भांगरभूंय | प्रतिनिधी
सलोनी गांवकार: शेळप खुर्द माध्यमीक विद्यालया वतीन नितळसाण मोहीम राबयली
वाळपय: शाळेंत शिकपी भुरग्यांक नितळसाणेचें गिन्यान उपलब्ध जावप गरजेचें. तांकां हे विशीं लोक जागृताय निर्माण करपा खातीर संद दिवप खूब गरजेचें. शाळेंत अशें तरेचे उपक्रम सतत घडोवन हाडल्यार भुरग्यां मदीं उत्सुक्ताय निर्माण जावन ते नितळसाणेक विशेश म्हत्व दिवपाक शकतले, अशें शेळप खुर्द सत्तरी हांगचे पंचायत वांगडी सलोनी गांवकार हांणी सांगलें.
शेळप सरकारी माध्यमीक विद्यालया वतीन आयोजीत केल्ले नितळसाण मोहिमेचे कार्यावळीक ती उलयताली. ह्या वेळार शाळेच्या भुरग्यांनी गांवांत भोंवून व्हडा प्रमाणांत नितळसाण मोहीम राबयली. हातूंत व्हडा प्रमाणांत भुरग्यांनी वांटो घेतिल्लो. तशेंच विद्यालयाच्या शिक्षकांनीय हातूंत विशेश वांटो घेतलो.
सलोनी गांवकार हांणी फुडें सांगलें, देशाचे प्रधानमंत्री नरेंद्र मोदी हांणी नितळसाण मोहिमेचेर सतत भर दिवपाचो उलो मारला. कारण नितळसाणे वरवीं सैमाची राखण जाता. ताका लागून शाळेंत अशे तरेचे उपक्रम सतत घडोवन हाडचे अशी मागणी तांणी केली. पंचायती वतीन आयोजीत अशे तरेच्या उपक्रमांक उर्बा दितले. हे खातीर शाळेन आनी भुरग्यांनी फुडाकार घेवचो अशीय मागणी तांणी केली. तेच प्रमाण फुडल्या काळांत वाठारांतल्या उदरगतीच्या कामांक प्राधान्य दितले. ह्या वाठाराचे आमदार आनी भलायकी मंत्री विश्वजीत राणे हांणी ह्या वाठारा कडेन खाशेलें लक्ष दिलां. खोतोडा पंचायतीचे उदरगतीचेर लक्ष दिवपाच्या हेतान तांणी आराखडो निश्चीत करपाक सुरवात केल्या. येवपी काळांत विवीध उदरगतीच्या कामां वरवीं नागरिकांक म्हायती मेळटली अशें तिणें म्हणलें.
ह्या वेळार सरकारी माध्यमीक विद्यालय शाळेची मुख्यध्यापिका रंजीता प्रभू, विद्यालयाचे पालक शिक्षक संघाचे अध्यक्ष रोहिदास गांवकार, सुषमा गावडे, सनील सावंत, प्रजल गांवस, सर्वदा देसाय हाजीर आशिल्ले.
मुख्याध्यापिका रंजिता प्रभू हांणी, विद्यालयांत खूबशे उपक्रम आयोजीत करतात. ताका नागरिकांचें आनी पालकांचें सहकार्य मेळतूच आसता. येवपी काळांतूय अशेच तरेच्या उपक्रमां वरवीं विद्यालयाची आनी गांवची उदरगत चालीक लागतली. हे खातीर पंचायत नागरीक आनी पालकांनी बरे तरेचें सहकार्य करपाची मागणी तिणें केली.
सुरवातेक माचयेर हाजीर आशिल्ल्या मानेस्तांक फुलांचो तुरो भेटोवन येवकार दिलो. उपरांत विद्यालयाचीं भुरगीं, शिक्षक, पालक शिक्षक संघाचे वांगडी आनी नागरिकांनी गांवांत भोंवून नितळसाणेची मोहीम हातांत घेतली. ह्या वेळार तांणी दरेका वाठारांत भोंवून सगळे तरेचो कोयर एकठांय केलो.
हो कोयर पंचायती कडेन दिवपाचो आशिल्ल्यान, उपरांत त्या कोयराचो विलो लावपाची प्रक्रिया हातांत घेतले अशें आयोजकांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
