भांगरभूंय | प्रतिनिधी
नवी दिल्ली, खबरासंस्था ः फाटले दोन दीस कॅनडांत हरदीप सिंग निज्जर हाच्या खुनाची चर्चा संवसारभर चालू आसा. कारण कॅनडान ह्या खून प्रकरणांत भारताचो हात आशिल्ल्याचो आरोप केला आनी चवकशी सुरू केल्या. हे फाटभुंयेर दोनूय देशां मदले संबंद इबाडपाक लागल्यात. अमेरिका आनी ऑस्ट्रेलिया हे दोनूय देश कॅनडाचे वटेन रावल्यात जाल्यार भारतान कॅनडाच्या आरोपांक जाप दिवप चालूच दवरलां. दोनूय देशांनी एकामेकांच्या वरिश्ठ अधिकार्यांक भायर काडले जाल्यार आतां भारतान व्हडलो निर्णय घेतला.
कॅनडांत व्हिसा सेवा बंद
खलिस्तानी समर्थक हरदीप सिंग निज्जरच्या खून प्रकरणा वयल्यान कॅनडाचे प्रधानमंत्री जस्टिन ट्रुडो हांणी भारताचेर गंभीर आरोप केल्या उपरांत हो वाद सुरू जालो. आतां भारत सरकारान कॅनडांतली भारताची व्हिसा सेवा तात्पुरती बंद केल्या. फुडली सुचवणी मेळ मेरेन ही सेवा बंद उरतली, अशें कॅनडांतल्या व्हिसा केंद्राच्या संकेत थळार नमूद केलां. भारतांतल्यान कॅनडांत वचपी आनी कॅनडांतल्यान भारतांत येवपी जायते भारतीय आनी कॅनेडियन नागरिकांक ह्या निर्णयाचो फटको बससपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
