भांगरभूंय | प्रतिनिधी
मुरगांव : मुरगांव सड्या वयल्या गोंय पुनर्वसन मंडळाचे वसणुकेंत दोन भावां मदीं दुचाकी वयल्यान जाल्ल्या झगड्यांत व्हडल्या भावाचो मदल्या भावान चाकू तोंपून खून केलो.
आपली दुचाकी घेवन गेल्ले खातीर व्हडल्या भावान श्रीकांत बसवराज किवारी हाणें मदलो भाव ल्लिकार्जून बसवराज किवारी हाका जाब विचारलो. तेन्ना दोगां मदीं आकांताची झगडीं जालीं. ह्या झगड्यांत मल्लिकार्जून हाणें आपल्या व्हडल्या भावाच्या हड्ड्याचेर आनी पोटाचेर चाकवान वार केलो. तातूंत गंभीर जखमी जालो. गंभीर जखमी अवस्थेंतल्या श्रीकांताक ताकतिकेन दाबोळी – चिखली उपजिल्हो हॉस्पिटलांत दाखल केलो. थंयच्या दोतोरांनी ताचेर ताकतिकेन उपचार सुरू केले. उपचार चालू आसतना श्रीकांताचे व्हड प्रमाणांत रगत गेल्ल्यान ताका मरण आयलें. श्रीकांत किवारी (51) हाका खून केल्ल्या प्रकरणांत मल्लिकार्जूनान पुलिसांनी ताब्यांत घेतला.
मुरगांव पुलिसांनी दिल्ले म्हायती प्रमाण, बिरेस्तारा 13 मार्चाक होळी उत्सवा दिसा गोंय पुनर्वसन मंडळाचे एके इमारतींत दुसऱ्या माळ्यार रावपी किवारी भावां मदीं रातच्या 10.30 वरांच्या सुमाराक आकांताची झगडीं जालीं. श्रीकांता कडेन दोन दुचाकी आसात. तातूंतली अॅक्टिव्हा स्कुटर मल्लिकार्जून घेवन गेलो. हाचे वयल्यान तांची झगडीं पेटलीं. ह्या वेळार मल्लिकार्जूनान श्रीकांताचेर चाकवान हल्लो केलो. तातूंत श्रीकांत गंभीर जखमी जालो. गंभीर अवस्थेंत ताका हॉस्पिटलांत व्हेलो. थंय उपचार चालू आसतना चड प्रमाणार रगत गेल्ल्यान ताका मरण आयलें.
घडणुकेची म्हायती मेळटाच पुलीस घडणुकेचे सुवातेर गेले आनी पळोवणी केली. श्रीकांताक अपघात जाला, अशें पयलीं पुलिसांक सांगलें. उपरांत पुलिसांनी आशिकुशीच्या लोकां कडेन चवकशी केली तेन्ना खरी गजाल मुखार आयली.
श्रीकांताची कूड पोस्टमार्टमा खातीर मडगांव जिल्हो हॉस्पिटलांत धाडल्या. ह्या खून प्रकरणांत मुरगांव पुलीस स्टेशनाचे निरिक्षक धिरज देविदास फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
