भांगरभूंय | प्रतिनिधी
सरिता गांवकार: ठाणे सरकारी माध्यमीक विद्यालयांत जाली जनभागिदारी कार्यावळ
वाळपय: भुरग्यांची बौध्दीक तांक समृध्द करपाक जाय जाल्यार विवीध कार्यावळी घडोवन हाडप गरजेचें. नव्या शिक्षणीक धोरणाक लागून भुरग्यांच्या बौध्दीक उदरगतीचो मार्ग मेकळो जाला. अणभवांतल्यान शिकपाची नवी संकल्पना रुजपाक लागल्या. देखून येवपी काळांत बौद्धीक नदरेन भुरगीं बरे तरेन समाजांत काम करपाक शकतात अशें ठाणे पंचायतीची सरपंच सरिता गांवकार हांणी म्हणलें.
ठाणे हांगच्या स. हिरोजीराव बाबुराव देसाय सरकारी माध्यमीक विद्यालयांत जी-20 जनभागिदारी कार्यावळी खाला NEP-‘2020 मुळावें शिक्षण’ ह्या विशयाचेर सत्तरी म्हाल मर्यादीत वक्तृत्व सर्त जाली. ह्या वेळार गांवकार मुखेल सोयरी ह्या नात्यान उलयताली.
पालकांनी भुरग्यांक प्रेरणा दिवप गरजेचें. तशेंच तांकां शाबासकी दिवप म्हत्वाचें. तेन्नाच आमचीं भुरगीं बरे तरेन पर्जळपाक शकतात. खुबश्या मळा वरवीं भुरगीं फुडें सरपाक शकतात. पूण ते खातीर शिक्षणाची बुन्याद घटमूट जावप गरजेचें. ताका लागून 3 ते 8 वर्सां म्हत्वाचीं आसा. हें शिक्षण भुरग्यांचे माय भाशेंत जावप गरजेचें, अशें सरीता गांवकार हांणी फुडें म्हणलें.
ह्या वेळार उपसरपंच तनया गांवकार, पंच वांगडी अनुष्का गांवस, पंच सुरेश आयकार, पंच सुभाष गावडे, मुख्याध्यापक काशिनाथ नायक, शाळा वेवस्थापन समितीचे अध्यक्ष फटगो गांवकार, ज्येश्ठ शिक्षक गणेश गावडे, शाळा वेवस्थापन समितीची स्मिता कदम, शकुंतला सावर्शेंकार पदाधिकारी आनी पालक हाजीर आशिल्ले.
मुख्याध्यापक काशिनाथ नायक हांणी आपल्या प्रास्थाविकांत सांगलें, नव्या शिक्षणीक धोरणाक लागून भुरग्यांची बौद्धीक उदरगत चालीक लागतली. कृती वरवीं शिक्षण, कलेंतल्यान, खेळांतल्यान, अणभवांतल्यान शिक्षण हें म्हत्वाचें आसता. अणभवांतल्यान मनीस शिकता. तशेंच अणभवांतल्यान विद्यार्थी लेगीत बरे तरेन शिक्षण घेवपाक शकतात, अशें तांणी म्हणलें.
ह्या वेळार आयोजीत सर्तींत पयलें इनाम वैभव सावंत (अवरलेडी लुडर्स हायस्कूल, वाळपय) आनी दुसरें इनाम ललीत गांवकार (सरकारी माध्यमीक हायस्कूल सावर्डे) हांकां फावो जालें. परिक्षक म्हणून गणेश गावडे हांणी काम पळयलें.
कार्यावळीचें सुत्रसंचालन मिनाक्षी गांवस हांणी केलें. उपकार गणेश गावडे हांणी मानले. मिरा म्हांबरे, सुमित्रा कदम, साईश नायक हांणी विशेश सहकार्य केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
