भांगरभूंय | प्रतिनिधी
अाषाढ फुलांचे लाडू, नागपंचमीतल्या पातोळ्यां उपरांत श्रावणातल्या भिरीभिरी पावसांतलो गोविंदा गोपाळकालो येता. गोंयचे अश्टमींतले गोविंदा, गोपाळकाले पयलीं देवळांच्या भोंवतणचे. हालीं गोविंदा वेपारी रुपांत व्हडा शारांनी पावल्यात. आपलो बिजनेस वाडोवपाक वेस्टर्न म्युझिकाच्या तालार उमेदी गोविंदा जातात, काले देवळांनीच. पयलींची उमेद ना, यादींची सुतां सोडल्यार वळेसर विणपाक मेळटले. वळेसरांची बदलिल्लीं रुपां फळां – फुलांनी, नाल्लांच्या तुळाभारांनी दिसतलीं, तुळाय जातली. तीच तर ज्येश्ठनीत. ते तुळेंत कालची पिळगी शिरकली ना, आयज कोनशांनी ती शिरकल्लीय दिसतली. भावा भावांतल्या, भावा भयणीच्या नात्यांतलीं बंधनां नकळटां आवय बापूय, घराब्यांतल्यांनी केल्ले तुळेंत पयसावतात. खिणां भितर तीं तुटून वेगळी जातलीं नोकरी वेवसायानिमतान. चवथ, लग्नां, मुजीनी तींच एकठांय जावन हांसता खेळटनाय यादींचे गांठवल उसवता. “टायम इज मनी, अॅंड मनी इज टायम” हें आयचें सूत आनी सूत्र. तें इ राखींनी बांदिल्लें, भुरग्यांक भावपी डाॅबरमॅन, सुपरमॅन ते चॅटबोटामेरेन पावलां. चॅटबोटांत चानयो, सवणीं, सुकणीं, मोर नाचतले. भायर सरुन पांचवीताल्ल भोंवतण पळयात. श्रावणांतल्यो धव्योफुल्ल जुयो जायेपरस लिपिल्ल्यो पळयतना वेलीरच त्यो सोबतात हें आयची पिळगी सांगतली.
वर्सुकी भजनी उत्सव देवळांच्या सभामंडपां मेरेन व्हरपाची. पारंपारीक वाटेवयल्या पर्यटनाची दिका बदलतना तेंच भजन, तींच गीतां राज्याभायर वतलीं. पर्यटनाचे वर्सपटयेंत देवळांतले काले, उत्सव आसपावन घेतना भेस, भासेची म्हायती पर्यटकांक दिवची. तवशाचें, पातोळ्यांचें, आबोल्याचें, पेजेचें फेस्त धर्मिक आसलें तरी तांकांय घुमटगाजाची जोड आसता. तांकांय शिस्तीन पर्यटनात हाडल्यार परंपरेंतल्यान अर्थकारण फुलतलें.
एका वास्को सप्तान जे जोडलें तें वर्सभर पावचेंना, कश्टांक मोल ना मात धादोसकाय आसा. वास्कोच्या सप्तकाक घराब्यांची परंपरा आसा, श्रावणांतल्या देवळांचे पालखेंतय घराबे आसतात. आमचे हे भांगरभुंयेतलें तें खाशेलपण, घराघरांनी शिजयल्लें एकामेकाक दिवपाचें ती ज्येश्ठनीत. घराब्यांतलीं सगलीं घराभायर वेवसाय, शिर्विसेंत गेल्लीं आसतना फ्लॅट सिस्टीमेत कालचें आयज उरचेंना, बदल जातलेच. तांचे कडेन पळोवंक, आपणावपाक शिकतनाय तुळा, तुळाभारय घर, फ्लॅटांतल्यान हाॅटेलांमेरेन पावतले. हिसपाभायल्या रुपांनी अर्थनिती मोडचीना हेखातीर जतनाय घेवची. एकलो एक करता म्हणून दुसरो दुपेटीन करता, एक घेतल्यार चार मेळटा पूण तें तिगपी आसता? जें दितात, घेतात तें तिगतलें, यादींत उरतलें एकामेकांक विचारुन करपाची जतनाय घेतल्यार.
मनशां मनशांतलीं संवादाचीं पानां पयसावतात तेन्ना वाॅटस अॅप मेसेजय खोस दिता. पावसांत दहींहंडी फोडटना गोविंदा भिजतले, पडचेना, निसरचेना, खेटाखेट जावचीना म्हणून जतनाय जाय. गोविंदांनी कोयर वेवस्थापन शिकयल्यार? भुरग्यांक पुस्तकां मेरेन व्हेल्यार? वर्गावर्गांनी पुस्तकांचे हांडे हाडल्यार?
श्रावणांतली पुनव सुतांपुनव कालची, आजचीय. तेंच रक्षाबंधनाचें, सुदाम्यान कृश्णांक दिल्ल्या फोवांचें, चिरमुल्यांचे. धंयकाल्याचें उत्सवी रुप पर्यटकांक भावतलें तांकां वाट दाखयल्यार. सुतांपुनवेक नाल्ल दर्या, न्हंयेंत सोडटना ते बुडटात, दर्यादेगेर परत येतात. पाळोल्यां दर्यादेगेवयल्या सुतांपुनवेच्या रुपाक दायज आसा, दायजांत पर्यटन घुस्पल्लें थळाव्यांक भावता? उत्तर गोंयच्या दर्यादेगांवयली कोयंडी देवळांतल्या उत्सवांमेरेन व्हरतना मेकळ्यो सुवाती सांबाळूया. भिरीभिरी पावसांतल्या गोविंदांक दर्यादेगांवयल्या हाॅटेलांतल्या सभाघरांनी व्हरपाक येता भजन, संगीत, नाचांतल्यान.
श्रावणातली श्रावणी, पूजेक घरची मर्याद आसल्यार त्यो देखण्यो जातल्यो. तीच देखणीनीत ज्येश्ठांची. स्मॉल इज ब्युटीफुल न्यू नाॅर्मल फुलते पिळगेक आवयभासेलागीं हाडटना तांच्यो चुको जातल्यो. गोविंदांनी केल्ली चूक सोदतना चार चौक्यो, चवथी, वर्सां वतलीं. येतले गोविंदा गोपाला नव्या भेसांत, अडेचे नाका सदचे जाय, नाटकां नाकात, सरळवाट म्हत्वाची. नवे पिळगेमेरेन व्हरपी टीशर्ट, पुडवीं, शाॅर्टस भिरीभिरी पावसांतल्या जॅकेटांबराबरीन. शेरवानी, सुटा बुटांतले गोविंदा शेतांनी देंवचेच. मातयेन हात घालून श्रावणांतल्या पावसांत भिजल्यार, चलल्यार भलायकी बरी उरतली. तीच ज्येश्ठनीत, पिरायेच्या शेंकड्याचें सपन पळोवपी.
पिरायेंत आयज देसय घुस्पला, गोविंदांक घेवन गोपाळय येतले, कालेय जातले पूण कालचें भुरगेपण दिसतलें? संविधानाचे नवे बांदावळीतलीं पिरायेचीं गणितां ल्हान व्हड जातलीं, दिसत व्हय तातूंत श्रावण, वर्षाऋतू? शिवराकाकडेन वतना दोळे बांगुडल्यो, विस्वणाचेर. दर्याची गाज, सैमसंगीत, भुंयेची देण सैमीक. तें देवाचें देणे, हक त्याच भुंयपुतांचो, धुवांचो. ताणीच सांबाळपाचो.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
