भांगरभूंय | प्रतिनिधी
राजू पवार: वाळपय वॉव किड्स विद्यालयाचो इनामां भेटवण सुवाळो उमेदीन
वाळपय: भुरग्यांची सतत तोखणाय करप गरजेचें. भुरग्यां मदीं कुशळटाय आसता. पूण ही कुशळटाय विकसीत करपाचें काम पालकांनी आनी नागरिकांनी करचें. शाळेंत कुशळटाय वाडोवपाक सतत यत्न चालू आसतात. भुरग्यांक तोखणाय जाय. अशें केल्यार भुरग्यांची उदरगत नेटान जावंक शकता अशें दिवचल म्हाल खेळां अधिकारी राजू पवार हांणी म्हणलें.
वाळपय हांगच्या वॉव किड्स ह्या पुर्व मुळाव्या विद्यालयाच्या वर्सुकी इनामां भेटवण सुवाळ्याक पवार हे मुखेल सोयरे म्हणून उलयताले.
वाळपय हनुमान विद्यालयाच्या लागसारा आयोजीत कार्यावळीक सरकारी माध्यमीक विद्यालयाचे निवृत्त मुख्याध्यापक आर. के. कांबळे, विद्यालयाचे वेवस्थापन समितीचे मुखेली विजय खांडेकार, विभाग मुखेली करिष्मा खांडेकार, विद्यालयाची शिक्षिका नंदिनी आरोलकार, नंदिता धुरी आनी हेर हाजीर आशिल्ले.
सुरवातेक माचयेर हाजीर आशिल्ल्या मानेस्तांक फुलांचो तुरो भेटोवन येवकार दिलो. विद्यार्थ्यांनी गायिल्ल्या येवकार गीतान कार्यावळ सुरू जाली.
आर. के. कांबळे हांणी शाळेंत भुरग्यांक धाडल्या उपरांत तांची जापसालदारकी जरी शिक्षकांची आसली तरी पालकांनी भुरग्यांचेर बारकायेन लक्ष दिवप गरजेचें अशें तांणी म्हणलें.
विजय खांडेकार हांणी ह्या वेळार आपले विचार मांडले. करिष्मा खांडेकार हांणी पुराय वर्साचो अहवाल सादर केलो. ह्या वेळार फाटल्या वर्सा आयोजीत केल्ल्या विवीध उपक्रमांचीं इनामां मानेस्तां हस्तुकीं भेटयलीं.
भुरग्यांनी मनरिजवण आनी सांस्कृतीक कार्यावळी सादर केल्यो. पुराय कार्यावळीचें सुत्रसंचालन नंदिनी आरोलकार आनी नंदिता धुरी हांणी केलें. निमाणें राष्ट्रगीतान कार्यावळ सोंपली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
