भांगरभूंय | प्रतिनिधी
मडगांव : राज्यांतल्यो शाळो एप्रील सावन सुरू करपाचो निर्णय शिक्षण खात्यान घेतला. पालकां कडल्यान विरोध जावन लेगीत हो निर्णय फाटीं घेनात. ह्या गिमाच्या दिसांनी पडपी वताक लागून तरणाट्यांक लेगीत त्रास जाता. हाका लागून भुरग्यांक शाळेंत धाडून, वर्गांत गरमेंत बसोवप योग्य आसा व्हय? हाचो विचार करीत हो निर्णय फाटीं घेवपाची गरज आसा, अशें आमदार विजय सरदेसाय हांणी म्हणलें.
गोवा फॉरवर्डचे अध्यक्ष आमदार सरदेसाय हांणी मडगांवच्या रवींद्र केळेकार ज्ञानमंदिर शाळेक अचकीत भेट दिली. तांचे वांगडा दुर्गादास कामत आनी प्रशांत नायक आशिल्ले. थंयच्या मदले सुटयेंतल्या खाणाची तपासणी केली. भुरग्यां वांगडा बसून खाणाचो आस्वाद घेतलो. आमदार सरदेसाय हांणी भुरग्यां कडेन संवाद सादून जेवणा विशीं मत जाणून घेतलें तेन्ना घरांतल्या जेवणा भशेनूच ताची रूच आशिल्ल्याचें भुरग्यांनी सांगलें.
आमदार सरदेसाय हांणी उपरांत सांगलें, राज्यांतल्यो थळाव्यो स्वयंसेवी बायलां बचत गट बरें जेवण भुरग्यांक दिता. अशें आसून लेगीत राज्य सरकार अक्षयपात्र येवजणेक कित्याक फाटबळ दिना? सरकारचो हेतू अक्षयपात्राक सुवात दिवन हे येवजणेंतल्यान थळाव्या बचतगटांक कुशीक करपाचो आसूं येता. अक्षयपात्र प्रमाण थळाव्यो बायलो बचत गट देणग्यो एकठांय करिनात, हो विशय विधानसभेंत मांडटलों अशेंय सरदेसाय हांणी म्हणलें.
एप्रील सावन सुरु जावपी शाळां विशीं उलयतना, ह्या निर्णयाचेर परत विचार जावपाची गरज आशिल्ल्याचें तांणी म्हणलें. शिक्षण खातें खंयच्या आदारार निर्णय घेता हेंच समजना. ग्लोबल वॉर्मिंगचो परिणाम दिसपाक लागला. मार्च म्हयन्यांत हवामान खातें उश्णताय वाडपाची शिटकावणी दिता. अश्णतायेचें ल्हार येवपाची शक्यताय आसतना ल्हान भुरग्यांक शाळेंत बसोवन सरकार खंयचो हेतू सादोवपाचो यत्न करता काय? हें सरकारान लोकांक सांगपाची गरज आसा. एसीचे कुडींत बसून सरकारान हे निर्णय घेवचे न्हय. ह्या प्रस्नाचेरूय विधानसभेंत आवाज काडटलों अशें सरदेसाय हांणी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
