भांगरभूंय | प्रतिनिधी
मडगांव क्रिकेट यूथ क्लब आनी गोंय खेळां प्राधिकरण हांचे वतीन सोमारच्यान (31 ऑक्टोबर) भिकू पै आंगले यादस्तीक 15 वर्सां पिराये सकयले अखील भारतीय क्रिकेट सर्तीचें आयोजन केलां.
5 नोव्हेंबर मेरेन चलपी हे सर्तींत 10 पंगड वांटो घेतले. हातूंतले दोन पंगड गोंयांतले आसतले.
सर्तीची म्हायती पत्रकार परिशदेंत आमदार दिगंबर कामतीन दिली. ते आयोजन समितीचे अध्यक्ष लेगीत आसा. ह्या वेळार क्लबाचे उपाध्यक्ष पांडुरंग उर्फ भाई नायक, सचीव आदित्य आंगले, कार्यकारी सचीव हेमंत आंगले, भांडारी अमेय कोसंबे आनी वांगडी शौमिक आंगले, रवींद्र नेवगी उपस्थीत आशिल्ले.
मॅची मडगांवां नव्यान तयार केल्ल्या कोंकण रेल्वे सोसायटी मैदान, धारबांदोडें, आगोंद आनी माशें हांच्या मैदानांचेर जातल्यो. सर्तींत शिवाजी पार्क जिमखाना, सदा फावंडेशन कोल्हापूर, नाशिक क्रिकेट अकादमी, द्वारका-नाशिक, विजय आयसीई-पटना, लखनौ क्रिकेट अकादमी, जस्ट क्रिकेट अकादमी-बंगळुरू, टीएससीए-हुबळी हे पंगड वांटेकार जातले. तशेंच गोंय खेळां प्राधिकरण आनी माशें क्रिकेट क्लब हे गोंयांतले पंगड आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
