भुतानीचे परवाने नेमा प्रमाण नासल्यार रद्द करचे

भांगरभूंय | प्रतिनिधी

-मुख्यमंत्र्यांचे नगर नियोजन मंत्र्यांक स्पश्ट निर्देशपणजी : दोंगर कातरप आनी झाडांच्या कापणे खातीर वादांत आशिल्ल्या भुतानी इन्फ्रा प्रकल्पाच्या परवान्यांची तपासणी करपाचे निर्देश मुख्यमंत्र्यांनी नगर नियोजन मंत्र्यांक दिल्यात. परवाने नेमाक धरून नासल्यार ते रद्द करपाचे निर्देश दिल्यात. हाका लागून सांकवाळचो नियोजीत भुतानी प्रकल्प आतां संकश्टांत आयला.

फांटले काय दीस भुतानी प्रकल्पाक लागून राज्यांत बोवाळ सुरू आसा. प्रकल्पाक लोकांचो विरोध जायत आसतना सनद आनी परवान्या वेल्यान राजकी पक्षां मदीं आरोप प्रत्यारोप सुरू आसात. हे फाटभुंयेर सगळे परवाने तपासपाचे निर्देश दिल्ल्याची म्हायती मुख्यमंत्री डॉ. प्रमोद सावंत हांणी दिली.

भुतानी प्रकल्पाचें प्रकरण 2007 सावन सुरू आसा. समाज माध्यमाचेर व्हायरल जावपी विडीयोंतल्यान म्हाका सगळी म्हायती मेळ्ळी. भुतानी प्रकल्पाक दिल्लो परवानो, रुपांतरणाची सनद, पर्यावरणी दाखलो सारको आसा काय ना, हाची तपासणी करपाचे निर्देश दिल्यात. जर परवानो नेमाक धरून नासत, जाल्यार परवाने रद्द जातले. पर्यावरणाचें लुकसाण करपी वा लोकांक संकश्टांत घालपी प्रकल्प राज्याक नाका, अशें मुख्यमंत्री डॉ. प्रमोद सावंत हांणी म्हणलां.

मेगा प्रकल्पांचे प्रस्ताव मुख्यमंत्र्यां कडेन येनात. नगर नियोजन खात्याची सुकाणू समिती प्रकल्पांचेर निर्णय घेता. हाचे फुडें मेगा प्रकल्पांचे सगळे प्रस्ताव मुख्यमंत्र्यांक धाडपाचे निर्देश नगर नियोजन मंत्र्यांक दिल्यात. मेगा प्रकल्पांचो संबंद उदक, सीवरेज, वीज अशा तरेकवार खात्यां कडेन येता. हो विशय बऱ्याच खात्यां कडेन संबंदीत आशिल्ल्यान प्रस्ताव मुख्यमंत्र्यां कडेन येवपाक जाय. नगर नियोजन मंत्र्यांक हांवे आदेश दिल्यात, अशें मुख्यमंत्री डॉ. प्रमोद सावंत हांणी सांगलें.

भुतानी प्रकल्पाक लोकांचो विरोध आसलो. कांय दिसां पयली काँग्रेसीन लेगीत सांकवाळ वाठाराक भेट दिवन प्रकल्पाक विरोध उक्तायलो. हाका लागून हे प्रकरण तापपाक सुरवात जाली.

भाजप कार्यकारिणी बसकेत चर्चा

बिरेस्तारा भाजप कार्यकारिणीची बसका जाली. हे बसकेंत भुतानी प्रकल्पाचेर चर्चा जाली, अशी म्हायती आमदार मायकल लोबो हांणी दिली. प्रकल्पाक 20 हजार चौखण मिटरा परस चड बांदकाम आसले जाल्यार पर्यावरणी दाखलो घेवचो पडटा. पर्यावरणी दाखलो तपासपाची मागणी हांवेन मुख्यमंत्र्यां कडेन केल्या. दोंगर कापणी खातीर नगर नियोजन कायद्याचें कलम 17 लागू जाता. हो परवानो तपासपाची गरज आसा. तशेंच हो व्हड प्रकल्प आशिल्ल्यान घाणयाऱ्या उदकाची समस्या आसा. भुतानी सारके व्हड प्रकल्प राज्याक परवडपा सारके नात, अशें हांवे मुख्यमंत्र्यांक सांगल्याचे मायकल लोबो हांणी सांगलें.

भुतानी प्रकल्पाच्या मान्यताये वेल्यान आरोप – प्रत्यारोप सुरूच आसात. ह्या प्रकल्पाक 2007 वर्सा मान्यताय दिल्याची चर्चा आसा. काँग्रेसीचे सरचिटणीस सुनील कवठणकार हांणी कागदपत्रांच्या आदारान भाजप सरकाराच्या काळांत प्रकल्पाक मान्यताय मेळिल्ल्याचो दावो केला.