भांगरभूंय | प्रतिनिधी
पणजी: भारत वेंचणूक आयोगान गोंय, गुजरात, केरळ, लक्षद्वीप, मध्य प्रदेश, पद्दुचेरी, राजस्थान, तामिळनाडू, उत्तर प्रदेश, पश्चीम बंगाल, अंदमान आनी निकोबार तशेंच छत्तीसगडांत मतदार एसआयआरचे सुधारीत वेळापत्रक जारी केलां. वेंचणूक आयोगाच्या आदेशा प्रमाण, ह्यान पयलींच्या आदेशाचें अधिक्रमण करीत आयोगान सुरू आशिल्ल्या एसआयआरचे वेळापत्रक बदल्लां. गोंयां सयत १२ राज्यां आनी केंद्रशासीत प्रदेशांत आतां १ जानेवारी २०२६ हे तारखेची अर्हता गृहीत धरून एसआयआर कायारवळ मुखार व्हरतले.
एसआयआरचे सुधारीत टप्पे
ह्या सुधारीत कार्यावळी प्रमाण, मतदार वळेरी पुनरीक्षणाच्या म्हत्वाच्या टप्प्यांचो तपशील निश्चीत केलो. मतदारांची गणना आनी मतदान केंद्रांचें तर्कसंगतीकरण/पुनर्रचणूक करपाचें काम बिरेस्तार ११ डिसेंबर २०२५ मेरेन पुराय करचें पडटलें. उपरांत मतदार वळेरेचो कच्चो मसुदो १२ डिसेंबर २०२५ ते १५ डिसेंबर २०२५ ह्या काळांत तयार जातलो.
मतदार वळेरेचो मसुदो मंगळार १६ डिसेंबर २०२५ दिसा प्रकाशीत करतले. मसुदो प्रसिद्ध जाले उपरांत नागरिक आनी राजकीय पक्ष १६ डिसेंबर २०२५ सावन १५ जानेवारी २०२६ मेरेन दावे आनी आक्षेप दाखल करपाक शकतले. दाखल जाल्ले दावे आनी आक्षेपांची तपासणी, सुनावणी आनी निर्णय ७ फेब्रुवारी २०२६ (शनिवार)मेरेन वेंचणूक नोंदणी अधिकार्यां कडल्यान एकाच वेळार पुराय करतले.
ह्या सगल्या प्रक्रिये उपरांत, मतदार वळेरेंतली भलायकी मापदंडांची तपासणी करून निमाणे प्रसिद्धी खातीर आयोगाची परवानगी १० फेब्रुवारी २०२६ मेरेन घेवप गरजेचें. निमाणें हे सगले प्रक्रिये उपरांत १४ फेब्रुवारी २०२६ (शनिवार) दिसा निमाणी मतदार वळेरी प्रकाशीत करतले. ह्या सुदारीत वेळापत्रका प्रमाण संबंदीत सगले अधिकारी आनी नागरिकांनी हांची नोंद घेवची, अशे आयोगान निर्देश दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
