भांगरभूंय | प्रतिनिधी
नवी दिल्ली, खबरां संस्था ः भारत हो संवसारांतलो चवथो सगळ्यांत तरणाटो देश. हे वळेरेंत नायजेरिया पयलो, फिलीपायन्स दुसरो आनी बांगलादेश तिसरें क्रमांकाचेर आसा. पूण अशें आसलें तरी देशांत जाण्टेपणूय नेटान वाडत आसा ही हुस्क्याची गजाल. देशाची सरासरी पिराय 2024 वर्सा 28-29 वर्सां मेरेन वाडली. 2021 वर्सा फकत 24 वर्सां आशिल्ली. म्हणल्यार फकत 3 वर्सांत सरासरी पिराय सुमार 5 वर्सांनी वाडल्या. हाचो अर्थ लोकसंख्येंत जाण्टे लोकांचो आंकडो नेटान वाडत आसा आनी तरणाट्यांचो आंकडो उणो जायत आसा.
हाचें सगळ्यांत व्हडलें कारण म्हणल्यार देशांतली लोकसंख्या वाड 2024 वर्सा 1% मेरेन पावतली. 1951 उपरांतलो हो सगळ्यांत उणो आंकडो. तेन्ना तो 1.25% आशिल्लो. 2011 वर्सा देशाची लोकसंख्या 121.1 कोटी आशिल्ली. आतां ती वाडून सुमार 142 कोटी जाल्या. एसबीआयच्या लोकसंख्येचेर आदारिल्ल्या ताज्या संशोधन अहवालांत असो अदमास काडला.
अदमासा प्रमाण 2011 ते 2024 ह्या काळांत देशांतल्या लोकसंख्येंत जाण्ट्यांचो वांटो सुमार 2% वाडलो. 2024 वर्सा 10.6% लोक म्हळ्यार 15 कोटी लोक जाण्टे जातले. 2011 वर्सा 8.6% म्हळ्यार 10.4 कोटी आशिल्ले. तशेंच 0-14 वर्सां पिरायेच्या गटाचो लोकसंख्येचो वांटो 2024 वर्सा 24.3% मेरेन उणो जाला. 2011 वर्सा 30.9% आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
