भास निवळावपाचें काम कोण करीत व्हय ?

भांगरभूंय | प्रतिनिधी

आमचे भितरले कितले बरोवपी नवोदितांक तांच्या बरपांतल्यो चुको दाखोवन त्यो तांचे कडल्यान परतून सुदारुन घेवन तांची भास सुदारपा खातीर तळमळींन वावुरतात?? फकत शेरे मारून उपकारना.

संवसारांत सल्ले दिवपी खूब जाण आसात. ते पावलां कणकणी मेळटात, हाचो अणभव दर एकल्याक आसताच
आसता. हालींसराक नवोदीत बरोवप्यांचेर जायते जाण टिका करीत आसतात. म्हण्टात कशें, ‘नवोदितांचे बरपावळींत इतल्यो चुको आसतात कीं तें वाचपाक xx येता’. असले तरेचीं उतरां आयकूंक येतकच प्रामाणीकपणान काम करतल्यांचें मन विरुस जाता. ते नकळटां येवजुपांत पडटात. खूब जाणांच्या तोंडांतल्यान हें आयलां. तातूंत शिक्षणीक जाणकारांचो म्हळ्यार शाळांचें वेवस्थापन आनी पालक संघाच्या वांगड्यांचो आसपाव आसा. तांच्या म्हणण्या प्रमाण, शाळांनी शिकयतात त्या विशयां मदीं हेर विशयांचे तुळेन भाशेचो विशय शिकोवप सामकें सोपें. तो कोणेय शिकोंव येता. जांव ती कोंकणी, मराठी, हिंदी, इंग्लीश वा हेर परकी भास. (त्या- त्या थळां आनी सुवातांक धरुन. ) हेच भावनेंतल्यान आनी नदरेंतल्यान भास शिकोवपी शिक्षकांक संबंदीत शाळांनी जंय अशे म्हणपी वावुरतात, थंय ते सुवातेर तांच्या वांट्याक खालतेंपण येता. ‘कोणाचे’ तरी सांगणेन पालकच त्या शिक्षकां कडेन वेगळे नदरेन पळयतात. तांकां किरकोळ लेखतात. जाणकारय अशेतरेचे शेरे दितात ते वेळार मात त्या जाणकारांच्या अभ्यासा विशीं मात दुबाव येवंक लागतात. शिक्षणा कडेन पळोवपाची तांची नदर दिसून येता. ह्याच गजालींचेर विचार करतना म्हाका सदांच म्हजें भुरगेंपण येवजता. म्हजे शाळेचे दीस याद जातात. . .
सगळ्यांत कमी गुण म्हाका भाशेच्या विशयांत पडटाले. पाठ्यपुस्तकांतलो अभ्यास सोंपो थारूनय सगळ्या प्रस्नांच्यो जापो सारक्यो बरोवनय उत्तरपत्रिकेंत गुण उणे पडटाले. उरफाटें, हेर विशयांनी फावो तो अभ्यास जावनय गुण चड पडटाले. ताचें कारण भाशेच्या पेपरांनी व्याकरणांत खासा करुन ऱ्हस्व- दीर्घाक लागून गुरुजी, सर, आमची भास अशुद्ध मानताले. गुण कमी दिताले. ऱ्हस्व- दीर्घाचो व्हड राकेस आमचे उत्तर पत्रिकेंत धुमशेणां कांडी आनी आमकां चड गुण घालपाक गुरुजनांक भंय घाली. शाळेंत शिकतना पैकींतले पैकी गुण चड वेळां पडूंक नात, मात हायस्कुलाच्या वर्गांनी पैकींतले पैकीं गुण घेतल्यात. मुळावे शाळेंत गुरूजी भाशेंत वाक्यांचे बांदावळींत ऱ्हस्व- दीर्घाच्यो चुको काडून गुण उणे करताले. घडये, हाकाच लागून जावंये आमी आयचे पिळगे परस भास बरी शिकूंक पावले. भुरगेपणांतल्या शिक्षकांची भास शिकोवचेली पद्दतच बरी आशिल्ली. कळना जाल्यार शिक्षक आमकां घेवन बसताले. आमचे तकलेंत त्या गिन्यानाक सासणाची सुवात दिवचे खातीर वेगवेगळीं तंत्रां आपणायताले. अक्षर सोबीत जावपाकय आमचेर शिस्तीन, आपुलकायेन आड्डताले. केन्ना- केन्नाय आपल्या हातांत आमचो हात धरुनय अक्षर वळणाची वाट दाखयताले. आतां धावत्या काळांत आमचे अक्षर धांवता ही वेगळी गजाल.
सांगपाचो मुद्दो हो की आयच्या काळांत सादें वाक्य तयार करूंक येय नाशिल्ल्या भुरग्याचे उत्तरपत्रिकेंत णव्वद टक्क्यां वयर वा पैकींतले पैकीं गुण घेतिल्ले दिश्टी पडटात. हें कशें घडटा हें हांव नकळ. ‘हांव नकळ’ अशें म्हणचेपरस भाशेची आवड आशिल्ल्यान तो मोठो प्रस्न सतावंक लागला. भाशेंतल्या विशयांत पैकींतले पैकी गुण घेवप म्हळ्यार तो विद्यार्थी कितलो हुशार आसचो पडलो?!!? तो ते संबंदीत भाशेंत परीपक्व जाला अशेंच म्हणचें पडटलें. पुणून, खरें अर्थान तो तसो नासता. अशे वेळार ‘ही करामत’ कोणाची म्हणची पडटली? ती ‘भाशेच्या शिक्षकाचीच करामत’अशेंच म्हणचे पडटलें न्हय?. म्हळ्यार भाशा शिकोवपी शिक्षक ‘नाxxx’अशेंच थारलें ना?
ह्या संवसारांत जर बदल कोण घडोवन हाडूंक शकता आसत जाल्यार तो एक शिक्षकूच. तांच्याच कुडींत हो बदल घडोवन हाडपाची तांक आसता. बळगें आसता. कारण तो त्याच कामा खातीर प्रशिक्षीत आसता. आपणा कडेन आशिल्ल्या गिन्याना खातीर तो भुरग्यांचे जिणेंत उजवाड घालता. तांकां उदरगतीचो मार्ग दाखयता. विद्यार्थ्यांक तो आदर्श घडयता आनी खासा तांकां आदर्श उरता.
हालींसराक साबार जाणकारांच्या मतप्रदर्शनांत तरणाट्यांच्या बरपांचेर शेरे येतात. शेरे साहित्यकृतीचेर न्हय तर साहित्यकृतीचें रुप, मांडावळ आनी साहित्य निर्मणे वेळार बरपावळीक धरुन त्यो चुको नदरेंत येतात त्या संबंदीत मुद्यांचेर येतात. निमणे, तांचे खातीर सल्लो येता. तो म्हळ्यार तांणी योग्य साहित्यिकाचें मार्गदर्शन घेवचें. सल्ल्या प्रमाण तरणाट्यांनी योग्य मार्गदर्शन घेवचेंच आनी आपली बरपावळ सुदारची. त्या लळितांतल्यान वाचप्यांक आनंद मेळचो, हेंच एक ध्येय. तें साध्य करतना बरपावळी सावन उजवाडावणे मेरेनचो जो साहित्यिकाचो प्रवास आसा तातूंत मार्गदर्शक म्हत्वाची भुमिका निभयता. त्या मार्गदर्शकाचेर इल्लो उजवाड घालीन दिसता. मार्गदर्शकां भीतर साहित्यीक, भास शिकोवपी शिक्षक, वाडपी, तशेंच जंय सावन तें बरप छापून उजवाडाक येता थंयच्या संपादन मंडळाच्या वांगड्यांचो आसपाव जाता.
बरयतल्यांच्या बरपाचेर, भाशेचेर चड टिका जाता देखून पयलीं शिक्षकां वटेन नदर वता. खऱ्यांनीच शिक्षक भुरग्यांक भास शिकोवंक उणे पडटात व्हय? पडनात जाल्यार भुरग्यांची भास इतलो उणो दर्जो कित्याक दाखयता? ती सुदारपाक तांचे कडेन फावो ते यत्न जायनात? तांकां शिकयतना सरकार शिक्षकांचेर खुपश्यो भायल्या कामांच्यो जापसालदारक्यो घालता. त्यो पुराय करपाक तांकां सक्ती करता, हेंय तितलेंच सत. पुणून, आपूण ज्या कामा खातीर पगार घेता तें काम वेवस्थित रितीन बरें जांवकच जाय हे खातीर तांकां वावरुंकच जाय.
शिकपी भुरग्याक फकत यत्ता पास जावचे खातीर शिकोवप इतलेंच आपलें काम न्हय तर तांकां आपूण शिकयता ते विशयांत जाणकार करपा खातीर गिन्यान दिवप ही दर एकल्या शिक्षकाची लागणूक हें तांणी विसरूंक फावना. ही लागणूक कितले जाण पाळटात? हें दर एकल्या शिक्षकान खासा विचार करून पळोवचें. जांव तो शिक्षक मुळावे शाळेंतलो, माध्यमीक विद्यालयांतलो, उच्च माध्यमीक विद्यालयांतलो वा म्हाविद्यालयांतलो. आपणे ‘ह्या विद्यार्थ्यांक शुद्ध भास बरोवंक, वाचूंक शिकयल्या’अशे कितले जाण हक्कान सांगूंक शकत???
आमचे भितरले कितले बरोवपी नवोदितांक तांच्या बरपांतल्यो चुको दाखोवन त्यो तांचे कडल्यान परतून सुदारुन घेवन तांची भास सुदारपा खातीर तळमळींन वावुरतात?? फकत शेरे मारून उपकारना. भाशेची गिरेस्तकाय, संपत, भांडार वाडोवचेलें आसत जाल्यार आपणेय खासा मेळिल्ले संदी वरवीं काम करूंक जाय. म्हाका कितें मेळटलें? म्हजे परस तो मुखार पावतलो? असल्या प्रस्नांनी आडकून कोणे रावचें न्हय. शणै गोंयबाबान म्हळ्ळां ते प्रमाण ‘हांव मुखार वतलों आनी हेरांकय मुखार व्हरतलों’ अशी भावना जागृत जावची. नातर, म्हापुरुस शणैचीं उतरां शिकून कितें उपेग?
नवोदित बरोवप्यांची भास सुदारपाचो, निवळावपाचो खरो वावर कोण करता आसत जाल्यार ते उजवाडावणेचें काम करपी दिसाळ्यांतलें मंडळ. देखीक : भांगरभुंय. कोंकणी भाशेचे उदरगतीक माथें मारिल्लें दिसाळें. त्या दिसाळ्यांतले जाणकार. हे अणभवी जाणकार सेवेंतल्यान निवृत्त जातकच भास निवळावपाचें काम कोण करीत व्हय??? ह्या प्रस्नांनीच तकली भेरेल्ले वरीं जाता. नवोदितांची बरपावळ सुदारुंक जाय अशें म्हणपी, सल्ले दिवपी, शेरे मारपी खूब जाण आसात. आनीकय जल्माक येतले. . . . फकत कोंकणीचें उदरगती खातीर हें काम करपाक कोंकणी सरस्पतीचे सेवक फुडें सरत व्हय????

उल्हास यशवंत नायक
8010061867