भांगरभूंय | प्रतिनिधी
भारताच्या युवा ब्रिगेडीन 19 वर्सां पिराये सकयले संवसारीक सर्तीचे दुसरे समी फायनलींत इतिहास रचलो. अफगाणिस्तानान दिल्लें 311 धांवड्यांचें आव्हान भारतान सहज पेललें आनी 7 विकेटींनी जैत जोडून फायनलींतली सुवात निश्चीत केली.
19 वर्सां पिराये सकयले संवसारीक सर्तीच्या इतिहासांत हो सगल्यांत व्हड येसस्वी रन चेस थारलो. ह्या जैता सयत भारतान विक्रमी 10वे खेपे फायनलींत सुवात मेळयली. फायनलींत तो इंग्लंडा आड खेळटलो.
अॅरोन जॉर्जाचो वादळी शेंकडो
311 धांवड्यांचे व्हड मोखीचो फाटलाव करपी भारताच्या बॅट्समनांचेर मातूय चेपण दिसूंक ना. ओपनर वैभव सूर्यवंशीन फक्त 33 बॉलांनी 68 धांवड्यांची आक्रमक बॅटींग केली आनी भारताक जबरदस्त सुरवात करून दिली. ते उपरांत अॅरोन जॉर्जान डावाची सगलीं सुत्रां आपल्या हातांत घेतलीं. ताणें फक्त 95 बॉलांनी शेंकडो पूर्ण केलो. ताणें 115 धांवड्यांची खेळी केली. ताका मुखेली आयुष म्हात्रेन (62) मोलादीक साथ दिली. तांचे मदीं 100 परस अदीक धांवड्यांची भागिदारी जाली. अखेरच्या टप्प्यांत विहान मल्होत्रा (38) आनी वेदांत त्रिवेदी (5) हांणी भारताच्या जैताची औपचारीकताय पुराय केली.
अफगाणिस्तानाची चिवट बॅटींग
ते पयलीं, टॉस जिखून पयलीं बॅटींग करपी अफगाणिस्तानान 50 ओव्हरींनी 4 विकेटी व्हगडावन 310 धांवड्यांचो दोंगर उबारलो. फैसल शिनोजादान 110 धांवड्यांची जाल्यार उजईरुल्लाह नियाजाईन 86 बॉलांनी नाबाद 101 धांवड्यांची खेळी केली. दोगांयनी 148 धांवड्यांची भागिदारी करून भारताच्या बॉलरांक बरोच घाम काडलो. भारता वतीन दीपेश देवेंद्रन आनी कनिष्क चौहान हांणी 2-2 विकेटी घेतल्यो.
भारताचो 10वो फायनल प्रवास
19 वर्सां पिराये सकयले संवसारीक सर्तीच्या इतिहासांत भारत सगल्यांत येसस्वी पंगड थारलो. भारतान अजून मेरेन 5 खेपे (2000, 2008,2012, 2018 आनी 2022) वस्तादपण जोडलां. जाल्यार चार खेपे उप वस्तादपणाचेर समाधान मानलां. 2024चे फायनलींत ताका ऑस्ट्रेलिया पंगडा आड हार घेवची पडिल्ली. ते उपरांत अंदूं तो परतून फायनलींत पावला.
थोडे भितर धांवतकटोः
अफगाणिस्तान: 50 ओव्हरींनी 4 बाद 310 धांवड्यो (फैसल शिनोजादा 110, उजईरुल्लाह नियाजाई नाबाद 101)
भारत: 41.4 ओव्हरींनी 3 बाद 311 धांवड्यो (अॅरोन जॉर्ज 115, वैभव सूर्यवंशी 68, आयुष म्हात्रे 62).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
