भांगरभूंय | प्रतिनिधी
अरे तूं चलो मरे? मागीर चलये भशेन किदें रडटा? “अगो बायले वरवीं ल्हवूच हांस गो, दादल्या भशेन किते हां.. हां.. करून हांसता?” असलीं लिंगभेदी विधानां तुमी आयकल्यांच आसतलीं आनी ह्या विधानांनी तुमच्या खोल मनांत मनशांच्या भावनांक लेगीत लिंग आसता! हें खंय ना खंय पटोवन दिलांच आसतलें, after all ती आमच्या समाजाची रुढी-परंपरा. पूण भावनांक लिंग आसना. भावना दर मनशाक व्यक्त करपी एक साधन आनी आपली भावना व्यक्त करपाक दर मनशाक पुराय अधिकार आसा. मागीर तो चलो जावं वा चली. चलो म्हूण तांणी रडचे न्हय, आपलीं दुकां दोळ्यांत सांठोवन तीं आटोवपाचीं, तीं गालार गळूंक फावना हें आमकां भुरगेपणांतच शिकयतात. मागीर अखेरेक चलो होवूय मनीस आनी ताच्यांतय काळीज आसता हें समाज विसरता काय? असो म्हज्या मनाक प्रस्न पडटा. तशेंच चलयेन व्हडा – व्हडान हांसप न्हय, तोंडार हात दवरून मुरमुरखेंच हांसप ही एक समाजान तयार केल्ली लिंगभेदाची लक्ष्मण रेखा, ती लांगल्यार कसले पाप लागतले काय? समाजाचे? काय शिक्षीत शरीर आनी अशिक्षीत मनाचे??
एकदा म्हज्या ल्हान भावान रांदपाचीं खेळणीं काडलीं आनी तो खेळूंक लागलो. बरीं पानां शिंदून आपल्या खेळण्याचे चुलीर शिजोवंक दवरली आनी अकस्मात आवयन ती काडून घेवन,” बाबू तूं चलो मरे? बॉल हाडला तो घेवन खेळ. हें कितें चलयां भशेन रांदच्यांनी खेळटां? ” ह्या तिच्या संवादांत बाबूची भाजी आनी रांदपाची तळमळ दोनूय करपून गेली. हाकाच लागून घडये कांय चले व्हडले जातकच रांदपाची उमेद आसल्यार लेगीत आपली ही भावना काळजाच्या कुरकुटांत लिपोवन दवरतात. तशेंच घरांतले दोन दादले उलयतना बायलांनी तोंड घालप नासता हो रुढीवादी समज बायलांक आपलीं मतां, आपले उत्फर्के काळजांतच गिळून उडोवपाक लायतात आनी फुडें आपल्या खातीर आवाज उबारूंक ती असमर्थ थारतात.
आमी समाज म्हणून खंय चुकतात कांय? हो प्रस्न तुमकां केन्नाच पडना? हीं लिंगाचीं अमूर्त बंधनां आमी भावनांकय दसोवंक लागल्यात अशें तुमकां दिसना?? काय हेंवूंय आमकां संवयेचें जालां?
ताकाच लागून हीं अर्मूत बंधनां मूर्त रुपांत येवचे पयलीं आमकां अश्या भावनांक लिंग लावपी चिंतनांक खंय तरी पूर्ण विराम दिवचोच पडटलो, आमी तरणाट्यांनी तरी! आनी हातूंतली गंभीरताय समजून घेवची पडटली नाजाल्यार आमकां तयार करपी सैम लेगीत बायलां भितर एक आनी दादल्यां भितर एक अशीं दोन वेग-वेगळीं काळजां बसोवन धाडटा आसलो.
देविता खुळे
9765978075
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
