भांगरभूंय | प्रतिनिधी
भांगरभूंय । प्रतिनिधी
माशेलः भुरग्यांनी अमूकच शिक्षण घेवचें म्हणून पालकांनी तांचेर चेंपण हाडपाक जायना. ताका तांचे पसंतीचें शिक्षण घेवपाक उर्बां दिवपाक जाय अशें कुमारजुंवेचो आमदार आनी गोंय पुनर्वसणूक म्हामंडळाचो अध्यक्ष राजेश फळदेसाय हांणे सांगलें. कुमारजुंवेच्या शारदा हायस्कुलांतल्या धावेचे परिक्षेंत बरे गुण घेवंन पास जाल्ल्या विद्यार्थ्याचें भोवमान तशेंच धावेचो निकाल 100 टक्के लागल्ल्यान शिक्षकांक परबीं दिवपाचे कार्यावळींत तो उलयतालो.
ह्या वेळार कुमारजुंवेचो सरपंच नंदकुमार शेट, मुख्याध्यापिका उज्वला पोतेकार,पालक- शिक्षक संघाचो अध्यक्ष कृष्णा सावंत, समाज वावुरपी बाबू रायकार हाजीर आशिल्ले. सेगीत चार वर्सा 100 टक्के निकाल मेळोवप ही सादी गजाल न्हय. शिक्षकवर्गाच्या एकवोटीत यत्नाचें तें फळ आसा अशें फळदेसाय हाणे सांगलें. भुरग्यांनी दोतोर, इंजिनियर जावचें हे खातीर पालक तांचेर नाका तितलें चेंपण हाडटात हे बरें न्हय. कसले शिक्षण घेवपा कडेन भुरग्याचो सैमीक कल आसा हें पळोवन ते खातीर ताकां उर्बां दिवपाक जाय अशे ताणे सांगलें. खेळ आनी कृशी मळार आपलो फुडार घडोवपाचो भुरग्यां सामकार बरे पर्याय आसात. स्वताचो वेवसाय सुरू करप व्हो सगल्यांत बरो पर्याय अशेंय फळदेसायान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
