भांगरभूंय | प्रतिनिधी
मुख्यमंत्री : गोवन वार्ताच्या ‘हुप्पा हुय्या’ अंकाचें लोकार्पण
भांगरभूंय । प्रतिनिधी
पणजी : ल्हान भुरग्यां मदलीं कल्पकता, जागरुकता, नवेंपण कायम दवरचे खातीर गोवन वार्ताचो हुप्पा हुय्या बाल विशेशांक आनी चित्रकला सर्त हे सारके उपक्रम गरजेचे आसात, अशें मुख्यमंत्री डॉ. प्रमोद सावंत हांणी सांगलें. बुधवारा अंकाच्या लोकार्पण सुवाळ्यांत ते उलयताले.
ह्या वेळार मराठी अकादमीचे अध्यक्ष अनील सामंत, प्रुडंट मिडियाचे प्रमोद आचार्य, गोवन वार्ताचे संपादक पांडुरंग गांवकार, गोवन एव्हरी डेचे संपादक जोएल अफान्सो, बँक ऑफ महाराष्ट्राचे क्षेत्रीय वेवस्थापक आनंद डिंगणेकार हाजीर आशिल्ले.
मुख्यमंत्र्यान सांगलें, ल्हान भुरग्यां मदल्या कलागुणांक संद दिवचे खातीर गोवन वार्ता वतीन हुप्पा हुय्या बाल विशेशांक काडटात. चित्रकला सर्तींतल्या जैतवंतांनी आपली कल्पकता चित्रांच्या माध्यमांतल्यान साकारल्या. भुरग्यां मदीं कल्पकता येवपांत पालक आनी शिक्षकांची भुमिका लेगीत तितलीच म्हत्वाची आसा. गोवन वार्तान अशे तरेचो अंक प्रकाशीत करप तितलेंच म्हत्वाचें आसा. हांगा कांय भुरग्यांनी बेव्याचें चित्र काडलां. सैमांतलो समतोल सांबाळचे खातीर हें लेगीत तितलेंच गरजेचें आसा.
सर्तींत वांटो घेतिल्ल्या आनी जैतवंत थारिल्ल्या सगल्यांक आपूण परबीं दितां. गोवन वार्तान ल्हान भुरग्यांक व्यक्त जावचे कातीर एक माची उपलब्ध करून दिल्या. ह्या अंकाच्या माध्यमांतल्यान गोवन वार्ता दरवर्सा ल्हान भुरग्यांची कल्पकता सगल्यां मुखार हाडटा. हे खातीर आपूण तांकां लेगीत परबीं दितां. गोंयांतल्या चडांत चड भुरग्यांनी अशे तरेच्या उपक्रमांत वांटो घेवप गरजेचें आसा. शिक्षण खात्या वतीन सगल्या विद्यार्थ्यां मेरेन हो उपक्रम पावतलो, हे खातीर यत्न करतात, अशें मुख्यमंत्र्यान सांगलें.
अनील सामंत हांणी सांगलें, सध्या एआय हो एके तरेन राकेसा भशेन आमचे मुखार उबो आसा. हाका लागून ल्हान भुरग्यांचे कल्पनाशक्त, सृजनशिलता, संवेदनशिलतेचेर परिणाम जातलो. हाचेर चित्र, गितां वा खेळ आनी पुस्तकां ही एक जाप आसा. गोवन वार्ता वतीन हुप्पा हुय्या बाल विशेशांकाचें प्रकाशन तशेंच राज्य पांवड्या वयले चित्रकला सर्तीचें आयोजन हें लेगीत ताचेर एक जाप आसा.
पालकांनी भुरग्यांक चित्रां, गितां, खेळ अश्या माध्यमांचो वापर करपाक दिवपाक जाय. शिक्षक, पालकांनी फक्त उपदेश दिवपाचें सोडून दिवचें, तांणी भुरग्यांक खेळपाक दिवचे, तांच्या हातांत ब्रश दिवचो, तांकां रंगांत भिजपाक दिवचें, तांकां पुस्तकां वाचपाक दिवचीं. हातूंत लेगीत आपूण पुस्तकांक चड म्हत्व दितां. पालकांनी भुरग्यांक तांच्यो समस्या विचारल्यार भुरगीं आपल्याक शाळेंत कितें शिकयता तें समना अशें सांगतलीं. दुसरी समस्या म्हणल्यार शिकयल्ले परिक्षे मेरेन लक्षांत उरना आनी तिसरी समस्या म्हणल्यार अभ्यासांत लक्ष केंद्रीत जायना, अशेंय सामंत हांणी सांगलें. सध्याच्या नवे शिक्षण पद्दतींत ह्या समस्यांच्यो जापो आसात. ही पद्दत भारतीय केंद्रीत तशेंच मेंदू शास्त्राचेर आदारीत आसा. भुरग्यांक कल्पक उपक्रम दिले जाल्यार तांच्या मेंदूची बरी उदरगत जाता. चित्र काडप वा पुस्तकां वाचिल्ल्यान तांचे मदली कल्पकता जागृत जावन ते ते गजालीचो अणभव लेगीत घेतात. मोबायल हें केन्नाच पुस्तकांक पर्याय जावपाक शकना. भुरग्यांक मोबायल दिल्यार तांकां फक्त म्हायती मेळटाच अशें ना. ताचे वांगडा इंटरनॅट संवसारांतले हजारांनी बुरशे अॅप तांच्या हातांत पावयल्यात. हाचे उरफाटे पुस्तक भुरग्यांक तांकां विचार करपाक, तांचे मदली संवेदनशिलता जागृत करपाक शिकयता, अशेंय सामंत हांणी सांगलें.
जिल्होधिकारी जातली : दुर्वा दैकर
कार्यावळी वेळार काणकोण म्हालांतली चित्रकला सर्तींतली जैतिवंत यत्ता पयलींतली दुर्वा दुर्गेश दैकर हिका मुख्यमंत्र्यान विचारलें, व्हड जातकच कोण जातली? त्या वेळार दुर्वान आपल्याक जिल्होधिकारी जावपाची आसा अशें सांगलें. ह्या वेळार मुख्यमंत्र्यान आपल्या कार्यालयांतल्या कर्मचाऱ्यांक तिका रोखडीच उत्तर गोंय जिल्होधिकारी कार्यालयांत घेवन वचपाक सांगलें. जिल्होधिकारी अंकीत यादव हांणी लेगीत तिका येवकार दिवन तिची वासपूस केली. जिल्होधिकारी जावचे खातीर शालेय शिक्षण, पदवी पुराय करून स्पर्धा परिक्षा दिवपाचो सल्लो तांणी दुर्वा हिका दिलो. तशेंच तांणी दुर्वा हिका कांय वेळ आपल्या कदेलाचेर बसपाची संद लेगीत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
