भांगरभूंय | प्रतिनिधी
अवधूत तिंबलोः कोणाक कशें शिकोवचें तें सरांक जुस्त कळटालें
भांगरभूंय । प्रतिनिधी
मडगांवः मुंबयचे कॅम्पेन शाळेंत आपूण शिकतना मराठी शिक्षक म्हूण भिकू पै आंगले थंय शिकयताले. गणिताचे शिक्षक सोडून गेले तेन्ना तांणी गणीत लेगीत तेच ताकदीन शिकयलें. ते शिस्तबद्ध आनी कामा विशीं प्रामाणीक आशिल्ले तशेंच शिक्षणाची बुन्याद घटमूट करपी शिक्षक आशिल्ले. कोणाक कशे शिकोवचे ते तांकां कळटालें, अश्यो भावना उद्देगपती अवधूत तिंबलो हांणी उक्तायल्यो. तशेंच त्या काळार अभ्यास करिनासिल्ले नापास जाताले, आतां बदलिल्ले शिक्षण पद्दतीक लागून चडशे पास जातात, हें समाजा खातीर कितलें बरें ताचोय विचार करपा सारकें आसा, अशेंय मत तांणी उक्तायलें.
ज्येश्ठ नाट्यकर्मी, शिक्षणतज्ञ भिकू पै आंगले हांच्या जल्मशती वर्सा निमतान मडगांवच्या रवीन्द्र भवनांत कार्यावळीचें आयोजन केल्लें. ह्या वेळार कार्यावळीचे अध्यक्ष तशेंच उद्देगपती अवधूत तिंबलो, मराठी अभिनेते शिवाजी साटम, उपेंद्र दाते, सुषमा सावरकार जोग, प्रवास नायक, भाई नायक, व्यंकटेश हेगडे, श्रीकृष्ण अडसूळ, अनील पै काकोडे हाजीर आशिल्ले.
दिवली पेटोवन कार्यावळीचें उक्तावण जाले उपरांत भिकू पै आंगले हांच्या जिविताचेर आदारीत चित्रफीत तशेंच तांणी केल्ल्या नाटकाचो भाग दाखयलो. श्रीकृष्ण अडसूळ हांणी आंगले हांचो शिक्षक म्हूण जाल्लो प्रवास मांडटनाच तांच्या मदल्या विवीध गुणांचें कवतूक केलें. तांणी बरयिल्ल्या पुस्तकांची म्हायती दिली.
प्रवास नायक हांणी आंगले हे रामनाथी देवस्थाना कडेन कशे जुडिल्ले आनी तांच्या नाटका विशींचो मोग हाचेर विचार मांडले.
हिंदू मठग्रामस्थ सभेचे शिक्षणीक वाटचालींत आंगले सरांचो कसो वांटो आसा हें भाई नायक हांणी सांगलें. तशेंच तांणी 32 वर्सां संस्थेचे उदरगती खातीर कशें काम केलें तें सांगलें.
नाटक हें भिकू पै आंगले हांची जीण जाल्ली आनी ते नाटक जियेले, अशें डॉ. व्यंकटेश हेगडे हांणी सांगलें.
सुषमा सावरकार हांणी सांगलें, 1976 त सादर केल्ल्या नाटकांत ल्हानशी भुमिका केल्ली आनी त्या वेळार भिकू पै आंगले हांचे कडल्यान नाटकाचे धडे मेळिल्ले, ताचो उपेग जिवीतभर जालो. रंगमाचयेर काम कशें करचें, उतरां कशीं उलोवचीं, भाशा खळखळपी कशी आसची, ताका सूर- ताल कसो आसचो हे संस्कार आंगले सरांनी केले. ल्हान भुरगें म्हणल्यार मातयेचो गुळो, जसो आकार दितात तशी घडटात. तशेंच आमच्या आयुश्याक आकार दिवपाचें काम आंगले हांणी केलें.
उपेंद्र दाते हांणी सांगलें, भिकू पै आंगले हांचे जल्मशतीचे कार्यावळी वेळार खूबश्यो यादी मनांत आसात. भिकू पै आंगले हांणी नव्या कलाकारांक घेवन ‘रायगडाला जैव्हा जाग येते’ हें नाटक दिग्दर्शीत करून परतून माचयेर हाडलें. तातूंतलें कांय जाण आयज जिवीत नात, तांचोय उगडास येता. नाटक जिवीतभर जियेवपाक जाय आनी ते जियेले उपरांतूच अशे तरेच्यो कार्यावळी जातात. मराटी भाशेक अभिजात भाशेचो दर्जो मेळ्ळा, तातूंत अभिजात मराठी नाटकांचोय व्हड वांटो आसा. ते खातीर नाटकां तिगून उरपाची गरज आसा. अभिनेते शिवाजी साटम हांणी सांगलें, वेवसायीक रंगमाचयेचो कसलोच अणभव नासतना भिकू पै आंदले हांच्या मार्गदर्शना खाला पयलें नाटक केलें. कलाकारान स्वताक दिग्दर्शकाच्या सुवादीन करचो, तांणी थारावन दिलां तितलेंच करचें, हे सरांक लागून शिकपाक मेळ्ळें. उतरांचे उच्चार, रंगमाचयेर कशे वावुरचें, उतरांची फेक आनी कुडीच्यो हालचाली हांचो सांगोड घालपाची संवय आंगले हांकां लागून लागली.
रणधीर कपूराच्या कानपटार दिलें…
भिकू पै आंगले हांचे कडेन पयली भेट 1961 त जाली. मुंबय शिक्षणा खातीर पासपोर्ट घेवन वच्चो पडटालो. आपूण कॅम्पेन शाळेंत शिकतालों. थंय आंगले हांणी मराठी शिक्षक म्हूण काम करपाक सुरवात केली. ते खूब शिस्तीचे आशिल्ले. एकदां ते शिकयतना वर्गांत एक भुरगो सॉफ्टड्रींक पियेतालो. आंगले सर थंय गेले आनी डॅस्क उक्तो करपाक लायलो. तातूंत सॉफ्टड्रींक दिसताच सरान त्या भुरग्याच्या कानपटार दिलें. तो भुरगो त्या काळा वयलो नामनेचो अभिनेतो राज कपूर हाचो चलो रणधीर कपूर आशिल्लो. रणधीर कपूर प्राचार्या कडेन गेलो आनी कांय वेळांत राज कपूर व्हड मोटारींतल्यान शाळेंत आयले. तांणी पै आंगले सरां विशीं वासपूस केली. सर तांच्या मुखार वचून उबे रावले. त्या वेळार राज कपूर हांणी तांकां घट वेंग मारली आनी म्हणलें, जें आपूण करपाक शकलों ना, तें तुमी केलें. असो सभाव आशिल्लो आंगले हांचो, अशें अवधूत तिंबलो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
