भारत सरकारान 16 पाकिस्तानी युट्युब चॅनलांचेर घाली बंदी
भांगरभूंय | प्रतिनिधी
नवी दिल्ली, खबरां संस्था ः पहलगाम आतंकवादी हल्ल्या उपरांत देशभरांत तणावाचें वातावरण निर्माण जालां. पाकिस्ताना आड भारत सरकार आक्रमक जालां. केंद्र सरकार वेगवेगळे म्हत्वाचें निर्णय घेवन हाचेर कारवाय करतात. हे फाटभुंयेर गृह मंत्रालयाचे शिफारशी प्रमाण म्हायती आनी प्रसारण मंत्रालयान 16 पाकिस्तानी युट्युब चॅनलांचेर बंदी घाल्या. हे चॅनल भारत, भारतीय सैन्य, धर्मीक नदरेन फूट घालपी आनी सुरक्षा एजन्सी आड चुकीची म्हायती पातळायिल्ले खातीर ही कारवाय केल्या.
ह्या बंदी घाल्ल्या युट्युब चॅनलांत पाकिस्तानांतले डॉन न्यूज, समा टीव्ही, एआरवाय न्यूज, जियो न्यूज सारकिल्ल्या मुखेल खबरां चॅनलांचो आस्पाव आसा. हे चॅनल भारता आड तशेंच भारतीय लश्करी आनी सुरक्षा एजन्सी विशीं चुकीची म्हायती पातळायताले. ताका लागून देशाचे शांततायेक आनी समाजीक एकचाराक धोको निर्माण जालो. विशेश म्हळ्यार पत्रकार इर्शाद भट्टी, आस्मा शिराजी, उमर चीमा आनी मुनीब फारूख हांच्या युट्युब चॅनलांचेरूय बंदी घाल्या. हेर बंदी घाल्ल्या चॅनलांत द पाकिस्तान रेफरन्स, समा स्पोर्ट्स, उजैर क्रिकेट आनी राझी नामा तशेंच आदलो पाकिस्तानी क्रिकेट खेळगडो शोएब अख्तर हांच्याय चॅनलाचो आस्पाव आसा.
गृह मंत्रालयान सांगिल्ले प्रमाण, ह्या चॅनलांनी पहलगाम हल्ल्या उपरांत भारता आड चुकीची म्हायती पातळावपाचो यत्न केलो. हे फाटभुंयेर भारत सरकारान बेगोबेग कारवाय करून म्हायती तंत्रज्ञान कायदो आनी हेर संबंदीत कायद्या खाला ह्या चॅनलांचेर बंदी घाली. म्हायती प्रमाण, ह्या बंदी घाल्ल्या 16 युट्युब चॅनलांचो भारतांत 6.38 कोटी इतलो व्हड सबस्क्रायबर बेस आसा. हाका लागून ह्या चॅनलांक व्हड अर्थीक फायदो जातालो. पूण आतां म्हायती आनी प्रसारण मंत्रालयान कारवाय केल्ल्यान ह्या चॅनलांक व्हड अर्थीक धपको बसपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
