भुंयपुतांच्या वेवसायांत राजकी मनशांची आडखळ

भांगरभूंय | प्रतिनिधी

जनार्दन भंडारीः त्रास दिवपाचे बंद करात, नाजाल्यार आंदोलनाक फुडो करात

भांगरभूंय । प्रतिनिधी

काणकोण/ मडगांवः ‘आत्मनिर्भर भारत, स्वयंपूर्ण गोंय’ येवजणे खाला काणकोणां गाडे चलोवपी भुंयपुतांक सत्ताधारी पक्षाचे फुडारी राजकी सूड भावनेन त्रास दितात, असो आरोप काँग्रेस पक्षाचे फुडारी जनार्दन भंडारी हांणी केला. हे प्रकार बंद केले नात जाल्यार आंदोलन करतले, अशी शिटकावणी तांणी दिल्या.

जनार्दन भंडारी हांच्या फुडारपणा खाला स्वाभिमानी जागृत काणकोणकार आनी जनसेना वॉरियर्स हांणी सोमारा काणकोणचे मुख्य अधिकारी मधू नार्वेकार हांकां ह्या मुद्द्या वयल्यान घेराव घातलो.

शिकिल्ल्या तरणाट्यांक त्रास जातात हे खातीर काणकोण काँग्रेस परिवार आनी जनसेवा वॉरियर्स संघटणेन मुख्यमंत्री, हेर मंत्री तशेंच विवीध सरकारी अधिकाऱ्यांक निवेदनां दिल्यांत.

काणकोणचे भुंयपूत हातगाडे घालून ल्हान वेवसाय करतात आनी आपलें पोट भरतात. मात सत्ताधारी पक्षाचे राजकी फुडारी तांकां सतायतात. कोरोना म्हामारी उपरांत सरकारान गोंयांत 1 ऑक्टोबर 2021 ह्या दिसा राज्यांतली अर्थीक उलाढाल वाडोवचे खातीर आनी गांवच्यो लोकांक स्वावलंबी करचे खातीर तशेंच रोजगाराच्यो वाटो उक्त्यो  करचे खातीर ‘आत्मनिर्भर भारत, स्वयंपूर्ण गोंय’ येवजण सुरू केल्ली. मात आतां अशें दिसता, सत्ताधारी पक्षांतले राजकी फुडारी स्वताच्या सरकाराचे संकल्पनेंत आडखळ हाडपाचो यत्न करतात. तेच खातीर ते थळाव्या तरणाट्यांच्या फाटल्यान लागल्यात. तांणी तांचो वेवसाय बंद करचो हे खातीर तांची सतावणूक करतात, अशें भंडारी हांणी सांगलें.

निवेदनांत एका प्रकरणाचेर उजवाड घातला. पाळोळें दर्यादेगेर हातगाडो सुरू करपी एका थळाव्या तरणाट्याचेर अन्याय जाला. तो तरणाटो काणकोणच्या विवीध उदरगतीच्या वावरांत सदांच मुखार आशिल्लो. तशेंच काणकोणच्या बऱ्या खातीर विवीध आंदोलनांनी वांटो घेतिल्लो. मात दुर्दैवान तो सत्ताधारी पक्षाच्या आमदाराचो समर्थक नाशिल्लो. तेच खातीर ताका सतायलो. थळाव्या आमदाराच्या समर्थकाक तो हातगाडो दिसलो आनी ताणें तो रोखड्यो रोखडो थळाव्या आमदाराचे नदरेक हाडून दिलो. उपरांत जबरदस्तीन ताका तो हातगडो बंद करपाक लायलो. तरणाट्याचो माल आनी हेर साहित्य फुकट गेलें. हे खातीर त्या तरणाट्याक हजारांनी रुपयांचें लुकसाण जालें. काणकोणचे भुंयपूत आपल्या गांवांत कित्याक वेवसाय करपाक शकनात? लोकप्रतिनिधी राजकी विरोधकांक कित्याक सतायतात? राजकी सूड घेवपा खातीर कांय गरीब थळाव्या तरणाट्यांक काबार करचे खातीर सरकारी यंत्रणेचो वापर करप कितपत योग्य, अशे प्रस्न भंडारी हांणी विचारल्यात. हे संबंदांत नगराध्यक्ष रमाकांत नायक गांवकार हांचे कडेन संपर्क केलो. तांणी दिल्ले म्हायती प्रमाण हेरां भशेन काँग्रेसीचो पदाधिकारी प्रलय भगत हाका पाळोळ्यां बदला चावडेर गाडो घालपाक सांगिल्लें, पूण ताणें तें मान्य करूंक ना. एकल्याक गाडो घालपाक दिल्यार हेर 15 जाणांक थंय गाडे घालपाक परवानगी दिवची पडटली. तांचे मदीं हॉटेल वेवसायीक सगळो कर भरून वेवसाय करतात आनी तांचे कडल्यान पालिकेक व्हड प्रमाणांत महसूल मेळटा. पालिका तांचेर कसो अन्याय करपाक शकतली? पाळोळें पार्कींग वाठारांत परतून गाडो हाडून लायलो जाल्यार ताचेर एफआयआर नोंद करतले, अशी शिटकावणी नगराध्यक्ष नायक गांवकार हांणी दिल्या.

गोंयांत वेवसाय करपाचो अधिकार फक्त गोंयकारांकूचः भंडारी

गोंयच्या दरेकल्याक सरकारी नोकऱ्यो दिवपाक शकना, हें मुख्यमंत्र्यान जाहीर तरेन कबूल केलां. तेच खातीर तांणी गोंयकारांक स्वताचो वेवसाय सुरू करून ‘स्वयंपूर्ण’ जावपाचो सल्लो दिल्लो. सध्याच्या काणकोणच्या नगराध्यक्षान काणकोणच्या भुंयपुतांक जाहीर तेंको दिला. गोंयांत वेवसाय करपाचो अधिकार फक्त गोंयकारांकूच आसा. मात मुख्याधिकारी मधू नार्वेकार हो भुंयपुतांक सतायता. भुंयपुतांक वेवसाय करपाक दिलो ना जाल्यार बिगर गोंयकारांच्या बेकायदो वेवसाया आड मोहीम हातांत घेतले आनी ते बंद उडयतले, अशी शिटकावणी जनार्दन भंडारी हांणी दिल्या.

पर्यटकांक त्रास जातले, म्हूण कारवायः नगराध्यक्ष

पाळोळें दर्यादेग संवसाराचेर फामाद. ताका लागून व्हड प्रमाणांत देशी- विदेशी पर्यटक हे दर्यादेगेर येतात. नवें वर्स मनोवपाक व्हड संख्येन पर्यटक येवपाची शक्यताय आसा. पाळोळें दर्यादेगेर गाडयो व्हरपाक खूब त्रास जातात. काणकोण पालिकेन गाडयो पार्क करपाची सुवात निश्चीत केल्या. ताची पावणी 25 लाखांक गेल्या. मात हातगाडेकारांनी ते सुवातेर गाडे लायिल्ल्यान पार्किंगे खातीर सुवात उरना. पावणी घेतिल्ल्या मनशाक ह्या गाड्यांक लागून लुकसाण जाता, ताका लागून ताणें भरिल्ले पयशे परतून मागल्यात. तातूंत नवें वर्स मनोवपा खातीर येवपी पर्यटकांची गैरसोय जावची न्हय हे खातीर ही कारवाय केल्या, अशें काणकोणचे नगराध्यक्ष रमाकांत नायक गांवकार हांणी म्हणलां.