भांगरभूंय | प्रतिनिधी
डॉ. प्रवीण सावंतः सक्षम संस्थे वतीन संत सुरदास जयंती उमेदीन
भांगरभूंय । प्रतिनिधी
दिवचलः भुरग्यांनी आपले भितरल्या आवाजाची प्रेरणा घेवची. तांणी सदांच उत्कृश्टेचो ध्यास धरचो. आपले कडेन आशिल्ले सुक्ष्मगूण सोदून ताचेर अदीक भर दिवचो. ताकाच आमी पोट भरपाचें साधन करूं शकता. हे खातीर भुरग्यांनी आपले कडेल संद दिवची, अशें डॉ. प्रवीण सावंत हांणी सांगलें.
विशेश भुरग्यां खातीर काम करपी सक्षम संस्थेन 30 एप्रीलाक संत सुरदास जयंती मनयली. हे कार्यावळींत डॉ. सावंत मुखेल सोयरे म्हूण उलयताले. ह्या वेळार दक्षीण गोंयचे सक्षमचे पदाधिकारी डॉ. गोविंद केळकार तशेंच उत्तर गोंयचे सक्षमचे पदाधिकारी डॉ. विठ्ठल सुखठणकार, सक्षमची अनुपा पिळगांवकार माचयेर हाजीर आशिल्ली.
डॉ. सावंत हांचे हस्तुकीं दिवली पेटोवन आनी भारतमाता तशेंच संत सुरदास हांच्या फोटवाक फुलांचो हार ओंपून कार्यावळीचें उक्तावण जालें.
डॉ. केळकार हांणी येवकार दिलो. तांणी सांगलें, सुरदास हांकां दिश्टी पडनाशिल्लें, तरी लेगीत तांणी अभंग, दोहे रचले.
डॉ. सुखठणकार हांणी मानेस्तांची वळख करून दिली. तशेंच सक्षम संस्थे विशां म्हायती दितना दिव्यांगा खातीर कसले कसले उपक्रम आनी वावर केला ताचो नियाळ घेतलो.
ह्या वेळार उडानच्या विशेश भुरग्यांनी येवकार गीत सादर केलें. सोहम चोडणकार, लक्षिता म्हाकले, हंसीका प्रभू, गौरी प्रभुमयेंकार, रुद्रेश गाड, विभा काणेकार, गार्वी कळंगूटकार, राज पेडणेंकार, यश कळंगूटकार, पंचमी मणेरकार ह्या विशेश भुरग्यांनी विवीध सांस्कृतीक कार्यावळी सादर केल्या.
अनुपा पिळगांवकार हांणी सुत्रसंचालन केलें आनी उपकार मानले. विशेश भुरग्यांक सोयऱ्यांचे हस्तुकीं भेटवस्तू भेटयल्यो. संत सुरदास जयंती मनोवपा खातीर प्रतिभाताई, प्रांजल मराठे, हनुमंत मावजे, तशेंच सक्षम आनी महामाया वाचपघराच्या पदाधिकाऱ्यांनी विवेश मेहनत घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
