भांगरभूंय | प्रतिनिधी
मा न्य. आग्नेलाच्या जिवितांतलीं लिपलेलीं
‘माणकां- मोतयां’, हें पुस्तक बरोवपी ब्रदर युजेबियो वि. मिरांडा. पुस्तकाचेर भायलें सुंदर चित्र क्लिफर्ड फेर्नांडीसान काडलां. सुरवेकच फा. सॅबिस्त्यांव मास्कारेन्हासान प्रस्तावन बरयल्या. तशेंच दोन उतरां फा. टोनी सावियो फेर्नांडीसान बरयल्या. जाल्यार निमणें पानार बरोवप्याचे विशीं वळख फा. आवे मारिया आफोन्सान केल्या. पुस्तकाचो सगळो वावर फा. जोझेफ फेर्नाडीसान भार घेवन केला. पुस्तकाचे सुचीपत्रार सुमार 96 मोटव्या लेखांचो आस्पाव केला. ब्रदर युजेबियो मिरांदान हें पुस्तक निजाचो सोद वावर करून बरयलां. पाद्री आग्नेलाच्या 150 वे जल्मा दिसा पुस्तकाची उजवाडावणी केल्या.
पाद्री आग्नेलाचो वावर आनी जिवीत
पाद्री आग्नेलाचे सबाव गूण जशे पर्यान उदारपण, खालतीकाय, समजिकाय, सोंशीकसाण, शांतीपण, विश्वाशीपण, क्रिस्ती भावार्थ आदीं. नदरेंत भरता. तेच भशेन पाद्र आग्नेलाचे शेगुणी जिवीतय बरोवप्यान बरे तरेन चित्रायलां. खेरीतपणान ताचें भावार्थी आनी अत्मीक जिवीत प्रभावीपणी वर्णिलां. पाद्री आग्नेल हो सायबीण मांयचो मोगी आशिल्लो. कशे भशेन ताणें आपलें जिवितांत तिची भक्ती केली. ही खबर बरे तरेन गुंथल्या. पाद्री आग्नेलाचे आपोवणें आनी पाद्री जातकच कशे तरेन ताणें आपलो वावर केलो, ही खबर विस्तारान वाचूंक मेळटा. ‘एक सुंदरी मोगी आशिल्ली’ हो लेख वाचतना बरोवपी मिरांद वाचप्यांची उमळशीक तेंगशेर व्हरता.
‘हांकां’ न्हिदपाक दिवंक उपकारना
मनीस हो समाजशील प्राणी. देखून समाजीक उदरगती पासत संतांचे मदीं बरें गूण आसूंक फावो. प्रामाणीकपण, सेवा, विरक्ताय, भोगसणें, संयम, उपकार, समता उदारपण खालतीकाय काळजीदारपण, विश्वासीपण, नीत आनी सत्य साकरे गुणांक लागून व्यक्ती आनी समाजाचें चरित्र घडटा. ह्या पुस्तकांत पाद्री आग्नेलाचें जिविताचें भाग्यवंतपण आनी ताचे बरे गूण वाचूंक मेळटात.
देसाची राखण करपी सैनीकांनी समाजीक समते पासत वावुरपी संत हे उत्तम चरित्राचो आदर्श देखी जावन आसा. देखून पाद्री आग्नेलाच्या सुर्पुल्या पुस्तकांत सचित्र केल्ल्यो घडणुको आनी ताचें जिवीत पवित्र सभेन मानून घेवन पाद्री आग्नेलाक सांत म्हूण जाहीर करचो म्हूण बरोवपी मिरांद आपल्या पुस्तकांतल्यान मागता.
भाशा शैली
ब्रदर युजेबियो मिरांदाची भास खुबच सादीं, सोंपी आनी चालत्या उतरांचो कोंकणी वापर जाला. कांय वेंचीक वाक्यां सुटसुटीत जावन उपदेस कशे वाचूंक मेळटात. देख:
‘ तुकाच विसरून तुवें दुस-याची सेवा केल्यार तुका अदीक फायद्याचें.’
‘ देवाचेर पातयेवया, जशे परीं एक सुणें आपल्या धनयांच्या पांयां लागीं सुस्त आसताक. तेच भशेन हुस्क्या मेकळे रावूंया.’
‘ भाग्यवंताच्या हाडांक पर्यान मान दितात. आमचें भक्तीपण अनभार्वार्थ्यां परीं संस्कारी आशेन न्हय, बगर सुवार्थ नाशिल्लें जावूं दी ’..(पान: 7, 15, 21, 39.)
वजनादीक चरित्र पुस्तक
संत फ्रान्सिस्क शाव्हियराच्या मिशनऱ्यांची संस्था पिलार, गोंय, वतीन हें पुस्तक उजवाडायलां. भितरलीं सुमार 160 पानां रंगीत 130 जिएसएस ग्लॉस आर्ट पेपर वापरून पर्फेक्ट बायडिंग केलां. पुस्तकांची बांदावळ गडगंज जाल्या. सुंदर सोबीत चित्रां, कव्हर, फोटे आनी पाद्री आग्नेलाचे सुविचार खास आकर्शीत करतात. तेच भशेन लेखांचे माथाळे खूब ओडलायणे जाल्यात. देखीक:
‘ भाग्यवंत म्हूण, जियेलो मरणा परांत फांकलो.’
‘ मरणा वरवीं जैत, जेझुचो मोग आग्नेलाक थार दिना.’
‘कश्टाचो मोगी, ‘दौलत नासतना गिरेस्त, आमी कोणाचे लागीं मागचें, क्रिस्त म्हजे भितर जियेता, आदीं.
सोंपयतना
म्हज्या मतान देवाचे कृपेन सगळ्या विस्वासीपणान जेझुचो पाटलाव करूंक ह्यो घडणुको वाचप्यांक खात्रेन प्रेरणा दितात. तशेंच पाद्री आग्नेलाचे भाग्यवंतपणाचें जिवीत पवित्र सभेन मानून घेवन, तांकां बेगूनच संत म्हूण जाहीर प्रगटणी करूंक, बरोवपी नम्रतायेन खतखतींत मागणी देवाचे लागीं करतना दिसता. निमाणें इतलेंच गोंयकारा पासत पाद्री आग्नेल हो एक लखलखीत फोलेर जावन आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
