भांगरभूंय | प्रतिनिधी
सादुरताय बाळगुची; वास्को पुलिसांचें लोकांक आवाहन
भांगरभूंय । प्रतिनिधी
वास्को: भुरग्यांक उबारून व्हरतात अश्यो वावड्यो पातळटात, पूण भुरग्यांक उबारून व्हेल्ल्याची एकूय कागाळ गोंयांत नोंद जाल्ली ना. ताका लागून पालकांनी गरजे भायर भियेवचे न्हय अशें आवाहन वास्को पुलिसांनी केलां. पालकांनी समाजीक उपद्रवा पसून आपल्या भुरग्यांचे सुरक्षीतताये विशींची सादुरताय जरूर बाळगुची अशें स्पश्ट केलां.
सदांच व्हड गर्दी आशिल्ल्या वास्को पोरण्या बस स्टॅण्डा मुखा वयल्या रस्त्या वयल्यान वचपी एका 12 वर्सां पिरायेच्या भुरग्याचें अपहरण जायत आशिल्ल्याचें समजतकूच लोकांनी मंगळारा सांजवेळार एका मनशाक येथिश्ट बडयलो. एका तरणाट्यान बडी हाडून त्या मनशाक मारपेट केली. पुलीस त्या मनशाक उबारून वाहनांत दवरतना लेगीत कांय जाण ताका मारपेट करताले.
त्या मनशाचें नांव धेन जोन्स (52) अशें आसून तो पुद्दुचेरीचो रहिवाशी आसा. ताचें मानसीक संतुलन इबाडिल्ल्याचें दिसून आयिल्ल्यान ताका दोतोरांच्या सल्ल्यान मानसोपचार आनी मानवी वर्तवणूक संस्थेंत उपचारा खातीर दाखल केला. हे घडणुकेचे पडसाद शार आनी वाठारांनी उमठले. पालकांक आपल्या भुरग्यांचो हुस्को दिसूंक लागला. पालकांनी भियेवचे न्हय, वावड्यांचेर विस्वास दवरचो न्हय अशें आवाहन पुलिसांनी केलां. पूण पालक त्या आवाहनाक प्रतिसाद दिवपाचे मनस्थितींत नात. कांय जाण आपल्या भुरग्यांक पावोवपा खातीर आनी हाडपा खातीर स्वता शाळेंत गेल्ले. एकूण पालकां मदीं भिरांत पातळिल्ल्याचें दिसून आयलां.
हांगा कांय दिसां सावन कांय समाज माध्यमांचेर भुरग्यांक उबारून व्हरपी टोळी कार्यरत आशिल्ल्याचो व्हिडियो आनी खबर व्हायरल जायत आसा. ताका लागून चर्चा सुरू आशिल्ली. पूण मंगळारा जाल्ल्या तथाकथीत अपहरण घडणुकेक लागून पालकां मदीं भिरांत वाडल्या. पालकांनी गरजे भायर भियेवचे न्हय हे खातीर पुलिसांनी कांय शाळे भोंवतणी वाहनान गस्त घालपाक सुरवात केल्या. एखाद्या विशीं दुबाव आयलो जाल्यार कायदो हातांत घेवन ताका मारपेट करची न्हय. त्या दुबाविताक पुलिसां कडेन सोंपोवचें अशें आवाहन पुलिसांनी केलां.
भुरग्यांक उबारून व्हरतात ही वावडीः अभिषेक धानिया
मडगांव: सान पिरायेच्या भुरग्यांक उबारून व्हरपी टोळी गोंयांत भोंवता अश्यो बातम्यो सोशल मिडिया वयल्यान व्हायरल जातात, पूण फाटल्या दोन वर्सांत भुरग्यांक चोरून व्हरपाची एकूय कागाळ गोंयच्या खंयच्याच पुलीस स्टेशनाचेर नोंद जावंक ना. अशो बातम्यो गोंयांतूच न्हय जाल्यार उत्तर प्रदेशांत, बिहारांत आनी महाराष्ट्रांत व्हायरल जाल्यात. लोकांनी आपल्या भुरग्यांची काळजी घेवची आनी सतर्क रावचें अशें आवाहन पुलीस अधिक्षक अभिषेक धानिया हांणी पत्रकार परिशदेंत उलयतना केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
