भावने परस कर्तव्य श्रेश्ट

भांगरभूंय | प्रतिनिधी

कांय दिसां आदीं चंदिगड विमानतळाचेर सीआयएसएफची सुरक्षा रक्षक कुलविंदर कौर हिणें नवीच वेंचून आयिल्ली खासदार कंगना रणावत हिच्या कानसुलार मारलें. हे घडणुकेचेर देशभरांतल्यान प्रतिक्रिया आयल्यो.
अभिनेत्री कंगना रणावत इतली तर्क नाशिल्ली, अर्थ नाशिल्ली बडबड करता, तिचेर थापट मारूंक जाय हें दिसप सभावीक. पूण तें खऱ्यांनीच मारप? ना. थापट मारप हें खंयच्याच चुकीचें समाधान न्हय. कांय म्हयन्यां आदीं कंगनान एक विधान केल्लें की आमकां स्वातंत्र्य 2014 त मेळ्ळें. 1947 मेळिल्ली ती भीक.
हें असलें बेजबाबदार वक्तव्य करपी मनीस एक वा दोन थापटांनी सुदारूंक शकता? ज्या देशांत सादारण मनशाक मीठ लेगीत मेळनाशिल्लें, तें मेळोवपाक महात्मा गांधीजी हांकां मिठाचो कायदो भंग करचो पडलो. ह्या सत्याग्रहांत वांटेकारी जाल्ल्यांक आनी गांधीजींक बंदखणींत घाल्ले. ज्या इंग्रजांनी आमच्याच देशांत तयार जावपी मिठाचेर कर लायिल्लो, त्या राजवटींतल्यान मेळिल्ल्या स्वातंत्र्याक ‘भीक’ म्हणपी ही बायल कितली नेणार आनी अज्ञानी हाची कल्पना करात. ती नेणार देखून तिणें सामान्य ज्ञान स्वताच मेळोवपाक जाय. थापट खावन तें मेळपाक शकना.
दुसरें अशेंच बेजबाबदार विधान तिणें आंदोलनाक बशिल्ल्या शेतकारांचेर केल्लें. त्या आंदोलनांत ह्या कुलविंदर कौर हिची आवय बशिल्ली. त्याच रागान तिणें थापट मारलें.
असो एक गट आसा जांणी ह्या शेतकारांक ‘आतंकवादी, देश विरोधी’ म्हणले. हेच लोक गांधी जयंती वा गांधीजींची पुण्यतीथ आयली म्हणटकच गोडसेचें गुणगान गायतात. अहिंसा सदांच उपेगाक येना, देखून धर्माचें रक्षण करपाक गोडसेन हातांत बंदूक घेतिल्लें अशें कित्या कितेंय बडबडटात. पूण ह्या थापटाचें मात तांकां वायट दिसलें.
कोणाकूय राग आयलो वा मतभेद जालें म्हूण दुसऱ्याक मारपाचो, तोवूय बी जितो मारपाचो अधिकार कोणाकूच ना. मुखारलो व्यक्ती हात उबारना, तरीय ताका मारप, निशस्त्र मनशाचेर शस्त्र चलोवप, हत्त्या करप हांचें समर्थन करप समा न्हय आनी तें कोणेंच करचें न्हय. आतां गांधीजींच्या हत्त्येचें समर्थन करप्यांक हें कळ्ळां आसतलें. एक बायल वा दादलो जेन्ना विमानतळाचेर वता तेन्ना थंय आपूण पूर्णपणान सुरक्षित आसा हाची खात्री ताका आसता. पूण जेन्ना विमानतळार एक सुरक्षा रक्षक वैयक्तीक राग काडटा आनी दुसऱ्याक मारता हें चूक.
कुलविंदर कौर हिचो थापट मारतकच राग निवळ्ळो? ना. तें थापट खावन कंगना सुदारतली? अजिबात ना. जें कृत्य करून परिस्थिती सुदारची ना, कसलोच बदल जावचो ना जाल्यार तें कित्याक करप? कंगना विशीं कितलोय राग भितर खतखतलो तरी तिचेर थापट मारप चूक. भावने परस कर्तव्य श्रेश्ट.