भांगरभूंय | प्रतिनिधी
भारताक संवसारीक टॅस्ट वस्तादपण सर्तीचे फायनलींत ऑस्ट्रेलिये कडल्यान हार घेवची पडली. हे हारीक लागून भारताचें आयसीसी करंड जिखपाचें सपन परतून भंगलें. फाटल्या धां वर्सां सावन वस्तादपणाच्या लागसार येवन लेगीत हार घेवची पडल्या. आयतारा धांवड्यांचो फाटलाव करतना भारताच्या पंगडान परतून निर्शेणी हाडली. भारताच्या पंगडा विशीं दिग्गज खेळगडे प्रतिक्रिया दिवपाक लागल्यात. मजगतीं, भारताचो आदलो बॅट्समन विरेंद्र सेहवागाचें मोठें विधान मुखार आयलां.
हारी उपरांत सेहवागान ट्विट केलें. संवसारीक वस्तादपण सर्त जिखिल्ले खातीर ऑस्ट्रेलियेक परबीं. तांकां वस्तादपण फावता. ऑस्ट्रेलियेच्या बळिश्ट दावखुऱ्या बॅट्समनां आड कितें रणनिती आपणावपाक जाय हे विशीं भारतान मातूय विचार करूंक ना. तसो विचार केल्लो जाल्यार आर आश्विनाक भायर दवरपाचो निर्णय केन्नाच घेवचे नासतले आशिल्ले. भारत मानसीक रितीन मॅच हारिल्लो. टॉप ऑर्डरा वयल्या बॅट्समनांनी बरी बॅटींग करपाक जाय आशिल्ली. वस्तादपण जोडपाक बरी मानसीकताय आनी दृश्टीकोण गरजेचो आसता अशें सेहवागान म्हणलें.
ऑस्ट्रेलियेच्या दादल्या पंगडान णववे खेपे आयसीसी करंड जिखलो. आयसीसीच्यो सगल्यो सर्ती जिखपी तो पयलो पंगड थारलो. ताणें वन डे, टी-20, चॅम्पियन्स ट्रॉफी आनी आतां संवसारीक टॅस्ट वस्तादपण फायनल जिखलो. दुसरे वटेन भारतान सेगीत दुसरे खेपे वस्तादपण मेळोवपाची संद वगडायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
