भारत सोंप्या जैता सयत सेमींत

भांगरभूंय | प्रतिनिधी

नेपाळ पंगडाक 82 धांवड्यांनी हारोवन भारतान आशिया करंड क्रिकेट टी-20 सर्तीचे सेमी फायनलींत सुवात मेळयली. भारताचें हें सेगीत तिसरें जैत थारलें. ह्या जैतान भारतान अ गटांतली आपली पयली सुवात घट्ट केली.

भारताच्या जैतांत शेफाली वर्मा (81) आनी दयालन हेमलता (47) हांची म्हत्वाची भुमिका आशिल्ली. बॉलिंगेंत भारता वतीन दिप्ती शर्मान 13 धांवड्यो दिवन सगल्यांत चड तीन विकेटी घेतल्यो.

नेपाळाक सेमी फायनलींत सुवात मेळोवपाक आनी भारता परस बरी नेट रनरेट करपाक मेळिल्ली मोख 10.2 ओव्हरींनी मेळोवपाक जाय आशिल्ली. पूण, नेपाल 20 ओव्हरी खेळ्ळो खरो पूण, ताका मोखीच्या लागसार पावपाक लेगीत जमलें ना.

भारताच्या ह्या जैतान पाकिस्तानाक लेगीत फायदो जालो. नेपाळ हारिल्ल्यान पाकिस्तान लेगीत सेमी फायनलीक पात्र जालो. पाकिस्तानान तिनांतल्यो दोन मॅची जिखला. फकत भारता आड ताका हार घेवची पडिल्ली. ताका लागून अ गटांत ताका दुसरे सुवातेर समाधान मानचें पडलें.

भारतान दिल्ले 178 धांवड्यांचे मोखीचो फाटलाव करतना नेपाळाक 9 विकेटी व्हगडावन फकत 96 धांवड्यो करप शक्य जाल्यो.

ते आदीं भारतान पयलीं बॅटींग करतना 20 ओव्हरींनी विकेटी व्हगडावन 178 धांवड्यो केल्यो. ओपनर शेफाली वर्मान जबरदस्त बॅटींग करतना अर्द शेंकड्याची नोंद केली.

हे मॅची खातीर पंगड वेवस्थापनान सदची मुखेली हरमनप्रीत कौर हिका विसव दिल्लो. तिचे गैरहाजेरेंत स्मृती मंधानाक फुडारपण केलें. शेफाली वांगडा डावाची सुरवात स्वता येनासतना दयालन हेमलताक धाडली.

दोगांयनी सुरवाती सावन आक्रमक बॅटींग केली. हेमलतान सांबाळून बॅटींग केली जाल्यार शेफालीन आक्रमक बॅटींग केली. हेमलताक फकत तीन धांवड्यांनी अर्द शेंकडो चुकलो. पांच चवके आनी एक सक्या सयत तिणें 47 धांवड्यो केल्यो.

दुसरे वटेन शेफाली फॉर्मांत दिसताली. तिचो खेळ पळयलो जाल्यार ती निश्चीत रितीन शेंकडो पुर्ण करतली अशें दिशिल्लें. पूण, 16वे ओव्हरींत ती बाद जाली. तिणें 48 बॉलांनी 12 चवके आनी एका सक्याचे मजतीन 81 धांवड्यो केल्यो.

तिच्या उपरांत एस सजनान 10 धांवड्यो करून बाद जाली. जेमिमाहान 15 बॉलांनी नाबाद 28 धांवड्यो केल्यो आनी भारताक 178 मेरेन पावयलो.

नेपाळा वतीन सीता राणा मगरान 2 विकेटी घेतल्यो. कबिता जोशीक एक विकेट फावो जाली.