भांगरभूंय | प्रतिनिधी
प्रवीण आर्लेकारः मोपा वाठारांत राखणे वणत बांदपाक सुरवात
भांगरभूंय । प्रतिनिधी
पेडणें: हे आदीं वेंचून आयिल्ल्या आमदारांनी फक्त भाशणबाजी करपाचें काम केलें. उदरगत कामांत ते शुन्य उरले. आपूण भाशणबाजी बदला कृतींतल्यान उदरगत कामांक प्राधान्य दितां, इशें पेडणेंचे आमदार प्रवीण आर्लेकार हांणी सांगलें. मोपा पंचायत वाठारांतले राखणे वण्टीच्या कामाक सुरवात करून दिले उपरांत ते उलयताले. ह्या वेळार मोपाचे सरपंच सुबोध महाले, आदले पंच उमेश गाड आनी हेर पंच तशेंच थळावे लोक हाजीर आशिल्ले.
आर्लेकार हांणी सांगलें, पेडणें मतदारसंघ फुडारांत उदरगतीचे बाबतींत खंयच फाटीं उरचो ना. उदरगतीचें उड्डाण घेतना गांवागांवांत पंचायत पांवड्या वयल्यान उदरगतीक चालना दितले. ते खातीर लोकांचो आदार म्हत्वाचो आसा. सुबोध महाले हांणी सांगलें, उदरगतीचीं कामां कशीं करपाचीं तीं उण्यां उतरांनी सांगप आनी उदरगतीच्या कामांक गती दिवपाचें काम आमदार प्रवीण आर्लेकार करता. एकादी रेल गाडी जर सुरक्षीत सुवातेर गतीन वचपाक जाय जाल्यार ताचें फुडारपण करपी चालक हो म्हत्वाचो. तेच पद्दतीन आर्लेकार हांच्या रुपान पेडणें मतदारसंघा खातीर एक बरें फुडारपण मेळ्ळां. तांच्या माध्यमांतल्यान उदरगतीच्या कामांक रेल गाडये वरीं गतीन सुरवात जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
