भांगरभूंय | प्रतिनिधी
डॉ. गांवकार: कला वैभव संस्थेचो 10वो वर्धापन दीस उमेदीन मनयलो
सांगे : गोंयची कला संस्कृती तिगून उरची हे नदरेन ल्हान भुरग्यांक माची दिवन तांच्या कलागुणांक वाव दिवप गरजेचें. हें काम फाटल्या 10 वर्सां सावन कला वैभव संस्था करता. ही तोखणाय करपा सारकी गजाल आशिल्ल्याचें दक्षीण शिक्षणीक झोनाचे उपसंचालक डॉ. उदय चेपो गांवकार हांणी सांगलें.
कला वैभव संस्थेच्या 10व्या वर्धापन दिसा सांगेच्या गुरुकुल सभाघरांत आयोजीत केल्ल्या कार्यावळीक डॉ. गांवकार मुखेल सोयरे म्हणून उलयताले. ह्या वेळार माचयेर मानाचे सोयरे म्हणून साहित्यीक मॅथ्यु डिकोस्टा, नगरसेवक इकबाल सय्यद, संस्थेचे अध्यक्ष संदीप मापारी हाजीर आशिल्ले. डॉ. गांवकर हांणी फुडें उलयतना म्हणलें, संस्थेचे अध्यक्ष संदीप मापारी हे कोंकणी तशेंच साहित्य मळार वावुरता. ताणें आयज मेरेन कितलेशेच कलाकार घडयले. ताका लागून हे संस्थेक येस फावो जालां अशें सांगून तांणी सगळ्या वांगड्यांक परबीं भेटयलीं.
कला वैभव संस्था कला संस्कृतीची बुन्याद घट करपाचें काम निसुवार्थीपणान करता. भुरगीं आमचो फुडार. तांकां ल्हान पिरायेरूच माची मेळ्ळ्यार कितलेशेच कलाकार घडटले आनी आपले कले वांगडा गांवचें तशेंच गोंयचें नांव परजळटले, अशें नगरसेवक सय्यद ईकबाल हांणी म्हणलें.
ह्या सुवाळ्याक सांगें, केपें, धारबांदोडें म्हाल मर्यादीत अभिनय सर्तीचें आयोजन परंपरीक दिवली पेटोवन केलें.
हे सर्तींत अभिनय अ गटांतलें पयलें इनाम वृता नित्यानंद नायक, दुसरें प्रेक्षा संजय मापारी, जाल्यार तिसरें वैभवी संदीप मापारी हांकां फावो जालें. अभिनय ब गटांत पयलें इनाम दित्त्या दुर्गेश शिरवंयकार, दुसरें श्रीशा राजेश बोरकार जाल्यार तिसरें सौरवी विनोद नायक हांकां मेळ्ळें. तशेंच
सांगें म्हाल मर्यादीत चित्रकला सर्तीचें पयलें इनाम कविश व्ही. देविदास, दुसरें कृती के. देसाय, जाल्यार तिसरें सौरवी विनोद नायक हांकां फावो जालें.
अभिनय सर्तींचें परीक्षण ज्ञानेश्वर नायक आनी ज्यस्तियानो फर्नांडीस हांणी केलें. ह्या वेळार सुटके झुझारी सदानंद नाडकर्णी हांचो भोवमान केलो. तशेंच अध्यक्षां हस्तुकीं मानेस्तांक भेटवस्त भेटयली. संस्थेचे अध्यक्ष संदीप मापारी हांणी येवकार दिलो. सुत्रसंचालन सुनील देसाय जाल्यार उपकार कार्यावळ संयोजक सतीश देसाय हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
