भांगरभूंय | प्रतिनिधी
बायलांचे आशिया करंड टी-20 क्रिकेट सर्तीची फायनल सध्याचो वस्ताद भारत आनी येजमान श्रीलंका ह्या पंगडां मदीं जातली.
पयले सेमी फायनलींत भारतान बांगलादेशाक 10 विकेटींनी हारयलो, जाल्यार दुसरे सेमी फायनलींत श्रीलंकेन पाकिस्ताना आड 3 विकेटींनी जैत जोडलें.
मजगतीं, भारतान पयले सेमी फायनलींत ताणें बांगलादेशाक 10 विकेटींनी हारयलो.
टॉस जिखून पयलीं बॅटींग करपी बांगलादेशाक व्हड स्कोर उबारपाक अपेस आयलें. ताका निर्धारीत 20 ओव्हरींनी 8 विकेटी व्हगडावन फकत 80 धांवड्यो करप शक्य जाल्यो. ताणें दिल्ली 81 धांवड्यांची मोख भारतान 11 ओव्हरींनी एकूय विकेट व्हगडायनासतना 83 धांवड्यो करून मेळयली. स्मृती मंधानान नाबाद 55 आनी शेफाली वर्मान नाबाद 26 धांवड्यो केल्यो.
हे मॅचींत दोगांनी जबरदस्त प्रदर्शन केलें. पयलीं फास्ट बॉलर रेणुका ठाकूर तिणें चार ओव्हरींनी फकत 10 धांवड्यो दिवन 3 विकेटी घेतल्यो. तिचे भितर येवपी स्विंग बॉलांक तोंड दितना बांगलादेशाच्या बॅटरांक नाकापुरो जालें. हें पळोवन मुखेली हरमनप्रीत कौरान तिच्या कडल्यान सेगीत चार ओव्हरी करून घेतल्यो. तिणें बांगलादेशाचो टॉप ऑर्डर गडगडावन उडयलो. दुसरी हिरो राधा यादव थारली. तिणें मदले फळयेक नाचयली. तिणें 14 धांवड्यो दिवन 3 विकेटी घेतल्यो.
बांगलादेशा वतीन मुखेली निगार सुल्तानान 51 बॉलांनी 32 आनी शोर्ना अख्तरान नाबाद 19 धांवड्यांचें योगदान दिलें. दोगांयनी सातवे विकेटी खातीर 36 धांवड्यांची भागिदारी करून पंगडाक संकश्टांतल्यान भायर काडपाचो यत्न केलो.
भारताचे फिल्डिंगेंत लेगीत सुदारणां पळोवपाक मेळ्ळी. शेफालीन पुजा वस्त्रकराच्या बॉलाचेर राबिया खानाची डायव्ह मारून कॅच धरली.
मॅचींतलो टर्नींग पॉयण्ट म्हणल्यार ठाकूराचो स्पेल. बॅटरांक अनुकूल आशिल्ले खेळपट्टीचेर बांगलादेशान टॉस जिखून पयलीं बॅटींग करपाचो निर्णय घेतलो. पूण, ठाकूराचे बॉलिंगे मुखार बांगलादेशांच्या बॅटरांचें कांयच शाणपण चलूंक ना. तिणें आपल्या पयल्या तीन ओव्हरींनी एकेक विकेट घेतली. ह्या धपक्यातल्यान बांगलादेशाक भायर सरपाक जमलें ना. मदल्या ओव्हरींनी भारताचे स्पिनरान पुर्णपणान आपलो शेक दवरलो.
मजगतीं, दुसरे सेमी फायनलींत श्रीलंकेन पाकिस्तानाक 3 विकेटींनी हारयलो. पाकिस्तानान पयलीं बॅटींग करतना 20 ओव्हरींनी 4 विकेटी व्हगडावन 140 धांवड्यो केल्यो. श्रीलंकेन 19.5 ओव्हरींनी 7 विकेटी व्हगडावन 141 धांवड्यो करून जैत जोडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
