भांगरभूंय | प्रतिनिधी
चिदंबरमः ओटीटीक लागून कथा सांगपाची मेळ्ळी संद
भांगरभूंय । खबरां मेज
पणजीः प्रत्यक्ष भुंयारांत शुटीं करप कठीण आशिल्ल्यान कोचीच्या एका गुदांवांत भुंयाराचो सेट उबो केलो. भुंयाराच्या खाशेलपणांचेर बारीक लक्ष दिवचें पडलें. भुंयार हेंच चित्रपटाचें मुखेल पात्र आशिल्लें. आपल्याक ह्या भुंयाराचो वास पड्ड्या मेरेन पावोवपाचो आशिल्लो अशें दिसता, अशें दिग्दर्शक चिदंबरम हांणी सांगलें.
इफ्फीच्या पॅनोरमा विभागांत सोमारा ‘मंजुम्मल बॉयज’ हो बचाव नाट्याचो थरार आशिल्लो मल्याळम चित्रपट दाखयलो. गोंयच्या पत्र सुचना कार्यालयाच्या मिडिया सेंटरांत सव्या दिसाच्या उक्तावणाच्या पत्रकार परिशदेंत चिदंबरम उलयतालो.
चित्रपटाची कथा वास्तवीक जिवितांतले घडणुकेचेर आदारीत आसात. केरळांतल्या कोची लागसार मंजुल्लम गांवांतल्या 11 मल्याळी तरणाट्यांचो पंगडाचो हातूंत आस्पाव आसा. हो पंगड तामीळनाडूंतल्या कोडाईकनाल वाठारांतल्या डेव्हिल्स किचन, जाका गुना केव्हज म्हूण वळखतात थंय गेल्लो. अभिनेतो कमल हासन हाच्या ‘गुना’ चित्रपटाचे शुटींगे उपरांत ह्या भुंयारांक प्रसिद्धी फावो जाल्ली. हो पंगड थंय गेल्लो तेन्ना एक वांगडी अचकीत ह्या भुंयारांतल्या खोल देगणांत पडलो. जेन्ना थळावे पुलीस आनी उजो पालोवपी दळान लेगीत आस्त सोडली तेन्ना सिजू डेव्हीड हो तरणाटो आपल्या इश्टाक वाटावपा खातीर मुखार आयलो. ताणें एक धाडसी मोहीम हातांत घेतली. इश्टागत आनी धिटाय दाखोवपी ही घडणूक मंजिम्मेलच्या ह्य 11 तरणाट्यांच्या धाडसाची गवाय दिता. चिदंबरम हाणें सांगलें, हो चित्रपट जे घडणुकेचेर आदारीत आसा, ती खूब फामाद. एका दसका आदीं एका वेगळ्या पंगडान हाचेर चित्रपट तयार करपाचो यत्न केल्लो, पूण त्या वेळार चित्रपट उद्देगाची अशे कथेंत गुंतवणूक करपाची तयारी नाशिल्ली. ते उपरांत मल्याळम चित्रपट उद्देग विकसीत जालो. ओटीटी प्लॅटफॉर्म आयिल्ल्यान अश्यो कथा सांगपाची चड संद उपलब्ध जाल्या, अशें चिदंबरम हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
