे फाटभुंयेर ही बसका आपयिल्ली. हे बसकेंत 2023-24 वर्सा खातीर खेळां समितीची स्थापनी केली. तशेंच सुरळीत आयोजना खातीर विवीध खेळ आनी खेळां खातीर इव्हेंट इन्चार्ज निश्चीत केले.
वेंचिल्ली समिती फुडें दिल्ले प्रमाणः अध्यक्ष- गोपीनाथ गांवस (एच. एम. विवेकानंद ज्ञानमंदीर, केरी), उपाध्यक्ष- काशिनाथ नायक (ठाणे सरकारी माध्यमीक विद्यालय), सचीव- रोहिदास घाडी, वांगडी- दिलीप गांवकार,
गोंय युवा वेव्हार संचालनालया वतीन सत्तरी म्हालांत शिक्षणीक वर्सांत 14, 17 वर्सां पिराये सकयल्या आनी हेर पिराय गटांतल्या विद्यार्थ्यां खातीर योगा, बुद्दीबळ, फुटबॉल, क्रिकेट आनी एथलेटिक्सा सयत 17 परस अदीक खेळां सर्तींचें आयोजन करतले.
दिलीप गांवकार, निलांगी शिंदे, विनोद पिरणकार हांणी ह्या वेळार आपले विचार मांडले आनी खेळाचे तशेंच सांघीक वावराचें म्हत्व सांगलें. सत्तरी म्हालांतल्या सुमार 25 शाळांतले शारिरीक शिक्षक बसकेक हाजीर राविल्ले. शादाब शेख हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
