भांगरभूंय | प्रतिनिधी
समिक्षा गांवसः वाळपय हनुमान मुळाव्या विभागांत विवीध सर्ती
भांगरभूंय । प्रतिनिधी
वाळपयः ल्हान पिरायेंतूच भुरग्यांनी आपली संस्कतीचें ज्ञान आपणावपाची गरज आसा. आयज बदलते जिणेशैलीक लागून रासवळ कुटुंब पद्दती बदलता. ताका लागून कांय प्रमाणांत एकठांय येवन मनयताले ते उत्सव काळाच्या पड्ड्या फाटल्यान वतना दिसतात. आमची संस्कृती तिगोवचे खातीर एकठांय येवन सण, उत्सव मनयात. दिवाळी ही काळखा पासून उजवाडा वटेन व्हरपी सण. ताका लागून आमच्या आंगांत आशिल्लो काळोख पयस करून उजवाडाचीं दारां उक्तीं करात, अशें वाळपयच्या ङी हनुमान मुळाव्या विभागाची शिक्षिका समिक्षा गांवस हांणी सांगलें. शाळेंत दिवाळी निमतान आयोजीत केल्ले कार्यावळींत ती भुरग्यांक मार्गदर्शन करताली.
ह्या वेळार माचयेर शिक्षिका राजश्री नायक, पालक शिक्षक संघाचे अध्यक्ष गंगाराम पावणे, गणपत नेने, शिक्षिका रुपा पधे, सत्यवान गांवकार, सुधीर गांवकार हाजीर आशिल्ले.
ह्या वेळार समिक्षा गांवस हांणी दिवाळीची म्हायती आनी नरकासूर वधाची काणी भुरग्यांक सांगली.
दिवाळे निमतान शाळेंत भुरग्यां खातीर विवीध सर्ती घेतिल्ल्यो. तातूंत यत्ता पयली खातीर कापसा पासून वाती करप, यत्ता दुसरी खातीर शुभेत्सा कार्ड आनी आकाशदिवो तयार करप, यत्ता तिसरी खातीर पणती रंगोवप, यत्ता चवथी खातीर आकाशदिवो करपाचे सर्तीचो आस्पाव आशिल्लो.
विद्यार्थ्यांनी ढोल ताशांच्या तालाचेर शाळेच्या मैदानाचेर ताल धरीत नरकासूराचो बावलो नाचयलो तशेंच विहान विश्वनाथ रेवंडेकार हांणी श्रीकृष्णाच्या भेसांत नरकासूराचो वध केलो.
काळोखाचेर जैत म्हूण शिक्षक, पालक आनी विद्यार्थ्यांनी पणट्यो पेटयल्यो आनी रांगोळी घातली.
ते उपरांत भुरग्यांक खास दिवाळीची फराळ दिलो. ह्या वेळार पालक व्हड संख्येन हाजीर राविल्ले. शिक्षक सत्यवान गांवकार हांणी सुत्रसंचालन केलें जाल्यार सुदीर गांवकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
