भुरग्यांचो, दिव्यांग व्यक्तींचो डेटा वापरा खातीर पालकांची संमती गरजेची, डेटा संरक्षण कायदो लागू

भांगरभूंय | प्रतिनिधी

नवी दिल्ली, खबरां संस्था ः डिजिटल पर्सनल डेटा प्रोटेक्शन (DPDP) कायदो, 2023 ताच्या नेमा सयत आतां भारतांत पुरायपणान लागू जाला. सरकारान 14 नोव्हेंबराक नेम अधिसूचित केलें.
डीपीडीपी कायदो संसदेन 11 ऑगस्ट 2023 दिसा मंजूर केल्लो. हातूंत डिजिटल वैयक्तीक डेटा हाताळपी कंपनींच्यो (डेटा ट्रस्टी) जापसालदारक्यो निश्चित करता, तशेंच व्यक्तींक तांचे अधिकार दिता. ते भायर भुरग्यांचें सोशल मिडिया खातें पालकांच्या संमतीन तयार करतले.

भुरग्यांचो, दिव्यांग व्यक्तींचो डेटा खातीर पालकांची संमती गरजेची

भुरग्यांच्या डेटाच्या खंयच्याय वापरा खातीर पालकांची संमती सक्तीची आसा. फकत भलायकी सेवा, शिक्षण वा रियल-टायम सुरक्षीतताय अशा तातडीच्या गजालीं खातीर सूट आसतली. कायदेशीर निर्णय घेवपाक असमर्थ आशिल्ल्या दिव्यांग व्यक्तीं खातीर तांच्या कायदेशीर पालकांची संमती गरजेची आसा.

डीपीडीपी कायद्या विशीं 5 म्हत्वाच्यो गजालीं…

संमती बगर डेटा एकठांय करूंक मेळना: खंयचीय कंपनी वा ॲप तुमचो वैयक्तीक डेटा एकठांय करचे पयलीं, तांणी ताचो हेतू स्पश्टपणान सांगपाक जाय. तुमच्या परवानगे बगर तांकां तशें करपाक मेळना. तुमकां तुमचो डेटा शॅर करपाचो ना जाल्यार, तुमकां तसो अधिकार आसा.

डेटा फकत गरजेच्या कारणां खातीर : कंपनींक तुमचो डेटा फकत तांणी स्पश्ट केल्ल्या करणां खातीर वापरूं येता. देखीक, शॉपिंग ॲप फकत ऑर्डर दिवपाक वापरतलो, मार्केटींगा खातीर न्हय. ताचो गैरवापर जाल्यार तुमी ताची कागाळ करुंक शकतात.

तुमच्या डेटाचेर नियंत्रण दवरात: तुमी खंयच्याय वेळार तुमची म्हायती तपासूंक शकतात, चुको दुरुस्त करूंक शकतात, तुमचो डेटा अपडेट करूंक वा काडून उडोवंक शकतात. कंपनींक 90 दिसां भितर प्रतिसाद दिवचो पडटलो.

डेटा उल्लंघनाची बेगोबेग सुचोवणी: तुमचो डेटा चोरला जाल्यार कंपनीन तुमकां कांय वरां भितर रोखडे तुमकां समजूंक शकता अशा साद्या भाशेंत, कितें घडलां, ताचे परिणाम आनी खंयचीं पावलां उबारचीं हाचे विशीं कळोवपाक जाय. हाका लागून तुमकां सादूर रावपाक मजत जातली.

कागाळी दाखल करप सोंपे, बोर्ड डिजिटल आसा: तुमकां कसलीय समस्या आसल्यार डेटा प्रोटेक्शन बोर्डाकडेन ऑनलायन वा ॲपा वरवीं कागाळ दाखल करात. तो फुकट आसा आनी ट्रॅकिंग सोंपे आसा.