भांगरभूंय | प्रतिनिधी
भारतान अॅजबॅस्टन टॅस्टींत 244 धांवड्यांची आघाडी घेतल्या. तिसऱ्या दिसाचो खेळ सोंपलो त्या वेळार भारतान आपल्या दुसऱ्या डावांत 1 विकेटी व्हगडावन 64 धांवड्यो केल्ल्यात. भारतान दुसऱ्या डावाक जलद सुरवात केल्ली. पूण, यशस्वी जयस्वाल 22 बॉलांनी 28 धांवड्यो करून बाद जालो. तिसऱ्या दिसाचो खेळ सोंपलो त्या वेळार लोकेश राहुल 28 आनी करुण नायर 7 धांवड्यांचेर नाबाद आशिल्लो. इंग्लंडाचो पयलो डाव 407 धांवड्यांचेर सोंपलो.
जेमी स्मिथान 80 बॉलांनी शेंकडो नोंदोवन इंग्लंडाचो डाव सांबाळ्ळो. इंग्लंडा वतीन टॅस्ट क्रिकेटींतलो जोड रितीन तिसरो जलद शेंकडो थारलो. तिसऱ्या दिसाच्या पयल्या सत्रांत इंग्लंडान 5 विकेटी व्हगडावन 249 धांवड्यो केल्ल्यो.
हॅरी ब्रुकान लेगीत 158 धांवड्यांची खेळी केली. अंदूंच्या हंगामांतलो ताचो हो णणवो शेंकडो आशिल्लो. स्मिथ आनी ब्रुक हांणी च्या च्या विसवा मेरेन इंग्लंडाक बरे स्थितींत हाडिल्लो. नवो बॉल घेवचे पयलीं भारताची बॉलींग अती सामान्य दिसताली. पूण, भारतान नवो बॉल घेतलो आनी हाचो फायदो तांकां जालो. आकाशदीपान ब्रुकाक बोल्ड करून स्मिथा वांगडची 303 धांवड्यांची भागिदारी फोडली. ते उपरांत विकेटी पडप सुरू जाल्यो. इंग्लंडान आपल्यो निमाण्यो पांच विकेटी फकत 52 धांवड्यांनी व्हगडायल्यो. मोहम्मद सिराजान इंग्लंडांत पयले खेपे एका डावांत पांच विकेटी घेतल्यो. ताणें 70 धांवड्यो दिवन 6 विकेटी घेतल्यो. आकाशदीपान 88 धांवड्यो दिवन 4 विकेटी मेळयल्यो. स्मिथ 184 धांवड्यांचेर नाबाद उरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
