भांगरभूंय | प्रतिनिधी
पणजी : भुतानी प्रकल्पाक 2007 वर्सा मान्यताय मेळ्ळी आसली तरी नोटीस दिवपाक सरकाराक इतलो कळाव कसो जालो? असो प्रस्न काँग्रेस विधीमंडळ फुडारी युरी आलेमांव हांणी केलाे. प्रकल्पा खातीर खाजगी रानां वाठार रद्द करपाचो निर्णय कोणी घेतलो, हाची चवकशी करपाची मागणी युरी आलेमांव हांणी केल्या.
भुतानी प्रकल्पाक नगर नियोजन तशेंच पीडीएन नोटीस जारी केल्या. हे नोटिशी उपरांत न्यायालयांत वचपाचो पर्याय कंपनी कडेन आसा. हाचे पयली अशें प्रकार जाल्ले आसा, अशें युरी आलेमांव हांणी सांगलें. भुतानी प्रकल्प राज्यांत हाडपाक कोणाचें भूत आसा, हाची चवकशी जावपाक जाय.
भुतानी प्रकल्पा आड काँग्रेस पक्षान आवाज उठयिल्लो. हाचे पयली लेगीत मेगा प्रकल्पांक काँग्रेस पक्षान विरोध केला. विरोध आसताना लेगीत सरकारान नोटीस जारी करपाक बरोच कळाव केलो. रस्त्या खातीर दोंगर कापपाक सुरवात जाली तेन्नाच सरकारान कारवाय करपाची गरज आसली, अशें युरी आलेमांव हांणी म्हणलें.
मांडवी न्हंयेत आनीक एक कॅसिनो हाडपाचे यत्न सुरू आसात, असो आरोप युरी आलेमांव हांणी केलो.
कायदेशीर सल्लो घेवन फुडले पावल : आमदार आंतोनियो वाज
भुतानी प्रकल्प हाडपाक थळावो आमदार म्हूण म्हजी कसलीच भुमिका ना. हांवे पयलीं सावन प्रकल्पाक विरोध केला. सरकारान प्रकल्पाक नोटिसो जारी केले उपरांत कायदेशीर सल्लो घेवन हांव फुडली कृती करतलो, अशें आमदार आंतोनियो वाज हांणी सांगलें.
सांकवाळ पंचायतीन बांदकाम परवानो रद्द करचो, अशें पत्र पंचायतीक बरयलां. मुख्यमंत्री डॉ. प्रमोद सावंत हांचे लागी हांवे चर्चा केल्या, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
