भांगरभूंय | प्रतिनिधी
साहित्यीक प्रभा वर्मा हांणी मांडलें मत
केरळांत कोंकणी साहित्य संमेलन सुरू
आयज विविध परिसंवाद, दनपरां समारोप
भांगरभूंय । विशाल सिनाय खांडेपारकार
एरणाकुळम (कवी के अनंत भट माची) : भाशांतर हो संवसाराक जोडपी, एक संस्कृती दुसरे संस्कृताये कडेन जोडपी आनी ‘ग्लोबल व्हिलेज’ निर्माण करपाक योगदान दिवपी म्हत्वाचो पूल. तेन्ना आमी अणकाराचे भर दिवंक जाय. भारतीय भाशां मदीं ज्या प्रमाणांत परस्पर दिवप- घेवप जावंक जाय, तें जायना. दरेक भाशा एकमेकां पसून पयसूच रावता. ही परिस्थिती मुखार चालू उरची न्हय, अशें ज्येश्ठ साहित्यीक प्रभा वर्मा हांणी सांगलें. ते हांगा आयोजीत केल्ल्या 26 व्या अखील भारतीय कोंकणी साहित्य संमेलनांत मुखेल सोयरे म्हूण उलयताले.
ह्या वेळार माचयेर संमेलनाचे अध्यक्ष कवी माधव बोरकार, मानाचे सोयरे राजभाशा उपसंचालक अनिल सावंत, परिशदेचे कार्याध्यक्ष चेतन आचार्य, सचीव स्नेहा सबनीस, येवकार अध्यक्ष सदानंद भट, संमेलन कार्याध्यक्ष आनंद कामत आनी हेर मानेस्त हाजीर आशिल्ले.
एकाच सारकी संस्कृती लादप आनी एकादे भाशेक आपूण जावन उच्च दर्जो दिवप हाका लागून सांस्कृतीक विविधताय आशिल्ल्या भारताचें खाशेलेंपण कुरतडून उडयिल्ले सारकें जाता. अशा विघातक यत्नांचे फाटभुंयेर भाशांतर हें म्हत्त्वाची राजकी भुमिका करता. तें सांस्कृतीक दिवप- घेवप निश्चीत करता. तें राष्ट्रांतले विवीधतायेचो उत्सव मनयता, जी आमच्या घटनात्मक मुल्यांची बुन्याद आसा, अशें वर्मा हांणी सांगलें.
कोंकणीक हजार वर्सांचो इतिहास आसा. गोंय आनी कर्नाटक- केरळ- महाराष्ट्राच्या कांय भागांत ती उलयतात. तिका व्हडली सांस्कृतीक परंपरा आसा. तातूंत 10 व्या शेंकड्याचे भक्ती चळवळींत गितां, कविता तयार जाल्यात. 16 व्या शेंकड्यांत पुर्तुगेज येतकच कोंकणीचेर तांचे भाशेचो प्रभाव पडलो. उपरांत थॉमस स्टिवन्स, शणै गोंयबाब आनी शेंकड्यांनी साहित्यकारांनी कोंकणी गिरेस्त केली. कोंकणीक कायम संघर्श करचो पडला. आयज कोंकणी हेर भाशांच्या खांदाक खांद लावन उबी आसा, अशें वर्मा हांणी सांगलें.
कोंकणीची उच्च प्रतिश्ठा आतां जगभर पावल्या. तुमी संवसाराक पटोवन दिलां, हे भाशेंत अशें साहित्य आसा, जाची तुळा नोबेल पुरस्कार निर्माण करपी भाशां कडेनूय करपाक मेळटा. स्वताच्या बळग्याचेर उबें रावपाचो तुमी दाखयिल्लो अभिमान खऱ्यांनीच तोखणायेचो, अशें वर्मा हांणी सांगलें.
माधव बोरकार हांणी सांगलें, कोंकणी साहित्याचो इतिहास बरयतना कांय अडचणी उप्रासतात त्यो म्हणल्यार लिपयांच्यो. लिपयांच्या वणटींनी कोंकणी साहित्याचें खूब व्हड लुकसाण केलां. त्यो नाशिल्ल्यो जाल्यार आमचें साहित्य व्हड गतीन फुडें वतलें आशिल्लें. ही परिस्थिती आतां थोड्याभोव प्रमाणांत बदलत आसा. जेन्ना ह्यो वणटी कोसळटल्यो तेन्ना खऱ्या अर्थान कोंकणीच्या मळार भांगराचें पर्व उदेतलें. तो भाग्यवंत काळ रोखडोच येवं.
आनंद कामत हांणी सांगलें, केरळांत आयज तिसरें संमलेन जाता. हांगा कोंकणी उलोवपी मनीस उणें. कोंकणी आमी खातात, कोंकणी जिवीत जियेतात. आमकां मुळावें शिक्षण ना तरीय आमी कोंकणी राखून दवरल्या.
आयज मेरेन कोंकणी परिशदेन कोंकणी समाज, आनी कोंकणी संस्थांक बांदून एकठांय हाडपाचो वावर केला. तेन्ना दोन दिसांचें साहित्य संमेलन जैतिवंत करुया, अशें चेतन आचार्य हांणी सांगलें.
मुख्यमंत्री सावंत हांची कणखर भुमिका
समाजाक दिशा दाखोवपी काम कोंकणी भास करता. साहित्यांतलीं मुल्ल्यां समाजा पासत गरजेचीं. आयज मेरेन साबार चळवळी समाजांत जाल्यो. तेन्ना भाशेक लागून सांस्कृती तिगता. हातूंत प्रशासन हो समाजाचो घटक. देखून कोंकणी भाशे पासत मुख्यमंत्री प्रमोद सावंत हांणी कणखर भुमिका घेतल्या. कोंकणी साहित्य आनी हेर मळार सरकार अर्थीक पालव दितात. आमचो देस विविधतायेन नटला आनी भरला. कोंकणी हें ताचें प्रतीक. तेन्ना प्रशासनांत कोंकणी भास सांबाळपाक आमचे सदांच प्रयत्न आसतले, अशें अनिल सावंत हांणी सांगलें.
बाल-साहित्य जैतिवंत लेखिका नयना आडारकार आनी अणकार पुरस्कार जैतिवंत मिलिंद म्हामल हांचो शाल, श्रीफळ आनी यादस्तीक दिवन साहित्यीक प्रभा वर्मा हांणी सत्कार केलो.
अणकार जावप गरजेचे
एके भाशेंतलें साहित्य दुसरे भाशेंत पावतलें जाल्यार ताचो अणकार जावप गरजेचें आसता. आमचें भारतीय साहित्य देशाची शीम हुपून संवसारभर पावलें तें अणकाराचे प्रक्रियेक लागून. ताचें स्रय विलियम जोन्स ह्या ब्रिटीश अनुवादकाक दिवंक जाय. कवी कुलगुरू कालिदास हो इ. स. चवथ्या- पांचव्या शेंकड्यांतलो. गुप्ताच्या काळांतलो म्हाकवी. ताच्या साहित्यांत भारतीय जिणेचें दर्शन घडटा. धर्म, संस्कृताय, सैम, अध्यात्म आनी मनीसपणाचीं मुल्यां अशीं विंगड विंगड परिमाणां ताचे साहित्यकृतींनी पळोवपाक मेळटात, अशें माधव बोरकार हांणी सांगलें.
अणकार म्हणल्यार दोन भिन्न संस्कृतायेंचो मिलाफ अशें म्हणूं येता. संस्कृत-इंग्लीश आनी संस्कृत- फ्रेँन्च ह्यो भासो अणकारा वरवीं एकठांय येतात तेन्ना दोन संस्कृतायें मदीं दिवप घेवप जाता. अणकार म्हणल्यार एके तरेचें स्थलांतर आसता. मूळ भासो जाणा जावन घेवन त्या भाशांतलें साहित्य वाचप हें सर्वसामान्यांक जमना, अशें बोरकार हांणी सांगलें.
सदानंद भट हांणी येवकार दिलो. चेतन आचार्य हांणी सुत्रसंचालन केलें, स्नेहा सबनीस हांणी उपकार मानले. अनंत अग्नी हांणी सुत्रसंचालन केलें. उपरांत विविध परिसंवाद जाले. आयज दनपरां संमेलनाचो समारोप जातलो. ताचे पयलीं विवीध परिसंवाद, कार्यावळी जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
