भांगरभूंय | प्रतिनिधी
दलीप ट्रफीचे पयले फेरयेंत मावन सुथारान जबरदस्त बॉलींग केल्ली. ताणें सात विकेटी घेवन भारत सी पंगडाक जैत मेळोवन दिवपाक मोलादीक योगदान दिल्लें. आतां दुसरे फेरयेंत आपले बॅटिंगेंतली कुशळटाय दाखयतना 82 धांवड्यांची उत्कृश्ट खेळी केली. ताका लागून भारत सी पंगडाक 525 धांवड्यांचो दोंगर उबारपाक शक्य जालें.
भारत सी पंगडाच्या धांवड्यांक जाप दितना भारत बी पंगडान लेगीत बरी सुरवात केली. दुसऱ्या दिसाचो खेळ सोंपलो त्या वेळार भारत बी पंगडान बिनबाद 125 धांवड्यो केल्ल्यो.
पयल्या दिसाचो खेळ सोंपिल्लो त्या वेळार मानव वैयक्तीक आठ धांवड्यांचेर खेळटालो. दुसऱ्या दिसा ताणें कांय आकर्शक शॉर्टस मारले. सकयले सुवाते वयले सुवातांचेर बॅटींग करपी बॅट्समनां वांगडा ताणें कांय म्हत्वाच्यो भागिदाऱ्यो केल्यो आनी पयले श्रेणीचे कारकिर्दींतलो चवथो अर्द शेंकडो मारलो. पूण, ताका 18 धांवड्यांनी शेंकडो चुकलो.
भारत सी वतीन मानव आनी इशान किशन हांच्या उत्कृश्ट बॅटिंगे खेरीत बाबा इंद्रजीत आनी ऋतुराज गायकवाड हांणी लेगीत अर्द शेंकडे मारले. तशेंच हरयाणाच्या अश्टतासांच्या अंशुल कंबोजान 27 बॉलांनी 38 धांवड्यांची जलद खेळी केली. तशेंच मानवा वांगडा 56 धांवड्यांची भागिदारी लेगीत केली.
मानवा वांगडा राजस्थाना वतीन खेळपी राहुल चाहरान भारत बी वतीन सगल्यांत चड चार विकेटी घेतल्यो. जाल्यार मुकेश कुमारान चार विकेटी मेळयल्यो.
भारत बी वतीन अभिमन्यू ईश्वरनान हे मॅचींत सादूरतायेन बॅटींग केली. तो 51 धांवड्यांचेर खेळटा. ताणें 91 बॉलांनी चार चवके आनी एक सको मारलो. आयज तिसऱ्या दिसा तो आपलो 24वो पयले श्रेणींतलो शेंकडो पुर्ण करपाक इत्सूक आसतलो. जाल्यार नारायण जगदीशन 67 धांवड्यांचेर खेळटा. नारायणाक ऋषभ पंताचे सुवातेर घेतला.
भारत ए दुसऱ्या डावांत 1 बाद 115
भारत डी आड चालू आशिल्ले दुसरे फेरयेंतली मॅचींत भारत ए पंगडान आपली पकड घट केल्या. दुसऱ्या दिसाचो खेळ सोंपलो त्या वेळार भारत ए पंगडान 1 विकेट व्हगडावन 115 धांवड्यो केल्ल्यो. अशे तरेन पयल्या डावाच्या आदाराचेर ताची वट्ट आघाडी 222 धांवड्यांची जाल्या.
ओपनर प्रथम सिंह 59 धांवड्यो करून खेळटा. मयंक अगरवाल 56 धांवड्यो करून बाद जालो. ते पयलीं भारत ए पंगडान भारत डी पंगडाक पयल्या डावांत फकत 183 धांवड्यांचेर बाद केल्लो. भारत डी वतीन देवदत्त पडिक्कलान 92 धांवड्यांची खेळी केली. भारत ए वतीन खलील अहमद आनी आकीब खान हांणी 3-3 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
