भांगरभूंय | प्रतिनिधी
तियात्र फामाद जावपाचें एक कारण जावन आसा, तातूंत आसता ती समाजीक कथा, कॉमेडी आनी वास्तवीक घडण्यां कडेन लागींचो संबंध. तियात्र पळेवप्यांक दिसता आपलीच कथा रंगमाचयेर चालू आसा आनी ते तातूंत धुंद जावन वतात. जायते पावटीं तांकां परतून त्या तियात्राचो आनंद घेयन दिसता आनी ते परत एक फावट तोच तियात्र पळेतात. अशे बरेच प्रेक्षक आसात जे सात- आठ फावटीं लेगीत एकूच तियात्र पळेतात. ते तियात्रांत अंतर्मुख जातात आनी पात्रांच्या प्रवाहांत व्हांवून तियात्रा कडें एकरूप जातात. हें तियात्राचें खाशेलेपण. म्हणून ह्या खाशेल्या लोकनाट्य प्रकाराची लोकप्रियता वाडल्या. अशेंच ह्या लोकप्रीय तियात्रांत एकरूप जाल्लें कलाकार अस्तुरी आंतोनेत दे सौजा. ताणें आपले तरनाटे पिरायेरूच तियात्र मळार नांव कांतयलें आनी ताच्या दोन तियात्रांचें पयलें पुस्तक हालींच उजवाडा आयलें. पयलो तियात्र ‘अवॉर्ड’ आनी दुसरो ‘मातयेचें भांगार’. हें पुस्तक ऍड्स प्रिंटर्सान छापलां आनी ऍड्स पब्लिकेशन्सान उजवाडायलां. ताका 116 पानां आसात आनी ताचें मोल 150 रुपया आसा. पुस्तकाचें कव्हर ऍलनीस जिजॅल लॉरेन्सो ह्या सुपुरल्या बायेन चित्रायलां. कव्हराच्या फाटल्या पानार पुस्तका विशीं थोडी म्हायती जाल्यार पुस्तकांत भितर बरोवप्याची वळख आसा. ह्या पुस्तका खातीर आंतोनेत दे सौजाक शाबासकी आनी परबीं.
फाटभूंय
आंतनेतान जायते तियात्र बरयले आनी तें खूब फामाद जालें. हे खातीर हेर टिचेरी आनी हेर तियात्र मोगी ताचे कडें तियात्र मागूंक लागलीं. तियात्र ताचे कडेन आशिल्ले पूण ते छापूंक नाशिल्ले. हे खातीर ताणें आपले तियात्र पुस्तक रुपान काडचें म्हण निर्णय घेतलो. पूण ताका वाट सांपडना जाली. तेन्ना ताच्या आधार- सहकाराक पावलो तो ऍड्स पब्लिकेशन्साचे धनी मॅल्वीन फेर्नांडीस. ताणें पुस्तक छापून दिवंक आनी तियात्र करूंक सोदतल्याक फायदो जावंचो म्हण सगळी जबाबदारी आपणाचेर घेतली. कितल्या तेंपान आंतोनेताचीं लागींचीं सोयरीं परदेसांतल्यान घरा आयिल्लीं आशिल्ली. तियात्र पुस्तक तयार जाता आनी घरचीं सांगाता आसात देखून हें पुस्तक तांचे हाजेरींतूच उजवाडावंक ताणें खटपट केली आनी आखरेक ताचें सपन पूर्ण जालें. हें पुस्तक कोणूय तियात्र करूंक फुडें सरतल्याक आधाराचें जावंक ताचो हावेस.
पुस्तकाचो गाभो
ह्या पुस्तकांतले दोनूय तियात्र भुरग्यां खातीर आसात. पयलो तियात्र ‘अवॉर्ड’. अवॉर्ड म्हणल्यार पुरस्कार. एका स्कुलांतली खबर ह्या तियात्रांत प्रदर्शीत जाता. धावेक पयलो येतल्याक आशिल्लो हो ‘अवॉर्ड’ कोणाक मेळटा जायत? शनाया एका गिरेस्त घराण्यांतलें आनी शिकूंक खूब हुशार चेडूं. दर वर्सा ताणें पयलें येवन आतां धावेक प्रवेश घेतला. तें मॅक्स नांवाच्या चेड्याचो गुप्तीं मोग करता. त्याच स्कुलांत आनीक एक हुशार चेडूं मादोना भर्ती जाता आनी मॅक्स ताचो गुप्तीं मोग करता. हो विनोदी खेळी-मेळीचो ‘लव ट्रांयगल’ तियात्र केळयता. परिक्षेंत सदां परीं धावेकूय शनायाच पयलें येता. अवॉर्ड शानायाकूच मेळटलो म्हण पत्रांचेर बी जाहीर जाता. पूण ताका तो ‘अवॉर्ड’ मेळटा? वा मदें आनीक कोण तयार जाता? मॅक्स आनी मादोनाचो मोग खंय पावता? भुरग्यां मदलीं प्रकरणां आंतोनेतान फिशालकायेन प्रदर्शन केल्यांत.
‘मातयेचें भांगार’ होवूय तियात्र भुरग्यांनी फुडें व्हेला. मात तांचे बराबर मुखेल भुमिकांनी दिसतात त्यो टिचेरी. दर टिचेरीक आपली म्हण कळाशी आसता. पूण तें कांय जणांक आवडना. तेन्ना दोग शिकोवप्या मदें सुरू जाल्लो संघर्श दाखयला. एकाच स्कुलांत शिकोवपी दुसऱ्या विशीं कसली भावना बाळगितात ताची बरी देख दिल्या. शिकोवपी आनी विद्यार्थ्यां मदलें नातें, शिकोवपी आनी शिकवप्यां मदलें नातें, स्कुलांत वातावरण कशें आसचें हाचेर उजवाड घाला. द्वेस आनी वायट वृत्ती मनशाक इबाडटा हाचेंय चित्रण अणभवूंक मेळटा. कुल्लेच्या सभावगुणाचें आंतनेतान प्रदर्शन केलां. ह्याय तियात्रांत विनोदी वातावरण आसा. भुरग्यां मदें भोव करून चेड्यां मदें तरनाट्यां शिकोवप्यां विशीं कसल्यो भावना आसतात ताचेंय दर्शन जाता. मनशान आपल्या जिवितांत दुसऱ्याचें बरें चिंतचें आनी जैत सताचें जाता हो संदेश मेळटा.
बरोवप्याचें उत्फर्के
पुस्तकाचें बरोवपी आंतोनेत दे सौजा आपल्या मनोगतांत म्हणटा, “तियात्र गोंयांतलो भोव नांवलौकीक नाट्यप्रकार जावन आसा. हांव ल्हानूच आसतना म्हाका तियात्राचीं आवड. आमच्या गांवच्या फेस्तांक दर वर्सा तियात्र पळेवंक मेळटाले आनी गांवचो तियात्र घडोवन हाडटात ते म्हाका कांतार करूंक संद दिताले. तशेंच नातालांच्या दिसांनी इगर्जे कडें आयोजीत प्रोग्रामांत नाटकुलें बरोवंक आनी माचयेर दाखोवंक मेळटालें. ल्हानूच आसतना ही उमेद आसली, ती आयज पासून चालूच आसा. तियात्राचो मोग काळजांत रिगलोलो पूण संदी जाय आसली तो मोग पसरावंक आनी लोका मदें प्रदर्शीत करूंक.”
खाशेलेपण
ह्या दोनूय तियात्रांनी आंतोनेतान भुरग्यांची वागणूक दाखयल्या. तें स्वता एक शिक्षक जाल्ल्यान ताणें लागींच्यान अणभविल्ले खीण तांतूंत दिश्टी पडटात. एक म्हत्वाची गजाल म्हणल्यार दोनूय तियात्रांनी भुरग्यांक बोध दिला, एक खडेगांठ संदेश दिला. शिक्षण क्षेत्र हें विद्येचें क्षेत्र आनी तातूंत वावूरतल्यांनी भुरग्यां बराबर आपणेंय बऱ्या गुणांचें प्रदर्शन करूंक जाय हाचो पाठ घालून दिला. तियात्रांत गरज थंय कांत (मोटवीं गितां) आसात.
तियात्रांतली भास
तियात्रांतली भास सुरबूस आसा. भुरग्यांक सोबता तसले संवाद आनी सगळें कितें प्रॅक्टीकल अशेंच दिसता. सगळ्या भुरग्यांच्या तोंडांत चालते संवाद आसात. कांय विनोदी भागांचोय तियात्रांत आस्पाव जाला.
सोंपयतना…
एक अस्तुरी, जेन्ना आपल्या वेवसाया बराबर दुसऱ्या क्षेत्रांत देंवता तेन्ना ती ‘मातयेचें भांगार’ करता आनी ‘अवॉर्ड’ जिखता. हें आंतनेत दे सौजान दाखोवन दिलां. ताचो हावेस आसा आपणा भशेन हेरूय तियात्र बरोवप्यांनी आपल्या तियात्रांचीं पुस्तकां छापचीं आनी फुडले पिळगेक आपले तियात्र प्रकार सांबाळून दवरचो, तशेंच जायत्या जणांक तियात्र बरोवंक येना पूण तांकां तियात्र माचयेर हाडपाची उमेद आसा. अशीं पुस्तकां आसलीं जाल्यार तांकां तियात्र करप सोंपें जातलें. देखून ताणेंय आपले सगळे तियात्र पुस्तक रुपान छापून हाडचे आनी हे मुखारूय बरयिल्ल्या तियात्रांचीं रोखडींच पुस्तकां छापून हाडचीं अशीच विनंती. हीच संद घेवन हेरूय तियात्रिस्तांक म्हजो उलो आसा, तुमीय तुमच्या तियात्राचीं पुस्तकां छापून हाडचीं. तियात्राक खूब उजळ फुडार आसा. परत एक फावट आंतोनेताक शाबासकी आनी परबीं.
विन्सी क्वाद्रुश
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
