भांगरभूंय | प्रतिनिधी
भारताक बायलांचे हॉकी क्वॉलिफायराचे सेमी फायनलींत जर्मनी पंगडा कडल्यान सडन डॅथ-2त 2 (4) -2 (3) अशा फरकान हार घेवची पडली. हे हारी उपरांत भारताक तिसरे सुवाते खातीर जपाना आड खेळचें पडटलें. सर्तींत पयल्यो तीन सुवातो मेळोवपी पंगडांक पॅरीस ऑलिम्पिकाची तिकट मेळटली.
राचींत जाल्ली सेमी फायनल निर्धारीत वेळांत 2-2 अशी बरोबरींत उरिल्ली. ताका लागून जैतिवंत पंगड थारावपा खातीर पॅनल्टी शुटआवटाचो आदार घेवचो पडलो. पॅनल्टी शुटआवटांत दोनूय पंगड 3-3 अशे बरोबरींत उरल्या उपरांत मॅच सडन डॅथांत गेली.
ते पयलीं भारतान 60व्या मिनटांत पॅनल्टी कॉर्नराचेर गोल करून फायनल हुटरांत 2-2 अशी बरोबरी सादली. 58व्या मिनटा मेरेन भारत 1-2 असो फाटीं आशिल्लो.
भारता वतीन 15व्या मिनटाक दीपिकान पॅनल्टी कॉर्नराचेर जाल्यार 49व्या मिनटाक इशिका चौधरीन पॅनल्टी कॉर्नराचेर गोल केलो. जर्मनी वतीन दोनूय गोल चार्लोट स्टॅपेनहॉर्स्टान केले. पयलो गोल 27व्या मिनटाक जाल्यार 57व्या मिनटाक गोल केलो.
भारतान आपले निमाणे लीग मॅचींत इटली पंगडाक 5-1 अशा फरकान हारोवन सेमी फायनलींतली सुवात निश्चीत केल्ली. पॅरीस ऑलिम्पिका खातीर ऑस्ट्रेलिया, अर्जेंटिना, नॅदरलॅण्ड, दक्षीण आफ्रिका आनी चीन ह्या पंगडांनी आपली सुवात पयलींच निश्चीत केल्या. ऑलिम्पीक क्वॉलिफायर एकांतल्यान तीन आनी ऑलिम्पिक क्वॉलिफायर दोनांतल्यान तीन पंगड ऑलिम्पिकाक पात्र जातले.
भारत हारलो तरी पॅरीस ऑलिम्पिकाक पात्र जावपाची अजून संद आसा. तिसरे आनी चवथे सुवाते खातीर आयज भारत आनी जपान ह्या पंगडां मदीं मॅच जातली. ही मॅच जिखली जाल्यार भारताची ऑलिम्पिकाची तिकेट निश्चीत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
