भांगरभूंय | प्रतिनिधी
भारताचें 19 वर्सां पिराये सकयले आशिया करंड क्रिकेट सर्तीचें आव्हान सोंपलें. हांगाच्या आयसीसीए मैदानाचेर जाल्ले दुसरे सेमी फायनलींत भारताक बांगलादेशा कडल्यान 4 विकेटींनी हार घेवची पडली.
बांगलादेशान टॉस जिखून भारताक पयलीं बॅटींग करपाचें आमंत्रण दिलें. भारतान 42.4 ओव्हरींनी सगल्यो विकेटी वगडावन फकत 188 धांवड्यो केल्यो. बांगलादेशान मोखीचो फाटलाव करतना 42.5 ओव्हरींनी 6 विकेटी वगडावन 189 धांवड्यो करून जैत जोडलें.
मजगतीं, पयले सेमी फायनलींत युएई पंगडान पाकिस्तानाक 11 धांवड्यांनी हारयलो. पयलीं बॅटींग करतना युएईन सगल्यो विकेटी वगडावन 193 धांवड्यो केल्यो. मोखीचो फाटलाव करपाक मैदानांत देंवपी पाकिस्तानाक 182 मेरेन मारप शक्य जालें. युएई आनी बांगलादेश ह्या पंगडां मदीं फायनल जातली.
भारताच्या बाबत प्रदर्शनाचें मुखेल कारण टॉप ऑर्डर थारलें. डावाची सुरवात करपी आदर्श सिंगाक 2 आनी अर्शिन कुलकर्णीक एक धांवडी करप शक्य जालें. प्रियांशू मोलियाक 19 धांवड्यो करप शक्य जाल्यो. जाल्यार मुखेली उदय सहारन खातें उगडिनासतना तंबूंत परतलो. चार विकेटी पडल्या उपरांत मुशीर खानान अर्द शेंकड्याची नोंद करून डाव सांबाळ्ळो. मुरुगन अभिषेकान 62 धांवड्यांची खेळी केली. ह्या दोगांक लागून भारताक 200च्या लागसार पावप शक्य जालें.
बांगलादेशा वतीन मुरुफ मृदान चार विकेटी घेतल्यो. रोहानत आनी शेख जीबन हांकां 2-2 विकेटी फावो जाल्यो. महफुजूर रहमानाक एक विकेट मेळ्ळी.
मोखीचो फाटलाव करपी बांगलादेशाची लेगीत बरी सुरवात जाली ना. ओपनर अशिकुर रहमान 7 आनी जिशान आलम शुन्याचेर बाद जालो. तिसरे सुवातेर बॅटिंगेक आयिल्ल्या मोहम्मद रिजवानाक 13 धांवड्यो करप शक्य जाल्यो.
बांगलादेशान एका वेळार 34 धांवड्यांचेर 3 विकेटी पडिल्ल्यो. अशा वेळार अरिफुल इस्लाम आनी अहरार अमीन हांणी डाव सांबाळ्ळो. दोगांयनी 138 धांवड्यांची भागिदारी केली. अरिफुलान 90 बॉलांनी 94 धांवड्यो केल्यो. अहरार अमीनान ताका योग्य रितीन साथ दितना 101 बॉलांनी 44 धांवड्यो केल्यो.
आयतारा म्हणल्यार 17 डिसेंबराक बांगलादेश आनी युएई हांचे मदीं फायनल जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
