भांगरभूंय | प्रतिनिधी
म्हजें मत
गोंयांत भुंयकांपाक प्रतिरोधक बांदावळ निश्चीत करपा खातीर इमारतींची रचणूक आनी बांदावळ संबंदीत इमारत संहिते प्रमाण करची, तातूंत भुंयकांप शक्तींचें वितरण आनी नुकसान उणें करपाक काँक्रिटाच्यो चौकटी, ब्रेसिंग आनी कातरप अशीं तंत्रां आसपावीत करचीं. भुंयकांपाच्या निमाण्या घटकेची वाट पळोवची न्हय. मागीर धडो शिकपाक जायना. पयलींच तयारी करपाक जाय.
इमारतीचे मानक आनी संहिता भुयकांपाच्या संभाव्य लुकसाणा पसून संरक्षणाची हमी दितात आनी संहिते प्रमाण तयार केल्ल्या आनी बांदिल्ल्या इमारतींनी सुरक्षीतताय निश्चीत करतात. मध्यम तिव्रतेच्या भुंयकांपांच्या तिसऱ्या वाठारांत गोंय वसलां. पूण भुंयकांपाची वाट पळोवची न्हय. ताचो अदमास केन्नाच करूंक मेळना.
गोंय जमीन उदरगत आनी इमारत बांदकाम नियमन, 2008 ह्या नेमांत गोंयांत भुंयकांप प्रतिरोधक बांदकामा खातीर गरजेची रुपरेखा दिल्या. पूण, गोंयांत लागू आशिल्ल्या कायद्या प्रमाण तंत्रीक नेमा प्रमाण इमारती बांदल्यात काय? इमारतींची सुरक्षे खातीर दर पांच वर्सांनी तपासणी करतात काय? जुंता हावस इमारतीची भूंयकांप स्थिती कितें?
आरटीआय कायद्या खाला एके इमारतीचे तंत्रीक कागदपत्र मागले, जाप मेळ्ळी की अर्ज कायदेशीर सल्ल्या खातीर धाडला. पळयलें, हांगा कायद्याकच ‘भूंयकांप’ आसा. हांगा कोणाक काळजी?
राजेश बाणवलीकार,
वेगासवाडो, हडफडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
