भांगरभूंय | प्रतिनिधी
भारताच्या बायलांचो क्रिकेट पंगड आयज तिसरे आनी निमाणे टी-20 क्रिकेट मॅचींत ऑस्ट्रेलियेच्या बायलांच्या क्रिकेट पंगडाक हारोवन माळ 2-1 अशा फरकान जिखपाचो यत्नांत आसतलो.
भारताक अजून मेरेन घरच्या मैदानाचेर खेळटना ऑस्ट्रेलिये आडची टी-20 माळ जिखपाक जमूंक ना. सध्या दोनूय पंगड 1-1 अशे बरोबरींत आसात. भारत आनी ऑस्ट्रेलिया ह्या पंगडां मदीं पांच द्विपक्षीय माळो जाल्यात. पूण, तातूंतली फकत एकूच माळ जिखपाक भारताक येस आयलां. जाल्यार चार माळांनी हार घेवची पडल्या. भारतान एकोडी माळ 2015-16त ऑस्ट्रेलियेंत जिखिल्ली.
माळेंतले पयली पयली मॅच भारतान 9 विकेटींनी जिखिल्ली, जाल्यार दुसरे मॅचींत ऑस्ट्रेलियेन 6 विकेटींनी जैत जोडून माळेंत 1-1 अशी बरोबरी केल्ली.
भारता खातीर मुखेली हरमनप्रीत सिंगाचो फॉर्म हुस्क्याचो विशय थारला. सगल्या फॉर्मेटांतल्यो मॅची धरल्यो जाल्यार फाटल्या 10 मॅचींनी तिका एकूय अर्द शेंकडो मारपाक जमूंक ना. फाटल्या 11 डावांनी तिका दोट्टी आंकडो लेगीत हुपपाक जमूंक ना. दुसरे मॅचींत अश्टतासांची खेळगडी दिप्ती शर्मान बॉल आनी बॅट दोनूय विभागांनी बरें प्रदर्शन केल्लें. पूण, भारताक जैत मेळोवन दिवपाक तिचे हे यत्न अर्दकुटे पडिल्ले. तिणें 27 बॉलांनी 31 धांवड्यो करून भारताक सन्मानजनक स्कोर उबारून दिवपाक मजत केल्ली. ते उपरांत ऑस्ट्रेलियेच्यो सुरवातीच्यो दोन विकेटी लेगीत घेतिल्ल्यो.
सुरवातीच्या दोन मॅचींनी बॅट्समनांक मेकळेपणान शॉर्ट खेळपाक मेळूंक ना. खास करून पयल्या डावांत बॉलरांनी आपलो शेक दवरिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
