भारत वतलो इंग्लंडाचे भोंवडेर

भांगरभूंय | प्रतिनिधी

भारताचो क्रिकेट पंगड फुडल्या वर्सा इंग्लंडाचे भोंवडेर वतलो. हे भोंवडेचें वेळापत्रक काल जाहीर केलें. पयली टॅस्ट 20 जूनाक लिड्साच्या हॅडिंग्लेंत जातली. भारतीय क्रिकेट नियामक मंडळान (बीसीसीआय) सोशल मिडियाचेर वेळापत्रकाची घोशणा केली.

भारत पांच टॅस्टींची माळ खेळटलो. दुसरी टॅस्ट 2 ते 6 जुलय मेरेन अॅजबेस्टनांत चलतली तिसरी टॅस्ट इतिहासीक लॉर्ड्स मैदानाचेर 10 ते 14 जुलय मेरेन चलतली, चवथी टॅस्ट 23 ते 27 जुलय मेरेन ऑल्ड टॅफर्डांत आनी निमाणी मॅच 31 जुलय ते 4 ऑगस्ट मेरेन ओव्हल मैदानाचेर चलतली. भारता खातीर ही भोंवडी म्हत्वाची आसा. 2007 सावन भारताक इंग्लंडांत एकूय टॅस्ट माळ जिखपाक जमूंक ना.

2021त विराट कोहलीच्या फुडारपणाखाला भारतान इंग्लंडाची भोंवडी केल्ली. त्या वेळार चार टॅस्टींचे माळेंत भारत 2-1 असो मुखार आशिल्लो. पूण, कोविडाक लागून चवथी रद्द केल्ली आनी ती 2022त खेळयली. ती मॅच भारतान फास्ट बॉलर जसप्रीत बुमराच्या फुडारपणाखाला खेळिल्ली. भारताक सात विकेटींनी हार घेवची पडिल्ली ताका लागून माळ 2-2 अशी बादाबाद उरिल्ली. इंग्लंडांतल्या वातावरणांत खेळप भारताक मात्शें कठीण वता. अशे कठीण परिस्थितींत टॅस्ट माळ जिखपाची भांगराळी संद भारतान व्हगडायली.

मजगतीं, अंदूं इंग्लंडाचो पंगड भारताचे भोंवडेर आयिल्लो. पांच टॅस्टींचे माळेंतली पयली मॅच इंग्लंडान जिखून 1-0 अशी आघाडी घेतिल्ली. पूण, भारतान उरिल्ल्यो चारूय मॅच जिखून माळ 4-1 अशी आपल्या नांवार केल्ली.

मजगतीं, भारताच्या बायलांचो पंगड लेगीत इंग्लंडाचे भोंवडेर वतलो. फुडल्या वर्सा भारत आनी इंग्लंडा मदीं पांच टी-20 आनी तीन वन डे मॅची जातल्यो.

भोंवडेक टी-20 माळे वरवीं सुरवात जातली. पयली मॅच 28 जूनाक नॉटिंगहॅमांत जातली. ते उपरांत 1 जुलयाक दुसरी मॅच ब्रिस्टॉलांत, तिसरी मॅच 4 जुलयाक लंडनांत, चवथी मॅच 9 जुलयाक मॅन्चॅस्टरांत आनी पांचवी मॅच 12 जुलयाक बर्मिंगहॅमांत जातली.

ते उपरांत वन डे माळ जातली. पयली मॅच 16 जुलयाक सावथॅम्पटनांत, दुसरी मॅच लॉर्ड्स मैदानांत 19 जुलयाक आनी तिसरी मॅच 22 जुलयाक चेस्टर स्ट्रिटांत जातली.